MARIKO 10

1Yesu obu yarugireyo, yagenda omu kicweka kya Buyudaaya ekiri nseeri y'ekisaaru Yorudaani. Ebitebe by'abantu byagaruka kumwesoroolezaaho, nawe yayongera kubeegesa, nkooku engeso ye ekaba eri. 2Abafalisaayo baija nambere ali, baamukaguza nibamulenga bati: “Ebiragiro bya Musa nibiikiriza omusaija kubinga mukazi we?” 3Nawe yabakaguza ati: “Musa akabaragira ki?” 4Baamugarukamu bati: “Musa akaikiriza omuntu kuhandiika ebbaruha y'okwahukana na mukazi we, nukwo amubinge.” 5Nandiki Yesu ati: “Habw'okugumangana kw'emitima yanyu, nikyo yabahandiikiriire ekiragiro eki. 6Habwokuba okuruga ha kuhangwa kw'ensi: ‘Rubanga akahanga omusaija n'omukazi.’ 7‘Nikyo omusaija araalekeraga ise na nyina, agumire hali mukazi we, 8kandi ababiri abo bafooke mubiri gumu.’ Habweki baba batakyali babiri baitu omu. 9Nababweki Ruhanga eki yateeraniize hatalibaho muntu akyahukaniza.” 10Obu baahikire omunju, abeegesebwa be baayongera kumukaguza ha kigambo eki. 11Uwe yabagambira ati: “Weena anyakubinga mukazi we, akaswera ondi, buli asiihaine; 12kandi n'omukazi anyakwahukana na iba, akaswerwa ondi, buli nawe asiihaine.” 13Abantu bakamuleetera abaana, abakwateho; baitu abeegesebwa be baacoomera ababaleesire. 14Yesu obu yarozire eki yabiihirwa, kandi yabagambira ati: “Muleke abaana baije nambere ndi, mutabatanga habwokuba abali nk'abo, obukama bw'omu iguru bwabo. 15Mazimakwo nimbagambira nti: Omuntu weena ataikiriza bukama bwa Ruhanga nk'omwana, talibutaahamu.” 16Yabakiikira, yabaha omugisa, abataireho emikono ye. 17Yesu obu akaba naimukya orugendo, haija omusigazi nairuka, yateeza amaju omu maiso ge, yamukaguza ati: “Mwegesa omurungi, nsemeriire kukora ki okugwetwa omu bwomeezi obutahwaho?” 18Yesu nawe yamukaguza ati: “Habwaki nonyeta murungi? Busaho murungi kwihaho Ruhanga wenka. 19Ebiragiro bya Ruhanga obimanyire. Otaliita. Otalisiihana. Otaliiba. Otalihangirra. Otaligobya. Otiinege sso na nyoko.” 20Nandiki oli ati: “Mwegesa, ebi byona nkabikwata okuruga omu buto bwange.” 21Yesu nukwo kumurolerra, yamugonza, yamugambira ati: “Nooburwaho ekintu kimu; genda otunde ebi oinabyo, sente eziraarugamu ozigabire abanaku, nubwo olitunga itungo omu iguru; nukwo oije onkuraatire.” 22Omusigazi obu yahuliire ekigambo eki, yagwerwa, yagenda aina obujune, habwokuba akaba aina itungo lingi. 23Yesu nukwo kubabungyamu amaiso, yagambira abeegesebwa be ati: “Ka nikiremeera abaguuda kutaaha omu bukama bwa Ruhanga!” 24Abeegesebwa be baahunirra habw'ebigambo bye. Baitu Yesu yayongera kubasoborra ati: “Baana inywe, ka nikiremeera abarukwesiga itungo okutaaha omu bukama bwa Ruhanga! 25Nikirahuka engamiya kuraba omu nyindo y'enkinzo, okukira omuguuda kutaaha omu bukama bwa Ruhanga.” 26Bbo bakahunirra muno, baakaguzangana bati: “Mara nooha alisobora kujunwa?” 27Yesu nukwo kubarolerra yagamba ati: “Kinu abantu tibakisobora, baitu Ruhanga akisobora; habwokuba Ruhanga naasobora byona.” 28Nubwo Petero yamugambiire ati: “Dora itwe, tukaleka byona, twakuhondera.” 