MARIKO 15

1Obwire obu bukaba nibukya buti, baanyakatagara abakuru, hamu n'abakuru b'abantu, n'abeegesa b'ebiragiro, n'orukurato rwona baikarra kuhanuura; hanyuma baaboha Yesu baamutwara, baamukwasa Pilaato. 2Pilaato yamukaguza ati: “Niiwe Mukama w'Abayudaaya?” Uwe yamugarukamu ati: “Nukwo ogambire.” 3Baanyakatagara abakuru bakamunyegerra ebintu bingi. 4Pilaato yagaruka yamukaguza ati: “Toina kyona eki orukugarukamu? Dora, ebi barukukunyegerra nkooku biri bingi.” 5Baitu Yesu tiyamugarukamu kindi; habweki Pilaato yahunirra. 6Ha bugenyi obukuru nk'obu Pilaato yabalekerraga omunyankomo omu ou baasiimaga. 7Omu beemi abakaba bali omu nkomo abaakwasirwe habw'okwita abantu omu kajagarro, hakaba harumu omusaija ibara lye Baraaba. 8Ekitebe ky'abantu kyaija kyasaba Pilaato akole nkooku abakorra bwona. 9Uwe yabakaguza ati: “Nimwenda mbalekerre Omukama w'Abayudaaya?” 10Habwokuba akamanya ngu, banyakatagara abakuru bamuhaireyo habw'ihali. 11Baitu banyakatagara abakuru nukwo kwimukiriza ekitebe ky'abantu ngu, haakire abalekerre Baraaba. 12Pilaato yagaruka yabakaguza ati: “Kandi omusaija ou murukweta Mukama w'Abayudaaya, mmukole ki?” 13Baitu bbo baatokera haiguru bati: “Mubambe ha musaraba.” 14Nandiki Pilaato ati: “Habwaki? Kibi ki eki akozire?” Nukwo bbo kutokera haiguru okukiraho bati: “Mubambe ha musaraba.” 15Aho Pilaato habw'okugonza kusiimwa ekitebe ky'abantu, yabalekerra Baraaba. Obu baamazire kuteera Yesu enkoba, yamuhayo kubambwa ha musaraba. 16Abaserikale baihaho Yesu baamutwara omu kikaali omunju enyakwetwa kibbira; baasorooza ekihanda kyona ky'abaserikale. 17Baamujweka orugoye orurukugaajuka, baazinga ekondo y'amahwa baagimuta ha mutwe. 18Baatandika kumuramya bati: “Hangiriza, Omukama w'Abayudaaya!” 19Baamuteeza orubingo omu mutwe, baamucwera ebicwanta, baateeza amaju nibamuramya. 20Obu baamazire kumuterra enaku, baamujuura orugoye orurukugaajuka, baamujweka engoye ze, baamwebembeza kugenda kumubamba ha musaraba. 21Kandi bakahambiriza omuhinguzi, Simooni owa Kireene, ise Alekisanda na Rufo, ow'akaba naaruga omu kyaro, ayetweke omusaraba gwa Yesu. 22Baahikya Yesu omu kiikaro ekirukwetwa Gologota (ekirukumanyisa ngu, kiikaro ky'oruhanga). 23Baamuha eviini etabwirwemu omubazi; baitu ataginywe. 24Baamubamba ha musaraba; baabagana ebyokujwara bye nibabiterra itomo, okucwamu buli omu eki araatwara. 25Obu baamubambire ha musaraba zikaba ziri saaha isatu. 26Ekihandiiko ekirukumanyisa omusango gwe kikaba nikigamba kiti: “Omukama w'Abayudaaya.” 27Bakamubamba n'abanyagi babiri, omu ha mukono ogw'obulyo, ondi ha gwemoso. 28(Ekyahandiikirwe kyahikirra ekirukugamba kiti: “Akabalirwa hamu n'enkozi z'ebibi.”) 29Abo abakaba nibahingura baamujuma, nibacwa emitwe yabo, nibagamba bati: “Ahaa! Iwe ayagondeze kuseesa Enju ya Ruhanga okagaruka kugyombekera ebiro bisatu, 30wejune wenka, oyehanuule ha musaraba!” 31N'abanyakatagara abakuru nabo bakamujuma bali hamu n'abeegesa b'ebiragiro nibagambirangana bati; “Akajuna abandi, baitu tasobora kwejuna wenka. 32Leka Kristo, Omukama wa Isirairi, hati ayehanuule ha musaraba, nukwo na itwe turole, twikirize.” Kandi abo abakaba babambirwe nawe, nabo baamujuma. 33Esaaha ya mukaaga obu yahikire, omwirima gwasweka ensi yoona okuhika ha saaha ya mwenda. 34kandi ha saaha ya mwenda Yesu yayamuza n'iraka likooto ati: “Eli, Eli, lama sabakatani?” amakuru gaakyo ngu: “Ruhanga wange, Ruhanga wange, ondugiireho ki?” 35Abamu ha basungi obu baahuuliire eki baagamba bati: “Muhurre, naayeta Eriya.” 36Omu hali bo yairuka yaibika ekijumankuba omu marwa agasaliire, yakita ha rubingo, yakimuha anyunyuguze, yagamba ati: “Ka turole Eriya obu araija kumuhanuura ha musaraba.” 37Yesu yayamuza n'iraka likooto, yacwekana. 38Enyigamo y'omu Nju ya Ruhanga yatemukamu habiri, okuruga eruguru okuhika hansi. 39Omukuru w'abaserikale ow'akaba ayemeriire aho amuroleriire, obu yaboine nkooku acwekaine, yagamba ati: “Mazimakwo, omusaija onu abaire ali Mwana wa Ruhanga!” 40Kandi hakaba haroho abakazi beemeriire hara baroleriire. Omuli bo hakaba harumu Mariya Magadaleena, na Mariya nyina Yakobbo omuto, na Yose, hamu na Salome. 41Abo nubo abaamuhonderaga nibamuheereza obu akaba ali omu Galiraaya; kandi hakaba haroho abakazi abandi baingi abaizire nawe Yerusaalemu. 42Eki kikaba kiri kiro eky'Okweteekanirizaamu, nikyo kiro ekyebembera Sabbato. Nahabweki omu rusweko rw'obwire, 43Yosefu owa Arimateya, omukurasi ow'ekitiinisa omu rukurato, nawe akaba naategereza obukama bwa Ruhanga, yagenda hali Pilaato atarukutiina, yasaba omutumbi gwa Yesu. 44Pilaato, kyamuhuniriza okuhurra nkooku afire ira, nukwo kweta mukuru w'abaserikale, yamukaguza obu araaba afiirekwo. 45Omukuru w'abaserikale obu yamazire kumumanyisa nkooku afiire, yaikiriza Yosefu atwale omutumbi. 46Yagura orugoye rwa bafuta, yahanuura omutumbi, yaguzinga omu rugoye oru, yaguta omu kituuro ekikaba kibaizirwe omu mwandara. Hanyuma yakumbya ibaale, yaigarra omunwa gw'ekituuro. 47Mariya Magadaleena na Mariya nyina Yose bakarora nambere bataire Yesu.

will be added

X\