LUKA 8

1Ebi obu byahoire, Yesu yagenda naaraba omu mbuga n'omu byaro naayegesa kandi naarangirra Amakuru Amarungi ag'obukama bwa Ruhanga. Ikumi na babiri bakagenda nawe, 2hamu n'abakazi abamu abakaba bakiziibwe emyoyo emibi n'endwara. Nubo banu: Mariya arukwetwa Magadaleena ayarugirweho emyoyo emibi musanju, 3na Yoana muka Kuuza omukeeto wa Herode, kandi Susaana n'abandi baingi abahaireyo ebyabo okubakoonyera. 4Abantu baingi obu baayesoroize Yesu nambere akaba ali, nibaruga omu mbuga ezitali zimu, yabaganikiza oruganikyo ati: 5“Omusigi akatura kusiga. Obu akaba naasiga, embibo ezimu zaagwa ha muhanda rubaju, abantu baazirubatirra, n'enyonyi zaazisoma. 6Ezindi zaagwa ha itaka erya ha mwandara, obu zaayarukire, zaahotoka habw'okuburwa amaizi. 7Embibo ezindi zaagwa omu mahwa; zaakura nago, gaazinyoroza. 8N'ezindi zaagwa omu itaaka erirungi, zaayaruka, zaakura, zaayana obujuma kikumi, kikumi.” Obu yamazire kugamba ebi, yakangura iraka naagamba ati: “Anyakwina amatu, ahurre!” 9Abeegesebwa be obu bamukagwize amakuru g'oruganikyo oru, 10Yesu yabagarukamu ati: “Inywe mukaheebwa okumanya ensita z'obukama bwa Ruhanga; baitu abandi bazigambirwa omu nganikyo, nukwo barole nk'abatarukurora, kandi bahurre nk'abatarukwetegereza.” 11Amakuru g'oruganikyo oru nganu: Embibo nikyo kigambo kya Ruhanga. 12Ezi ezaagwire ha muhanda rubaju nubo abo abahurra ekigambo; hanyuma omwohi aija, ekigambo akiiha omu mitima yabo, nukwo baleke kwikiriza bakajunwa. 13Kandi ezi ezaagwire ha mwandara nubo abo abahurra ekigambo bakakiikiriza n'okusemererwa; baitu tikihama omu mitima yabo. Baikiriza okumara akasumi kake, baitu omu kasumi k'okwohebwa bagwa. 14Kandi embibo ezaagwire omu mahwa nubo abo abahurra ekigambo, baitu obu bagenda, banyorozibwa emitalibano, obuguuda, n'okusemerererwa eby'obwomeezi bunu; kandi ebikorwa byabo ebirungi tibyeyongera. 15Embibo ezaagwire omu itaka erirungi nubo abo abahurra ekigambo bakakikwata n'omutima gumu, kandi bakora ekikorwa ebirungi nibagumiisiriza. 16“Busaho anyakuhemba etaara, akagijuumikira ekigega, rundi akagita omu madaara g'ekitabu; baitu agihanika ha kikondo kyayo, nukwo emulikire abarukutaaha omu nju. 17Habwokuba busaho ekiserekerwe ekitalyolekwa, noobu kyakuba eky'ensita ekitalimanywa kandi kikazooka burole. 18Nahabweki mwetegereze ebi murukuhurra, kabwokuba anyakwina bingi nuwe alyongerwaho, baitu anyakwina ebike n'ebi ainabyo birimwihwaho.” 19Nyina Yesu n'abagenzi be bakaija nibamuserra, baitu batasobole kumuhika haihi habw'obwingi bw'abantu. 20Nukwo kumutumaho bati: “Nyoko n'abagenzi baawe beemeriire aheeru nibagonza kukurora.” 21Baitu uwe yabagarukamu ati: “Mau n'abagenzi bange nubo abo abahurra ekigambo kya Ruhanga bakakihikiriza.” 22Kiro kimu Yesu akatemba omu bwato hamu n'abeegesebwa be, yabagambira ati: “Ka twambuke nseeri y'enyanja.” Aho baimukya. 23Obu bakaba nibakyagenda, Yesu yagwijagira. Haateera ihunga lingi ha nyanja, obwato bwatandika kwijura amaizi, boona baaba omu kabi. 24Abeegesebwa baija hali Yesu baamusisiimura bati: “Mwegesa, Mwegesa, twafa!” Yesu yasisiimuka, yacoomera ihunga n'ebigonzi eby'amaani; byaculeera, haabaho okuteekaana. 25Nubwo yakagwize abeegesebwa be ati: “Okwikiriza kwanyu kuraha?” Baahunirra kandi baatiina nibagambirangana bati: “Mara onu muntu ki arukuragira ihunga n'ebigonzi, bikamuhurra?” 26Obu baayambukire, baahika omunsi y'Abageraseene enyakuroleriire Galiraaya. 27Yesu obu akaba nakyahika ha bwerre, akaizirwa omusaija arugire omu rubuga oru, akaba akwasirwe emyoyo emibi. Akaba amazire obusumi bwingi ataina eki arukujwara. Tiyaraaraga omunju, baitu yaikaraga omu bituuro. 28Obu yarozire Yesu, yatokera haiguru, yagwa omumaiso ge, naagamba n'iraka likooto ati: “Yesu Omwana wa Ruhanga owa haiguru muno, nontura ki? Nkwesengeriize, otancanza!” 