MARIKO 5

1Baahika nseeri y'enyanja, omunsi y'Abageraseene. 2Yesu obu yarugire omu bwato, yatangaana omusaija akwasirwe omwoyo mubi, ow'akaba naaruga omu bituuro 3nambere yaikaraga. Busaho n'omu ow'akaba naasobora kumuboha noobwakubaire kumubohesa orujegere; 4habwokuba emirundi nyingi baamubohesaaga empingo n'enjegere, baitu enjegere yaicwaaga, kandi n'empingo azicwacwana; hataroho ow'akaba aina amaani ag'okumuculeeza. 5Ekiro na nyamusana yaikaraga naayamuliza omu bituuro na ha nsozi, naayehutaaza n'amabaale. 6Obu yalengiire Yesu, yairuka, yamuteereza amaju; 7yayamuza n'iraka likooto ati: “Yesu, Omwana wa Ruhanga anyakuli haiguru muno, noontura ki? Ninkurahira omu ibara lya Ruhanga, otancanza.” 8Habwokuba Yesu akaba agugambiire ati: “Murugeho, iwe omwoyo omubi!” 9Yesu nukwo kugukaguza ati: “Ibara Iyawe niryo liha?” Gwagarukamu guti: “Ibara lyange ninyowe Ihe; habwokuba tuli baingi.” 10Gwamwesengereza muno aleke kugubinga omunsi omu. 11Haihi aho ha mbanda y'orusozi hakaba haroho igana lingi ly'empunu nizirya; 12emyoyo emibi yamwesengereza eti: “Tusindike omu mpunu ezi, nizo tutaahemu.” 13Yagiikiriza. Emyoyo emibi yaruga omu muntu ogu, yataaha omu mpunu; kandi igana ly'empunu ezirukuhika nk'enkumi ibiri, zaajumbutuka, zaakonkomoka enengo, zaagwa omu nyanja, zaafeeramu. 14Abaliisa bairuka baakisubirra ab'omu rubuga n'ab'omu byaro. Abantu baija kurora ekibaireho. 15Baahika hali Yesu, baasanga omuntu ogu ow'akaba akwasirwe omwoyo omubi aikaliire, ajwaire, kandi ateekaine nuwe ogu ow'akaba akwasirwe ihe ery'emyoyo emibi; baayekanga. 16Abaakirozire baabasoborra ekibaireho omuntu ogu ow'akaba aroho emyoyo emibi, n'ebibaireho empunu. 17Kandi bbo baatandika kwesengereza Yesu aruge omu mitaano yabo. 18Uwe obu akaba naataaha omu bwato, omusaija ow'akaba akwasirwe emyoyo emibi yaija, yamwesengereza amwikirize kwikara nawe. 19Baitu Yesu yayanga, yamugambira ati: “Taaha owaanyu omu bagenzi baawe, obagambire ebikuru MUKAMA ebi akukoliire, kandi n'embabazi ezi akugiriire.” 20Yagenda yatandika kurangirra ab'omu kicweka ky'Embuga Ikumi byona Yesu ebi yamukoliire; abantu boona baatangaara. 21Yesu obu yayambukiire omu bwato, yagaruka nseeri y'enyanja, kandi ekitebe ky'abantu baingi kyamwesoroolezaaho; yaikara ha musa gw'enyanja. 22Aho haija omu ha bakuru b'isorrokaniro, ibara lye Yairo. Obu yarozire Yesu, yagwa ha bigere bye, 23yamwesengereza naagamba ati: “Muhara wange ali haihi kufa. Ija omuteho emikono yaawe, nukwo akire, kandi ayomeere.” 24Yesu yagenda nawe. Ekitebe ky'abantu baingi kyamuhondera kimugoteriire. 25Hakaba haroho omukazi ayamazire emyaka ikumi n'ebiri arwaire akejwiso. 26Abafumu baingi bakaba balengereho kumutambira, kandi akaba amaliizeyo ebye byona, ataraarwe naakake baitu akeeyongera kuba kubi. 27Akaba ahuliire ebi baagambahoga Yesu, yamuruga enyuma naaraba omu kitebe ky'abantu, yamwirra haihi, yakwata ha kijwaro kye. 28Akagumya ati: “Noobu ndakwataho kwonka ekijwaro kye ndaakira.” 29Ahonaaho akejwiso ke kaayoma; kandi yayehurra omu mubiri gwe nkooku akiziibwe endwara ye. 30Yesu obu yamanyire amaani agamurugiremu, ahonaaho yahindukira ekitebe ky'abantu yakaguza ati: “Nooha akwasire ha bijwaro byange?” 31Abeegesebwa be baamugarukamu bati: “Noorora ekitebe ky'abantu nkooku kirukukufunza, kandi nookaguza ngu: ‘Nooha ankwasireho?’ ” 32Baitu uwe yamagamaga kurora ow'amukwasireho. 33Omukazi habw'okumanya ekimukozirweho, yaija naatiina kandi naatukumira, yajuumara hansi omu maiso ge, yamugambirra kimu amazima goona. 34Nukwo Yesu kumugambira ati: “Mwisiki wange, okwikiriza kwawe nukwo kukukirize; genda n'obusinge, okirre kimu endwara yaawe.” 35Yesu obu akaba naakyabaza, haija abarukuruga mb'omukuru w'isorrokaniro, baamubikira bati: “Muhara waawe afiire. Omwegesa nokyamujwahiza ki?” 36Baitu Yesu eki tiyakitaho mutima, yagambira omukuru w'isorrokaniro ati: “Otatiina, ikiriza kwonka.” 37Kandi ataikirize muntu weena kugenda nawe, kwihaho Petero, Yakobbo, na Yohaana owanyina Yakobbo. 38Obu baahikire ha nju y'omukuru w'isorrokaniro, Yesu yarora abantu abarukurabanganamu, abamu nibarra kandi nibateera empamo. 39Obu yataahiremu yabakaguza ati: “Nimurabanganiramu ki kandi nimulizibwa ki? Omwana tafiire, baitu agwijagiire.” 40Bbo baamusekeereza. Baitu boona yabaturukya aheeru, yatwara ise omwana na nyina, n'abo aba yaizire nabo, yahingura omu kisiika omwana nambere akaba ali. 41Yamukwata ha mukono, yamugambira ati: “Talita kuumi;” amakuru gaakyo ngu: “Kaisiki iwe, ninkugambira nti: Imuka.” 42Ahonaaho omwisiki yaimuka, yatandika kurubata; akaba ali w'emyaka ikumi n'ebiri y'obukuru. Abantu obu baarozire eki, baahuniira. 43Yabateererra kutamanyisa muntu weena, kandi yaragira bahe omwisiki ekyokulya.

will be added

X\