LUKA 5

1Yesu obu akaba ayemeriire ha musa gw'enyanja ya Genesareeti, abantu bakaba nibasindikangana bamwirre haihi, nukwo bahurre ekigambo kya Ruhanga. 2Yarora amaato abiri gali ha musa gw'enyanja; baitu abasohi bakaba bagarugiremu niboogya obutimba bwabo. 3Yataaha omu bwato obumu obwa Simooni, yamusaba abwirizeeyo kake, abwihe ha musa. Yayegesa abantu aikaliire omu bwato. 4Obu yamazire kwegesa, yagambira Simooni ati: “Irizaayo obwato omu nziha, munagemu obutimba bwanyu, nukwo mukwase.” 5Simooni yamugarukamu ati: “Mwegesa, tutalibaine okukiisa obwire, titukwasize kantu! Baitu habw'ekigambo kyawe kantege obutimba.” 6Baatega obutimba, baakwasa encu nyingi muno, n'obutimba bwatandika kutemuka. 7Baasima bataahi baabo abakaba bali omu bwato obundi, baije babakonyere. Baija, baijuza amaato gombi, kake konka gadikire. 8Simooni Petero obu yarozire eki, yajuumara ha bigere bya Yesu naagamba ati: “Ndeka MUKAMA wange, habwokuba ndi musiisi!” 9Uwe na boona aba akaba ainabo bakahunirra habw'encu nyingi ezi baakwasize. 10Yakobbo na Yohaana, batabani ba Zebedaayo abaakoraga na Simooni, nabo nukwo baahuniriire bati. Yesu nukwo kugambira Simooni ati: “Otatiina, okuruga hati oraasohaga abantu.” 11Baasika amaato, baagagarra ha musa, baasiga byona, baamukuratira. 12Yesu obu akaba ali omu rubuga orumu, hakaija omusaija agengere weena. Obu yarozire Yesu, yajuumara omumaiso ge, namwesengereza ati: “MUKAMA wange, obu oraaba noogonza, noosobora kunkiza.” 13Yesu yagorra omukono gwe, yamukwataho, naagamba ati: “Ego ningonza, kira!” Ahonaaho ebigenge byamurugaho. 14Yesu yamuteererra okutagambiraho muntu weena, baitu yamugira ati: “Genda oyeyoleke nyakatagara, kandi oheyo ekihongwa Musa eki yaragiire bube bwakaiso hali abantu nkooku okiziibwe.” 15Okurangaanwa kwa Yesu kukagenda nikweyongera hoona hoona, n'ebitebe by'abantu baingi bakeesorooza kumuhurra n'okukizibwa endwara zaabo. 16Baitu Yesu obundi n'obundi yabasigahoga, agenda omu irungu kusaba. 17Kiro kimu Yesu obu akaba naayegesa, omu kitebe ky'abantu hakaba harumu Abafalisaayo n'abeegesa b'ebiragiro abakaba barugire omu byaro byona ebya Galiraaya, Buyudaaya, na Yerusaalemu. Yesu akaba aina obusobozi bwa MUKAMA obw'okukiza abarwaire. 18Aho nubwo haizireho abasaija bahimbiire ha katabu omuntu anyakuzingamire. Baalengaho kumutaahya omunju bamute omumaiso ga Yesu. 19Baitu obu baalemerwe h'okumurabya habw'obwingi bw'abantu, baamutembya ha rusu rw'enju, baasakurra amategura, baafumura ekihuru, baamusirimurra ha katabu ke, baamuhikya hagati y'abantu omumaiso ga Yesu. 20Obu yarozire okwikiriza kwabu, yagamba ati: “Muntu iwe, ebibi byawe bikuganyirwe.” 21Abeegesa b'ebiragiro n'Abafalisaayo baatandika kukaguzangana bati: “Onu muntu ki arukujuma Ruhanga? Nooha asobora kuganyira ebibi atali Ruhanga wenka?” 22Yesu obu yamanyire ebiteekerezo byabo, yabagambira ati: “Nimwekaguliza ki omu mitima yanyu? 23Ekirukukira kurahuka nikiha? Okugamba nti: ‘Ebibi byawe bikunganyirwe,’ rundi kugamba nti: ‘Imuka ogende.’ 24Hati kamboleke Omwana w'omuntu nkooku aina obusobozi omunsi obw'okuganyira ebibi.” Nubwo yagambiire anyakuzingamire ati: “Ninkuragira: Imuka, himba akatabu kaawe, otaahe!” 25Ahonaaho omusaija yamatuka, boona nibarora, yahimba akatabu aka akaba abyamireho, yataaha owaabu naakugiza Ruhanga. 26Boona baahunirra, baakugiza Ruhanga nibagamba bati: “Ka turozire ebyamahano kiro kinu!” 27Eki obu kyahoire, Yesu yaturuka aheeru, yarora omusooroza w'omusoro arukwetwa Leevi, aikaliire omu isoroolezo ly'omusoro; yamugambira ati: “Mpondera.” 28Uwe yaimuka, yasiga byona yamuhondera. 29Leevi ogu yacumbira Yesu obugenyi bwingi omunju ye, kandi ha bugenyi obu, hakaba haroho ekitebe kingi eky'abasorooza b'omusoro, n'abantu abandi abaikaliire nabo nibalya. 30Baitu Abafalisaayo abamu n'abeegesa b'ebiragiro ab'omu kitebe kyabu bakahyemera abeegesebwa ba Yesu nibagamba bati: “Kiki ekirukubaliisa kandi ekirukubanywisa n'abasooroza b'omusoro n'abasiisi?” 31Kandi Yesu yabagarukamu ati: “Aboomeezi tibeetaaga mufumu, baitu ayetaagwa abarwaire. 32Nyowe ntaizirre kweta abahikiriire, baitu nkaizirra abasiisi, beegarukemu.” 33Abantu bakakaguza Yesu bati: “Habwaki abeegesebwa ba Yohaana basiiba emirundi nyingi kandi basaba, n'abeegesebwa b'Abafalisaayo nabo nukwo bakora; kandi kunu abaawe baikara nibalya kandi nibanywa?” 34Yesu yabagarukamu ati: “Nimusobora kusiibya abagenyi enjara, kunu na kigabura ali nabo? 35Baitu akasumi kalihika kigabura obu alibaihwaho; obu nubwo balitandika kusiiba.” 36Kandi Yesu yabacwera enfumo zinu ati: “Busaho ataagura ekikoba eky'orugoye ruhyaka akakibazira ha rukuru; kakuba akora ati, aba asiisire oruhyaka, kandi n'ekikoba kitemura orugoye orukuru. 37“Kandi busaho anyakuta eviini ey'ehiira omu ndyanga enkuru. Kakuba akora ati, eviini ey'ehiira ebbarura endyanga, eviini eseeseka, n'endyanga esiisikara. 38Baitu eviini empyaka bagita omu ndyanga empyaka. 39Kandi busaho muntu agonza eviini ey'ehiira amazire kunywaho enkuru; baitu agamba ati: ‘Enkuru niyo nungi.’ ”

will be added

X\