29Ekyamugambisize kiti, habwokuba Yesu akaba aragiire omwoyo omubi okumurugaho. (Gwamukwataga emirundi nyingi, nikyo baamulindiraga aboherwe n'enjegere emikono n'amaguru, baitu yazicwaga kandi omwoyo mubi gwamuhambaaliza omwirungu.) 30Aho Yesu yamukaguza ati: “Ibara lyawe niiwe oha?” Yagarukamu ati: “Ninyowe Ihe”, habwokuba emyoyo emibi nyingi ekaba emurumu. 31Emyoyo egi yayesengereza Yesu aleke kugiborogosa okuzimu owa Nyabuyonga. 32Haihi aho ha rubaju rw'orusozi, hakaba haroho igana ly'empunu nirya. Emyoyo egi yasaba Yesu agiikirize etaahe omu mpunu ezi Yagiikiriza. 33Nubwo emyoyo emibi yarugire omu muntu ogu, yataaha omu mpunu, igana lyona lyajumbutuka, lyakonkomoka enengo y'orusozi, zaagwa omu nyanja, zaahwerekerra. 34Abaaliisaaga empunu ezi obu baarozire ebibaireho, bairuka baararangya amakuru omu rubuga n'omu byaro. 35Nukwo abantu kugenda kurora ekibaireho. Obu baahikire hali Yesu, baasanga omusaija ayarugirweho emyoyo emibi aikaliire ha bigere bye, ajwaire, kandi ateekaine. Boona baatiina. 36Kandi abo abaarozire ekintu eki, baabamanyisa omusaija ow'akaba akwasirwe emyoyo emibi nkooku yakiziibwe. 37Nukwo Abageraseene boona kusaba Yesu abarugemu agende, habwokuba bakaba nibatiina muno. Nubwo Yesu yatembere omu bwato yagaruka nambere yarugire. 38Obu akaba atakagenzire, omusaija oli ayarugirwemu emyoyo emibi yamwesengereza amwikirize kugenda nawe. Baitu Yesu yamuraga naagamba ati: 39“Garukayo, ogambire ab'omu ka yaawe ebikuru Ruhanga ebi akukoliire.” Omusaija yagenda naarangaaniza omu rubuga rwona byona Yesu ebi amukoliire. 40Yesu obu yagarukireyo, ekitebe ky'abantu kyamutangirra, habwokuba boona bakaba bamutegeriize. 41Nubwo haizire omusaija, ibara lye Yairo, ow'akaba ali mukuru w'isorrokaniro. Yagwa ha bigere bya Yesu, naamwesengereza ahike omu nju ye, 42habwokuba akaba aina muhara we omu wenka ow'emyaka ikumi n'ebiri, ow'akaba ali haihi n'okufa. Yesu obu akaba naagenda, abantu baingi baamwehinguliriza nibamufunza. 43Hakaba haroho omukazi ow'akaba arwaire akeejwiso okumara emyaka ikumi n'ebiri, ebintu bye byona akaba abimaliize omu bafumu, baitu busaho n'omu ayasoboire kumutambira. 44Omukazi ogu akaleetwa enyuma ya Yesu, yakwata ha mukugiro gw'ekijwaro kye, ahonaaho akeejwiso ke kaakira. 45Nukwo Yesu kukaguza ati: “Nooha ankwasireho?” Boona obu baayehakaine, nubwo Petero yamugambiire ati: “Mwegesa, abantu boona bakwehinguliriize nibakufunza.” 46Baitu Yesu yagamba ati: “Haroho ankwasireho, habwokuba mpuliire amaani gandugamu.” 47Omukazi obu yarozire Yesu nkooku yamwetegeriize, yarugayo naatukumira, yajuumara omumaiso ge. Yasoborra hagati y'abantu boona eki yamukwatiireho, kandi nkooku akiziibwe ahonaaho. 48Nubwo Yesu yamugambira ati: “Mwana wange, okwikiriza kwawe nukwo kwakukiza, wegendere n'obusinge.” 49Yesu obu akaba naakyabaza, haija omuntu arugire mb'omukuru w'isorrokaniro, yamubikira ati: “Muhara waawe afiire, otongera kujwahya Omwegesa.” 50Baitu Yesu nawe yakihurra, nukwo kugambira Yairo ati: “Otatiina, ikiriza kwonka, omwana waawe araakira.” 51Kandi obu yahikire omunju, ataikirize muntu weena kutaahamu nawe, kwihaho Petero, Yohaana na Yakobbo, hamu na ise omwana na nyina. 52Abantu boona bakaba nibarra kandi nibateera empamo habw'omwana. Yesu yagamba ati: “Muleke kurra, omwana tafiire, baitu agwijagiire.” 53Abantu baamusekeereza, habw'okumanya nkooku afirekwo. 54Baitu Yesu yamukwata ha mukono, yamweta ati: “Mwisiki iwe, imuka!” 55Obwomeezi bwamugarukamu, ahonaaho yaimuka; Yesu yaragira bamuhe akookulya. 56Abazaire be baatangaara muno, baitu Yesu yabateererra okutagambiraho muntu weena ebibaireho.

will be added

X\