MARIKO 6

1Oku yarugayo, yagenda omunsi y'owaabu; abeegesebwa be baagenda nawe. 2Ha Sabbato yatandika kwegesa omu isorrokaniro; kandi abaingi abaamuhuliire baahunirra nibagamba bati: “Omusaija onu, binu byona akabiiha nkaha? Magezi ki aga yahairwe? Ebi arukukora ka nibihuniriza! 3Onu tinuwe mubaizi, mutabani wa Mariya, mugenzi wa Yakobbo na Yose na Yuda na Simooni; kandi banyaanya titwombekere nabo owaitu?” Nukwo kumwanga. 4Baitu Yesu yabagambira ati: “Omurangi aheebwa ekitiinisa hoona hoona, okwihaho omunsi y'owaabu, omu ruganda rwe, n'omuka ye.” 5Oku atasobole kukorayo kyamahano na kimu, kwihaho kuta emikono ye ha barwaire bake, yabakiza. 6Yahunirra habw'okutaikiriza kwabo. Kandi yagendagendaga omu byaro naayegesa. 7Yayeta ikumi na babiri, yatandika kubatuma babiri babiri, kandi yabaha obusobozi bw'okubinga emyoyo emibi. 8Yabateererra kutatwara kintu kyona omu rugendo rwabo, kwihaho omwigo; kutatwara ntanda, rundi ensaho, noobu zaakuba sente omu nsaho z'enkoba zaabo; 9baitu bagende bajwaire enkaito, kandi batatwara kanzu ya kabiri. 10Yayongera yabagambira ati: “Enju ei murataahamuga, niyo mwikalemu okuhika obu mulirugayo. 11Nambere bataabajwahukirrege kandi bakanga kuhurra ebi murukugamba, obu muraabaga nimurugayo, muteerateere ecuucu y'omu bigere byanyu, bubege bwakaiso obw'okubasingisa omusango.” 12Bbo baagenda nibatebeza abantu nkooku basemeriire kwegarukamu. 13Bakabinga emyoyo emibi nyingi, kandi baasiiga amagita abarwaire baingi, baabakiza. 14Omukama Herode ebi yabihurra, habwokuba ibara lya Yesu likaba limazire kurangaanwa. Abamu bakagamba bati: “Yohaana Omubatiza ahumbuukire omu bafu, nikyo arukukorra eby'amaani binu.” 15Baitu abandi bakagamba bati: “N'Eriya.” N'abandi bagira bati: “Murangi, nk'omu ha barangi aba ira.” 16Baitu Herode obu yahuliire ebi, yagamba ati: “Yohaana ou naacwireho omutwe, ahumbuukire.” 17Herode akaba amazire kutuma abantu bakwate Yohaana, bamubohe, bamute omu nkomo habwa Herodiya muka Filipo mugenzi we; habwokuba Herode akaba amuswire. 18Nukwo Yohaana kuhana Herode ati: “Ebiragiro bya Musa tibirukukwikiriza kuswera muka mugenzi waawe.” 19Herodiya nikyo yamurwaliize enzigu, kandi yagonza kumwita; baitu atasobole, 20habwokuba Herode akaba naatiina Yohaana, naamanya nkooku ali muntu ahikiriire kandi arukwera; yamulinda kurungi. Obu yahuliire Yohaana ebi yamuhanire, yasoberwa muno; baitu nabwo yamutamuga ekitiinisa. 21Akasumi akasemeriire kaahikira ha kiro ky'okwijukiraho okuzaarwa kwa Herode, yacumbira abakurasi be, n'abakuru b'abaserikale, n'abantu abakuru aba Galiraaya obugenyi. 22Muhara wa Herodiya obu yaizire, yacekeca, yasiimwa Herode n'abagenyi be. Omukama nukwo kugambira omwisiki ati: “Nsaba kyona eki orakagonza, ndaakikuha.” 23Yamurahira ati: “Kyona kyona eki oransaba, ndaakikuha, noobu kiraaba ekicweka ky'obukama bwange.” 24Omwisiki yaturuka aheeru, yakaguza nyina ati: “Nsabe ki?” Nyina yamugarukamu ati: “Saba omutwe gwa Yohaana Omubatiza.” 25Omwisiki atabandaale yagaruka hali omukama, yamusaba naagamba ati: “Ningonza bwango ompeere ha sahaani hanu omutwe gwa Yohaana Omubatiza.” 26Omukama yasaalirwa muno; baitu habw'okusangwa yarahira, n'okutiina kuswara hali abagenyi be, atagonze kucwa eki yarahiire omwisiki. 