MARIKO 16

1Sabbato obu yahoireho, Mariya Magadaleena, na Mariya nyina Yakobbo, na Salome bakagura amagita agarukuboya nukwo bagende basiige omutumbi gwa Yesu. 2Nyenkya kara, ha Sande, ekiro ekibanza omu wiiki, bakagenda ha kituuro izooba liturukire. 3Bakaba nibakaguzangana bati: “Nooha aratukumbiza ibaale kuliiha ha munwa gw'ekituuro? ” 4Obu baimukize amaiso, baarora ibaale liri erikooto muno likumbiibwe. 5Obu bataahire omu kituuro, baarora omusigazi aikaliire ha rubaju rw'obulyo, ajwaire orugoye orurukwera; baahunirra. 6Uwe yabagambira ati: “Muleke kuhunirra; mmanyire nimuserra Yesu owa Nazareeti ayabambirwe ha musaraba. Hanu taroho, ahumbuukire; mwije murole nambere bakaba bamutaire. 7Hati nu, mugende mugambire abeegesebwa be na Petero ngu, naija kubabanza kuhika Galiraaya, oku nuho mulimurorra nkooku yabagambiire.” 8Bbo baaturuka omu kituuro, bairuka bakwasirwe akatukumo kandi nibahunirra; baitu habw'obutiini batagambireho muntu n'omu. 9[Yesu obu yahumbuukire, omu rukyakya ha kiro kya Sande, akabanza kubonekera Mariya Magadaleena ou yabingireho emyoyo emibi musanju. 10Uwe yagenda yagambira abaikaraga hamu na Yesu, abakaba nibaganya kandi nibarra. 11Baitu obu baahuliire nkooku ayomiire, kandi Mariya nkooku amurozire, batabiikirize. 12Eki obu kyahoire, akabonekera abandi babiri ali omu nsisana endi, obu bakaba nibagenda omu kyaro. 13Nabo baagarukayo baabigambira abandi, baitu batabaikirize. 14Hanyuma akabonekera ikumi n'omu obu bakaba nibalya; yabahana habw'okutaikiriza kwabu n'okugumangana kw'emitima yabo, habwokuba bataikirize ebi baagambiirwe abo abaamurozire amazire kuhumbuuka. 15Yabagambira ati: “Mugende omunsi yoona, murangirre abantu boona Amakuru Amarungi. 16Ogu aliikiriza akabatizibwa nuwe alijunwa; baitu ataliikiriza, omusango gulimusinga. 17Bunu nubwo oburorwaho obulyoleka abaliikiriza: habw'obusobozi bwange balibinga emyoyo emibi, balibaza endimi empyaka; 18noobu balikwata enjoka, rundi bakanywa ekirukwita kyona, tibiribakoraho kabi; balita emikono yabo ha barwaire, bakire.” 19MUKAMA Yesu obu yamazire kubaza nabo, yatwarwa omwiguru, yaikarra ha mukono ogw'obulyo ogwa Ruhanga. 20Abeegesebwa baagenda baabirangirra hoona hoona; MUKAMA naakora hamu nabo kandi naagumya ebigambo byabo n'ebihuniriza ebyabikuraataga. Amiina.

will be added

X\