MARIKO 13

1Yesu obu akaba naakyaruga omu Nju ya Ruhanga, omu ha beegesebwa be yamugambira ati: “Mwegesa, dora amabaale ganu n'ebyombeko binu, ka bikasemera!” 2Yesu yamugarukamu ati: “Ebyombeko ebi ebikooto obiboine? Tihalisigara ibaale na limu eriri ha lindi, eritalinagwa hansi.” 3Yesu obu akaba aikaliire ha rusozi rw'emiti Oliva, aroleriire Enju ya Ruhanga, nubwo Petero, Yakobbo, Yohaana na Andereya baamukagwize omu nsita bati: 4“Tugambire, binu biribaho di? Kandi karorwaho ki akalyoleka nkooku biri by'okuhikirra?” 5Nandiki Yesu ati: “Mwerinde hatalibaho muntu weena arukubahabisa. 6Baingi abaliija omu ibara lyange nibagamba bati: ‘Ninyowe ogu!’ Kandi balihabisa baingi. 7Obu mulihurra obulemu n'orugambo rw'obulemu, mutalitiina; ebi by'okubaho, baitu empero eriba etakahikire. 8Ihanga liriimukirra erindi, n'obukama bulirwanisa obundi; halibaho emisisa omu biikaro bingi kandi haligwa ekiihe; baitu egi niyo ntandiko y'emihito. 9“Inywe mwerinde, habwokuba balibahayo omu nkurato, balibaterra omu masorrokaniro; mulyemerra omumaiso g'abalemi n'ag'abakama habwange, mube bakaiso bange hali bo. 10Amakuru Amarungi gabanze garangirirwe omu mahanga goona. 11Obu balibatwara, bakabahayo kutongana emisango, mutalitunturra ebi muligamba, baitu mugambe kyona eki muliheebwa omu kasumi ako; habwokuba tibali inywe abalyetonganirra, baitu mulitonganirirwa Mwoyo Ahikiriire. 12Omuntu alihayo owanyina aitwe, na ise mwana alihayo omwana we, n'abaana baliimukirra abazaire baabo babaise; 13na inywe mulinobwa boona habwange. Baitu ogu aligumisiriza okuhika ha mpero, nuwe alijunwa.” 14“Baitu obu mulirora ekintu ekibi, ekirukunugwa kandi ekirukuhwerekereza, kitairwe nambere kitasemeriire kuba (arukusoma binu ayetegereza); obu, abo abaliba bali omu Buyudaaya bairukire ha nsozi. 15Alisangwa ali ha nju eruguru atalisirimuka, kandi atalitaaha omunju ye kwihamu ekintu kyona; 16n'ow'alisangwa ali omu musiri ataligaruka omuka kutabarra omwenagiro gwe. 17Kandi bambi abaliba baina enda n'abarukwonkya omu biro ebi balikibona! 18Musabe, ebi bireke kubaho omu biro by'obutiti. 19Habwokuba omu biro ebi halibaho omuhito ogutakabahoga okuruga Ruhanga yakaba kuhanga ensi n'okuhika hati, kandi ogutaligaruka kubaho. 20Kakuba MUKAMA atarakeeheze ha biro ebi, tihaakujunirwe muntu n'omu; baitu habw'abakomerwemu be, ebiro ebi Ruhanga akabikeehya. 21Omuntu weena obu alibagambira ati: ‘Dora, Kristo ngunu!’ Rundi ‘Ngugwo!’ mutalikiikiriza. 22Halizooka abarangi b'ebisuba n'abarukweyeta Kristo. Balikora ebyamahano n'ebirukuhuniriza, nukwo bahabise noobu baakubaire abakomerwemu. 23Baitu inywe mwerinde; ebi byona mbibagambiire bitakabaireho.” 24“Baitu emihito y'ebiro ebi obu erihwa, izooba lirisiikirizibwa omwirima, n'okwezi tikulijwa, 25n'enyunyuuzi ez'omu iguru ziryeseesa hansi, n'amaani ag'omwiguru galitengesebwa. 26Obu nubwo balirora Omwana w'omuntu naizira omu bicu by' omwiguru aina obusobozi bwingi n'ekitiinisa. 27Nubwo alituma bamalaika basorooze abakomerwemu be, nibabaiha omu mbaju ina ez'ensi, okuruga iguru n'ensi nambere bitandikira okuhika nambere bigarukira.” 28“Mwegere ha muti omutini, itaagi lyagwo obu lirokera, likanjurra amababi, mumanya nkooku ekyanda kiri haihi. 29Na inywe obu mulirora binu nibibaho, mumanye Omwana w'omuntu nkooku ali haihi, ahikiire kimu ha irembo. 30Mazima nimbagambira nti: Ab'obusinge bunu tibalihwaho ebi byona bitakabaireho. 31Iguru n'ensi birihwaho, baitu ebigambo byange tibirihwaho.” 32“Baitu ekiro eki n'esaaha egi busaho n'omu abimanyire, noobu baakuba bamalaika ab'omwiguru, noobu yakuba Mwana wonyini, kwihaho Isenyowe wenka. 33Mwerinde, mwikale nimurora kandi musabe, habwokuba titumanyire akasumi ako nambere kalihikira. 34Nikisisana nk'omuntu arukugenda orugendo; obu aba naaruga omu ka asiga akwasize abaheereza be, buli omu omulimo ogu araakora; kandi aragira omukumirizi kwikara naalinda. 35Nahabweki, mwikale nimurora, habwokuba timumanyire kasumi nyineeka akaliiziramu: asobora kwija omu kairirizi rundi omu itumbi rundi enkoko niikooka, rundi omu rukyakya. 36Kakuba aija aleke kubagwamu akasanga mugwijagiire. 37Ekindukubagambira, nikyo ngambira n'abandi boona nti: Mwikale nimurora.”

will be added

X\