LUKA 6

1Yesu akaba naaraba omu misiri y'engano ha Sabbato; abeegesebwa be baacwa entwe z'engano, baazijungirra, baalya. 2Nukwo Abafalisaayo abamu kubakaguza bati: “Kiki ekirukubakoza ekitaikirizibwa ha Sabbato?” 3Yesu yabagarukamu ati: “Timukasomaga Daudi eki yakozire obu yarumirwe enjara, hamu n'abo aba akaba ainabo? 4Nkooku yataahire omu Nju ya Ruhanga, yaihamu emigaati enyakuhongerwe, yagirya kandi yaha n'aba akaba ainabo?” Niyo emigaati etaraikirizibwaga kuliibwa muntu ondi, kwihaho abanyakatagara bonka. 5Nubwo yabagambiire ati: “Omwana w'omuntu nuwe MUKAMA wa Sabbato.” 6Ha Sabbato endi, Yesu obu yataahire omu isorrokaniro kwegesa, hakaba harumu omusaija akabire omukono ogw'obulyo. 7Abeegesa b'ebiragiro n'Abafalisaayo nukwo kuhanga Yesu amaiso, barole obu arakiza omuntu ha Sabbato, nukwo babone h'okumunyegererra. 8Baitu Yesu yamanya ebiteekerezo byabo, nukwo kugambira omusaija anyakukabire omukono ati: “Ija oyemerre hanu.” Omusaija yaimuka, yayemerraho. 9Nubwo Yesu yabagambiire ati: “Kambakaguze kinu: Ha kiro kya Sabbato, Ebiragiro byaitu bitwikiriza kukora ebirungi rundi kukora ebibi? Kujuna obwomeezi rundi kubuhwerekereza?” 10Boona yababungyamu amaiso, nubwo yagambiire omusaija ogu ati: “Gorra omukono gwawe.” Yagugorra, omukono gwe gwakira. 11Baitu bbo baakwatwa ekiniga, baatandika kuhanuura bonka na bonka eki baraakora Yesu. 12Omu biro ebi Yesu akagenda ha nsozi kusaba, yakiisa obwire naasaba Ruhanga. 13Obwire obu bwakiire, yayeta abeegesebwa be, yakomamu ikumi na babiri, yabeeta abakwenda. Nubo banu: 14Simooni ou yarukire Petero, na mugenzi we Andereya, Yakobbo na Yohaana, Filipo na Batolomayo, 15Matayo na Tomasi, Yakobbo mutabani w'Alifaayo na Simooni ayayetwaga omurwanirizi w'ihanga lye, 16Yuda mutabani wa Yakobbo na Yuda Isikalyota ayamugobiize. 17Yesu yasirimuka nabo, yayemerra omu kyeya nambere yasangire ekitebe kingi ky'abeegesebwa be, n'abantu baingi abakaba barugire Buyudaaya yoona na Yerusaalemu, n'abaarugire omu mbuga Tiiro na Sidooni eziheriire enyanja. Bantu abaaizire kumuhuliriza n'okukizibwa endwara zaabo. 18Abaatalibanizibwaga emyoyo emibi nabo bakakizibwa. 19Abantu boona baaserraga kumukwataho, habwokuba amaani gaamurugamuga gabakiza boona. 20Yesu akahindukira abeegesebwa be, yagamba ati: “Mwina omugisa inywe abanaku, habwokuba obukama bwa Ruhanga bwanyu, 21Mwina omugisa inywe abarukurumwa enjara hati, habwokuba muliiguta. Mwina omugisa inywe abarukurra hati, habwokuba muliseka. 22Muliba b'omugisa inywe abantu obu baraabanoba, bakababinga mu masorrokaniro, bakabajuma, kandi bakabeeta babi nibabatura Omwana w'omuntu! 23Musemererwe ha kiro eki, kandi muguruke habw'omuhimbo, habwokuba empeera yanyu nyingi omwiguru. Ningira baisenkurubo nukwo baakozire bati abarangi. 24Baitu mulikibona inywe abaguuda, habwokuba okusemererwa kwanyu mumazire kukutunga. 25Mulikibona inywe abarukwiguta hati, habwokuba mulirumwa enjara. Mulikibona inywe abarukuseka hati, habwokuba muliganya kandi mulirra. 26Mulikibona inywe, abantu boona obu baraababazaho kurungi, habwokuba na baisenkurubo nukwo baakozire bati abarangi ab'ebisuba.” 