MARIKO 3

1Yesu akagaruka yataaha omu isorrokaniro; yasangamu omusaija ow'akaba akabire omukono. 2Baamuhanga amaiso, barole obu araaba naija kumukiza ha Sabbato, nukwo bamunyegerre. 3Yagambira omusaija ow'akaba akabire omukono ati: “Ija hanu.” 4Nubwo yabakagwize ati: “Nikiikirizibwa Ebiragiro bya Musa kukora ekirungi ha Sabbato rundi ekibi? Okujuna obwomeezi rundi kubwita?” Baitu bbo baaculeera. 5Yababungyamu amaiso aina ekiniga, asaalirwe habw'okutahwituka kw'emitima yabu, nukwo kugambira omusaija ati: “Gorra omukono gwawe.” Yagugorra, omukono gwe gwakira. 6Abafalisaayo baaturuka aheeru, baatandika ahonaaho kuhanuura n'ab'ekitebe kya Herode nkooku baraamwita. 7Yesu yarugayo n'abeegesebwa be, yagenda ha musa gw'enyanja; kandi ekitebe ky'abantu baingi abaarugire Galiraaya baamukuraatira. Abandi baingi abaarugire Buyudaaya, 8Yerusaalemu, na Idumaaya, n'abaarugire nseeri ya Yorudaani, n'ab'omu bicweka ebiherraine Tiiro na Sidooni obu baahulire byona ebi yakozire, baija nambere ali. 9Yaragira abeegesebwa be kumutungira obwato habw'abantu kuba baingi, nukwo baleke kumufunza. 10Uwe akaba akirize baingi nukwo boona abakaba barwaire kusindikangana, bamukwateho. 11Abantu abakaba baina emyoyo emibi obu baamurozire, baagwa omu maiso ge, nibaamuza bati: “Iwe oli Mwana wa Ruhanga.” 12Baitu uwe akabateererra muno okutamurangaaniza omu bantu. 13Yatemba omu nsozi, yayeta abo aba yagondeze kumuhondera. Bbo baija nambere ali. 14Yakomamu ikumi na babiri kwikara nawe, kandi abatumege okurangirra Amakuru Amarungi. 15Yabaha obusobozi obw'okubinga emyoyo emibi. 16Nubo banu: Simooni ou yarukire Petero; 17Yakobbo mutabani wa Zebedaayo na Yohaana owanyina aba yarukire ibara Boanerege, amakuru gaalyo ngu: bantu ababiihirwa bwango; 18Andereya na Filipo, Batolomayo na Matayo, Tomasi na Yakobbo mutabani wa Alifaayo, Tadeo na Simooni omurwanirizi w'ihanga lye, 19na Yuda Isikalyota ayamugobiize. Hanyuma yataaha omu ka. 20Ekitebe ky'abantu kyagaruka kyayesorooza, nahabweki Yesu n'abeegesebwa be batasobole kulya. 21Abe'ka y'owaabu obu baakihuliire, baaturuka kumwiha omu kitebe habw'okuhurra abamu nibagamba bati: “Ahunguutukire.” 22Abeegesa b'ebiragiro abaarugire Yerusaalemu bakagamba bati: “Ataahirwemu Beelizebuli, mukuru w'emyoyo emibi, kandi habw'obusobozi bwe nikyo arukugibingira.” 23Baitu Yesu yabeeta, yabeegesa omu nfumo ati: “Sitaani asobora ata kubinga Sitaani? 24Kakuba obukama bwebaganizaamu bwonka, tibusobora kwikaraho. 25Kakuba n'eka eyebaganiizaamu yonka, nayo tesobora kwikaraho. 26Sitaani obu araaba ayebaganizemu kwerwanisa wenka, tasobora kwikaraho, ahwerekerra. 27Ningira tiharoho muntu asobora kutaaha enju y'omusaija ow'amaani akanyaga ebintu bye, rundi buli abandize kumuboha, nukwo anyage eby'omu njuye. 28“Mazimakwo nimbagambira nti: Abantu baliganyirwa ebibi byabo byona, n'ebijumo byona ebi bajuma Ruhanga; 29baitu weena anyakujuma Mwoyo Ahikiriire taliganyirwa, ekibi kye kirimusingisa omusango ebiro byona” 30ekyamugambisize eki nukwo bbo kugira ngu: “Aina omwoyo omubi.” 31Nyina Yesu na bagenzi be bakaija, baayemerra aheeru baamutumaho nibamweta. 32Ekitebe ky'abantu kikaba kiikaliire kimwehinguliriize; abatumirwe nukwo kumugambira bati: “Nyoko na bagenzi baawe bali aheeru nibakweta.” 33Uwe yabagarukamu ati: “Mau nuwe oha, na bagenzi bange nubo baha?” 34Yabungyamu amaiso abo abakaba bamwehinguliriize, yagamba ati: “Mau na bagenzi bange nubo banu! 35Weena anyakukora Ruhanga eki agonza, nuwe mugenzi wange, nuwe munyaanya nyowe, kandi nuwe mau.”

will be added

X\