MARIKO 12

1Yesu akatandika kubabaliza omu nfumo ati: “Omusaija akabyara orugonjo rwe rw'emizabbibbu, yaruzitirra orukoroba, yalimamu endeeba, yayombekamu endindiro, yarusigira abapangisa okururolerra; uwe yagenda omu ihanga erindi. 2Obusumi bw'okunoga obu bwahikire, yatuma omuheereza hali abapangisa abo, bamutwekereho ebijuma by'emizaabbibbu. 3Baitu abapangisa abo baakwata omuheereza, baamuteera, baamubinga yarugayo ngaro-nsa. 4Yagaruka yabatumira omuheereza ondi; ogu baamuteera orubaale, baamuswaza. 5Yatumayo ondi, ogu baamwita; n'abandi baingi nukwo baabagizire bati. Abamu baabateera, abandi baabaita. 6Akaba akyasigaizeeho omuntu omu, nuwe mutabani we omugonzibwa ou yabatumiire ha kumalirra, naateekereza ati: ‘Mutabani wange baraamugayuka.’ 7Baitu abapangisa abo obu baamurozire, baagambirangana bati: ‘Onu nuwe mugwetwa. Muleke tumwite, obugwetwa bube bwaitu.’ 8Baamukwata, baamwita, baamunaga aheeru y'orugonjo. 9Hati nu Mukama w'orugonjo oru alikora ki? Aliija, ahwerekereze abapangisa abo, kandi orugonjo arukwase abandi. 10Timukasomaga ekyahandiikirwe kinu ekirukugamba kiti: ‘Ibaale lyonyini abombeki eri baayangire, niryo lyafookere bugumizo bw'enju; 11kinu nikyo Atahwaho yakozire, kandi nikituhuniriza?’ ” 12Baaserra okumukwata, baitu baatiina akanyanya k'abantu, kandi nibamanya orufumo oru nkooku arugambiire bbo; baamuleka baayegendera. 13Bakamutumira abamu ha Bafalisaayo n'ab'ekitebe kya Herode bamutege omu bigambo bye. 14Baija baamugambira bati: “Mwegesa nitumanya nkooku oli w'amazima, kandi tosoroora mu bantu; habwokuba tororra ha kitiinisa ky'abantu, baitu oyegesaakwo omuhanda gwa Ruhanga. Kihikire kuha Kaisaali omusoro rundi nangwa? 15Tuhe omusoro rundi tuguleke?” Baitu uwe obu yamanyire obugobya bwabo, yabakaguza ati: “Nimuntegera ki? Mundeetere siringi, ngirole.” 16Baagimuleetera. Uwe yabakaguza ati: “Ekisisani kinu n'ebihandiikirweho by'oha?” Nandiki bbo bati: “Bya Kaisaali.” 17Yesu yabagambira ati: “Ebya Kaisaali mubihe Kaisaali, n'ebya Ruhanga mubihe Ruhanga.” Eki kikabahuniriza muno. 18Abasadukaayo abahakana ngu, busaho kuhumbuuka, bakaija hali Yesu, baamukaguza bati: 19“Mwegesa, Musa akatuhandiikira ati: Mukuru w'omuntu obu araafaaga akasiga omukazi atazaire baana, mugenzi wa kifa aswere omufaakati ogu, nukwo bazarre kifa abaana. 20Aho nu hakaba haroho nyineemu musanju. Mukuru wabu yaswera omukazi, baitu yafa atasigire baana; 21n'owa kabiri yamuswera, nawe yafa atasigire baana n'owa kasatu nukwo ati. 22Okuhika boona musanju, obu baafiire batasigire baana. Abo boona obu bahoireho omukazi nawe yafa. 23Ha kiro ky'okuhumbuuka aliba muk'oha? Habwokuba boona musanju bakamuswera.” 24Yesu yabagarukamu ati: “Aho tinuho muhabira okutamanya Ebyahandiikirwe, noobu bwakuba obusobozi bwa Ruhanga? 