27Baitu nimbagambira inywe abarukumpuliriza nti: Mugonzeege abanyanzigwa banyu, mukole kurungi abanyakubanoba, 28mugondeze omugisa abanyakubakyena, kandi musabire abanyakubajuma. 29Omuntu obu araakuteera oruhi ha rusaya orumu, omuhindurre n'orundi. Omuntu obu araatwara ekooti yaawe, otamwima n'esaati. 30Weena araakusaba omuhe, n'araatwara ekyawe otalikimugaruza. 31Eki mwenda abantu babakorre, na inywe nikyo mubakorrege. 32“Obu muraaba nimugonza abanyakubagonza, muraasiimirwa kiraha? Nangwa n'abasiisi nabo baagonza abanyakubagonza. 33Obu muraaba nimukora kurungi abanyakubakora kurungi, muraasiimirwa kiraha? Nangwa n'abasiisi nabo nukwo baakora. 34Obu muraaba nimwohoza abo aba murukunihira kubasasura, muraasiimirwa kiraha? Abasiisi nabo boohoza bataahi baabo, nibagumya ngu, baraasasurwa omuhendo gwona. 35Baitu inywe mugonzeege abanyanzigwa banyu, mubakorre ebirungi, kandi mwohoze mutarukunihira kusasurwa kantu; nubwo mulitunga empeera nkooto, kandi muliba baana b'Ogu Anyakuli haiguru muno; habwokuba agirra embabazi abantu entasiima n'enkozi z'ebibi. 36Mubege b'embabazi nka Isiinywe oku ali w'embabazi.” 37“Mutalicwa emisango, na inywe timuligicwerwa; mutalihenderra, na inywe timulihendererwa; muganyire, na inywe muliganyirwa. 38Mugabe, na inywe muliheebwa. Endengo nungi, ehikire, erukumwaga niyo muliheebwa. Endengo ei mulengesa, na inywe niyo mulirengerwamu.” 39Yesu akabacwera orufumo runu ati: “Omufu w'amaiso asobora kunanata omufu w'amaiso mutaahi we? Bombi tibaligwa omu kiina? 40Omwegesebwa takira omwegesa we; baitu omwegesebwa weena obu amara kutendekwa kurungi, aba nk'omwegesa we. 41Habwaki noorora akahoiga akali omu liiso lya mugenzi waawe, otarukurora empinju enyakuli omu liiso lyawe? 42Rundi noosobora ota kugambira mugenzi wawe oti: Mugenzi wange kankutokoole akahoiga akakuli omu liiso; kandi kunu torukurora empinju enyakuli omu lyawe? Ngobya iwe, banza oihe empinju omu liiso lyawe osobole kuhweza n'okutokoora mugenzi waawe akahoiga akamuli omu liiso.” 43“Tiharoho muti omurungi ogwana ebijuma bibi, rundi omuti omubi ogwana ebijuma birungi. 44Buli muti gumanyirwa ha bijuma byagwo; habwokuba ha mwera-maino tibanogaho bijuma by'omukunyu, kandi ha makerre tibanogaho mizaabbibbu. 45Omuntu omurungi aiha ha birungi ebi agira omu mutima gwe; n'omuntu omubi aiha ha bibi ebi agira omu mutima gwe; habwokuba ebisaaga omu mutima nibyo akanwa kagamba.” 46“Munyetera ki: ‘MUKAMA wange, MUKAMA wange’, kunu mutarukukora ebi mbagambira? 47Omuntu weena anyakwija hali nyowe, akahuliriza ebi ndukugamba nabihikiriza, kambooleke nkooku arukusisana. 48Naasisana nk'omuntu arukwombeka. Akalima omusingi, gwahama, enju ye yagyombeka ha mwandara. Ekisaaru obu kyaboogere, empaya y'amaizi yateera enju egi; baitu etasobole kugitengesa, habwokuba ekaba eyombekerwe kurungi. 49Kandi weena obu ahurra ebi ndukugamba, atarukubihikiriza, naasisana nk'omuntu ayayombekere enju ye ha itaka kwonka, atalimire musingi. Enjura obu yagwire ekisaaru kyabooga, empaya y'amaizi yateera enju egi, ahonaaho yasingooka, n'okusingooka kwayo kwali kw'amaani.”

will be added

X\