27Nukwo omukama kutuma ahonaaho omu ha baserikale be abalinzi, yamuragira aleete omutwe gwa Yohaana. Omuserikale yagenda omu nkomo, yamutemaho omutwe, 28yaguleetera ha sahaani, yaguha omwisiki; kandi omwisiki yagutwarra nyina. 29Abeegesebwa ba Yohaana obu baahuliire eki, baija baatwara omutumbi gwe, baaguziika omu kituuro. 30Abakwenda bakagaruka hali Yesu baamugambira byona ebi baakozire n'ebi baayegeseze. 31Uwe yabagambira ati: “Mwije inywenka tugende ha rubaju, muhuumuleho”; habwokuba abantu baingi bakaba nibaija, abandi nibagenda; habweki abeegesebwa batatunge noobu kaakuba akaanya ak'okulya. 32Baagwerra bonka omu bwato, baagenda ha rubaju. 33Baitu abantu baingi baabarora nibagenda, baabamanyirra; baaruga omu byaro byona nibairuka baababanzaayo. 34Yesu obu yarugire omu bwato yarora ekitebe ky'abantu baingi, yabakwatirwa embabazi, habwokuba bakaba nibasisana entaama ezitaina muliisa; yatandika kubeegesa ebintu bingi. 35Obwire obu bukaba buli haihi kwira, abeegesebwa be baamwizira nibagamba bati: “Linu irungu, kandi n'obwire bwasa kwira; 36raga abantu, bagende omu maka n'omu byaro ebiri haihi, beegurreyo ebyokulya.” 37Baitu uwe yabagarukamu ati: “Inywe mubahe ebyokulya.” Nabo baamukaguza bati: “Tugende tugule emigaati ya edinaali, niyo tubahe balye?” 38Nandiki uwe ati: “Mwinaho emigaati ingaha? Mugende murole.” Obu baamazire kwetegereza, baamugarukamu bati: “Twinaho emigaati etaano n'encu ibiri.” 39Nubwo yaragiire boona kwegaba omu bitebe, baikarre hansi ha bunyansi obubisi. 40Baikarra omu bitebe bya kikumi-kikumi n'ebya makumi ataano-ataano. 41Yakwata emigaati etaano n'encu ibiri, yararamira ha iguru, yasiima; emigaati yagicwamu, yagiha abeegesebwa be bagigabire abantu; kandi n'encu ibiri yaigabira boona. 42Boona baalya, baiguta. 43Hanyuma baasorooza oburagalika bw'emigaati n'obw'encu bwaijuza ebigega ikumi na bibiri. 44Abo abaaliire emigaati baahikaga basaija enkumi itaano. 45Ahonaaho Yesu yaragira abeegesebwa be okugwerra omu bwato, bumabanze kwambuka nseeri Betisaida, uwe nakyaraga abantu. 46Obu yamazire kubaraga, yatemba omu busozi kubaza na Ruhanga. 47Obwire obu bwaizire, obwato bwasangwa buli omu nyanja hagati, uwe asigaire wenka ha bwerre. 48Yarora nkooku bakaba nibalemesibwa kugoya obwato habwokuba omuyaga gukaba gubaturukire omu maiso. Ha saaha nka ikumi z'ekiro yabaizira naarubatira ha maizi. Yasisana kubahinguraho, 49baitu obu baamurozire naarubatira ha maizi, baatekereza ngu muzimu, baayamuza; 50habwokuba boona bakamurora, baayekanga. Ahonaaho yabahuumuza ati: “Muhuumule, ninyowe; mutatiina.” 51Yatemba omu bwato nambere bakaba bali; omuyaga gwaculeera. Kandi baatangaara muno; 52habwokuba batasoborokerwe eby'emigaati habw'okutahwituka. 53Obu baamazire kwambuka, baahika omu nsi ya Genesareeti; obwato bwabu baabusibika ha musa. 54Obu baarugire omu bwato, ahonaaho abantu baamanyirra Yesu, 55baatandika kurabangana omu byaro ebiherraineho, baaleeta abarwaire, babahimbiire ha butabu bwabu, nibabamusangisa hoona ha baahurraga ali. 56Hoona nambere yahikaga, omu byaro rundi omu mbuga rundi omu masamba baabyamyaga abarwaire omu ntangatangano, nibamwesengereza ngu, haakire bakwate ha mukugiro gw'ekijwaro kye; kandi boona abaakwasireho bakakira.

will be added

X\