25Habwokuba abafiire obu balihumbuuka, tibaliswera kandi tibaliswerwa; baitu baliba nk'abamalaika ab'omwiguru. 26Kandi ebirukukwata ha kuhumbuuka kw'abafu, timukasomaga omu kitabu kya Musa, omu kicweka ekirukugamba ha by'orusaka orurukwaka, Ruhanga nkooku yamugambiire ati: ‘Ninyowe Ruhanga owa Abburahamu, Ruhanga owa Isaaka, kandi Ruhanga owa Yakobbo?’ 27Tali Ruhanga ow'abafiire, baitu ow'aboomeezi; inywe muhabiire kimu.” 28Kandi omu ha beegesa b'ebiragiro yaija, yahurra nibateezangana empaka, obu yamazire kwetegereza nkooku Yesu abagarukiremu kurungi, yamukaguza ati: “Ekiragiro ky'okubanza omu byona nikiha?” 29Uwe yamugarukamu ati: “Eky'okubanza nikyo kinu: ‘Iwe Isirairi hurra, MUKAMA Ruhanga waitu nuwe MUKAMA wenka; 30ogonzeege MUKAMA Ruhanga waawe n'omutima gwawe gwona, n'omwoyo gwawe gwona, n'amagezi gaawe goona, n'amaani gaawe goona.’ 31Ekya kabiri nkinu: ‘Ogonzeege mutaahi waawe nkooku oyegonza wenka.’ Busaho kiragiro ekindi ekirukukira ebi.” 32Omwegesa w'ebiragiro yamugambira ati: “Mwegesa ohikize. Ogambire ngu, Ruhanga ali omu, kandi busaho ondi, kwihaho Uwe wenka. 33Kandi okumugonza n'omutima gwona, n'amagezi goona, n'amaani goona, kandi n'okugonza mutaahi waawe nkooku oyegonza wenka, ebi nibikirra kimu ebyonzira ebyokiibwe n'ebitambirwe.” 34Yesu obu yarozire nkooku agarukiremu n'amagezi, nubwo yamugambiire ati: “Obukama bwa Ruhanga tobuli hara.” Okuruga obu busaho n'omu ayagumire okumukaguza. 35Yesu obu akaba naayegesa omunju ya Ruhanga akakaguza ati: “Abeegesa b'ebiragiro basobora bata kugamba ngu, Kristo aba mwijukuru wa Daudi? 36Kandi kunu Daudi wenka akagambisibwa Mwoyo Ahikiriire ati: ‘Atahwaho akagambira MUKAMA wange ati: Ikarra ha mukono gwange ogw' obulyo, okuhika abanya nzigwa baawe obu ndibafoora akatebe k'ebigere byawe.’ 37“Daudi wenka ayeta Kristo MUKAMA we; kandi obu, aba ata mwijukuru we?” Ekitebe kyona eky'abantu kyamuhurra n'okusemererwa. 38Yesu obu akaba naayegesa, akagamba ati: “Mwerinde abeegesa b'ebiragiro abagonza kugendagenda bajwaire ekanzu ezirukwekweya, n'okuramukibwa n'ekitiinisa omu butale. 39Bagonza kwikarra ha ntebe z'ekitiinisa omu masorrokaniro, n'ebiikaro ebirukukira oburungi omu magenyi. 40Nubo abo abanyaga amaju g'abafaakati, hanyuma beezokesa nibarandagatana omu kusaba. Abo balicwerwa omusango ogurukukira ogw'abandi.” 41Yesu akaba aikaliire aroleriire eryahurro lya sente. Yarora abantu baingi nibalitamu sente. Abaguuda baingi bakanagamu omuhendo mukooto. 42Omufaakati omunaku yaija, yanagamu obusente bubiri bw'ebyoma. 43Nukwo Yesu kweta abeegesebwa be, yabagambira ati: “Mazima nimbagambira nti: Omufaakati omunaku onu anagiremu nyingi okukira abandi boona abanagire omu lyahurro. 44Habwokuba bbo banagiremu ebi basaagiriire; baitu uwe omu bunaku bwe ahaireyo byona ebi ainabyo.”

will be added

X\