29Yesu yamugarukamu ati: “Mazimakwo nimbagambira nti: Busaho muntu n'omu ayasigire enju ye, rundi bagenzi be, rundi banyaanya, rundi nyina, rundi ise, rundi abaana be, rundi ebibanja bye habwange na habw'Amakuru Amarugni, 30atatunga emirundi kikumi omu kasumi kanu: amaju, bagenzi be, banyaanya, nyina, abaana n'ebibanja, nukwo oteho okuhiiganizibwa; kandi omu busumi oburukwija alitunga obwomeezi obutahwaho. 31Baitu baingi ab'okubanza baliba b'enyuma, kandi ab'enyuma baliba b'okubanza.” 32Obu bakaba bali omu muhanda nibagenda Yerusaalemu Yesu abeebembiire, abeegesebwa be baahunirra n'abandi abakaba bamuhondiire baatiina. Yagaruka yagarra ha rubaju ikumi na babiri, yatandika kubagambira ebirukwija kumubaho, 33naagamba ati: “Dora nitugenda Yerusaalemu; Omwana w'omuntu naija kuheebwayo hali ba nyakatagara abakuru n'abeegesa b'ebiragiro; balimucwera omusango gw'okufa, kandi balimuhayo hali Abanyamahanga; 34balimujuma, bamucwere amacwanta, bamuteere enkoba, bamwite; kandi obu halihinguraho ebiro bisatu alihumbuuka.” 35Yakobbo na Yohaana batabani ba Zebedaayo baamwirra haihi, baamugambira bati: “Mwegesa, nitugonza otukorre eki turaakusaba kyona.” 36Yabakaguza ati: “Nimugonza mbakorre ki?” 37Nandiki bbo bati: “Otwikirize omu akwikarre ha mukono gwawe ogw'obulyo n'ondi ha gw'emoso omu kitiinisa kyawe.” 38Baitu Yesu yabagambira ati: “Timurukumanya eki murukusaba. Nimusobora kubagana ha mabone aga ndukwija kubonabona rundi ha mulingo ogw'okufa ogu ndukwija kufamu?” 39Baamugarukamu bati: “Nitusobora.” Yesu yabagambira ati: “Ego, amabone aga ndukwija kubonabona na inywe muligabona, n'okufa, mulifa nkooku ndukwija kufa; 40baitu okwikarra ha mukono gwange ogw'obulyo rundi ha gw'emoso tali nyowe arukukugaba, baitu kw'abo abaakuteekaniriziibwe.” 41Abasigaireho ikumi, obu baahuliire eki, baabiihirirwa Yakobbo na Yohaana. 42Yesu nukwo kubeeta yabagambira ati: “Mumanyire abo abeetwa abalemi b'Abanyamahanga nkooku babalemesa itwale, n'abakuru baabo babatwaza obusobozi. 43Tikiriba kiti omuli inywe; baitu arukwenda kuba mukuru omuli inywe, abe muheereza wanyu, 44kandi arukwenda kuba w'okubanza, abe mwiru wa boona. 45Habwokuba Omwana w'omuntu nawe ataije kuheerezibwa, baitu okuheereza n'okuhayo obwomeezi bwe kucungura baingi.” 46Bakataaha Yeriko; kandi obu akaba naarugayo aina abeegesebwa be n'ekitebe ky'abantu baingi, baasanga Batimaayo, mutabani wa Timaayo, omusabiirizi omufu w'amaiso, aikaliire ha muhanda rubaju. 47Obu yahuliire ngu, ni Yesu owa Nazareeti, yatandika kutokera haiguru naagamba ati: “Yesu, Omwana wa Daudi, ongirre embabazi!” 48Baingi baamucoomera ngu, aculeere; baitu yakizaaho kutokera haiguru ati: “Omwana wa Daudi ongirre embabazi.” 49Yesu yayemerra, yagamba ati: “Mumwete, aije.” Baayeta omufu w'amaiso nibamugambira bati: “Huumura, imuka, naakweta.” 50Yanaga omwenagiro gwe, yamatuka, yahika hali Yesu. 51Yesu yamukaguza ati: “Nogonza nkukorre ki?” Nandiki omufu w'amaiso ati: “Mwegesa, ningonza ndole.” 52Yesu yamugambira ati: “Wegendere; okwikiriza kwawe kukukirize.” Ahonaaho yarora, yagenda na Yesu.

will be added

X\