LUKA 3

1Omu mwaka gwa ikumi n'etaano ogw'obulemi bwa Tiberiyo Kaisaali, Ponsiyo Pilaato obu akaba ali mulemi mukuru wa Buyudaaya, Herode ali w'isaza lya Galiraaya, na Filipo mugenzi we ali w'isaza ly'ekicweka kikooto kya Ituraaya na Turakoni, na Lisaniya ali w'isaza lya Abileene, 2kandi Annasi na Kaayafa bali bakuru ba banyakatagara, nubwo ekigambo kya Ruhanga kyaiziire Yohaana, omwana wa Zakaliya ali omwirungu. 3Aho Yohaana yagenda omu bicweka byona ebiheriire ekisaaru Yorudaani, naarangirra abantu beegarukemu, babatizibwe, nukwo baganyirwe ebibi. 4Nkooku kyahandiirirwe omu kitabu ky'omurangi Isaaya kiti: “Nuwe ogu arukwamirra omwirungu ati: Muteekanirize MUKAMA omuhanda, mutereekereze obuhanda bwe. 5Ebihanga byona biijuzibwe, orusozi rwona n'emigongo yoona bingangainganizibwe. Emihanda eramaire etereekerezibwe, n'obuhanda obubi busemezibwe; 6nukwo abantu boona barole okujuna kwa Ruhanga.” 7Abantu baingi bakaija hali Yohaana okubatizibwa. Nukwo uwe kubagambira ati: “Inywe baana b'encwera! Nooha ayabahabwire kwiruka ekifubiro ekirukwija? 8Mukole ebikorwa ebirukwoleka nkooku mwegarukiremu. Muleke kwesigura muti: ‘Twina Abburahamu isenkuru itwe.’ Nimbagambira nti: Amabaale ganu Ruhanga asobora kugaihiramu Abburahamu abaijukuru. 9Nangwa na hati endemu etairwe ha bikoro by'emiti. Nahabweki omuti gwona ogutarukwana ebijuma ebirungi nigwija kutemwa, gunagwe omu murro.” 10Nubwo abantu baamukagwize bati: “Hati itwe tukole ki?” 11Uwe yabagarukamu ati: “Anyakwina esaati ibiri, aheho ataina; n'anyakwina ebyokulya, nawe nukwo akole ati.” 12Abasorooza b'omusoro abaizire kubatizibwa nabo baamukaguza bati: “Mwegesa, tukole ki?” 13Yabagarukamu ati: “Mutalisorooza okuhinguraniza hali ebi muragiirwe.” 14Abaserikale nabo baamukaguza bati: “Kandi itwe, tukole ki?” Yabagarukamu ati: “Mutalinyaga muntu weena ebintu bye, noobu kwakuba kumutiinisiriza; kandi omusaara gwanyu gubamalege.” 15Okunihira kw'abantu kukeeyongera, baatandika kuteekereza ngu, Yohaana yaakuba Kristo. 16Yohaana yagambira boona ati: “Nyowe nimbabatiza n'amaizi; baitu arukunkiza obusobozi naija, kandi tinsemeriire n'okusumurra orukoba rw'enkaito ze. Uwe alibabatiza na Mwoyo Ahikiriire n'omurro. 17Akwasire orugali rwe kuhehemukya, naija kusingorra orubuga rwe nukwo ahunike oburo omu nguli, kandi ebisunga abyokye omu murro ogutaraara.” 18Haroho n'ebindi bingi Yohaana ebi yateereriire abantu obu yabaga nabarangirra Amakuru Amarungi. 19Kandi akahana Herode ow'isaza habw'okuhambura Herodiya muka mugenzi we, na habw'ebibi ebindi ebi akaba akozire. 20Nubwo Herode yayongera yakora ekibi ekindi, nikyo eky'okukwata Yohaana omu nkomo. 21Abantu boona obu baamazire kubatizibwa, Yesu nawe yabatizibwa kandi akyali aho naasaba, iguru lyakinguka, 22Mwoyo Ahikiriire yamusirimukaho ali omu kisisani ky'eriba, n'iraka lyaruga omu iguru nirigamba liti. “Niiwe mwana wange omugonzibwa, ou nsiima muno.” 23Yesu ha yatandikire emirimo ye, akaba aina emyaka nka makumi asatu ey'obukuru. Kandi abantu baateekerezaaga ngu: akaba ali mwana wa Yosefu, mutabani wa Heeli, 24Heeli mutabani wa Mataati, Mataati mutabani wa Leevi, Leevi mutabani wa Meleki, Meleki mutabani wa Yanai, Yanai mutabani wa Yosefu, 25Yosefu mutabani wa Matatiya, Matatiya mutabani wa Amosi, Amosi mutabani wa Nahumu, Nahumu mutabani wa Esiri, Esiri mutabani wa Nagai, 26Nagai mutabani wa Maati, Maati mutabani wa Matatiya, Matatiya mutabani wa Semeyi, Semeyi mutabani wa Yoseki, Yoseki mutabani wa Yooda, 27Yooda mutabani wa Yohanani mutabani wa Rehesa, Rehesa mutabani wa Zerubabeeri, Zerubabeeri mutabani wa Seyahtyeri, Seyahtyeri mutabani wa Neeri, Neeri mutabani wa Meleki, 28Meleki mutabani wa Adi, Adi mutabani wa Kosamu, Kosamu mutabani wa Erimoodamu, Erimoodamu mutabani wa Eri, 29Eri mutabani wa Yoswa, Yoswa mutabani wa Eryezeeri, Eryezeeri mutabani wa Yolimu, Yolimu mutabani wa Mataati, Mataati mutabani wa Leevi, 30Leevi mutabani wa Simyoni, Simyoni mutabani wa Yuda, Yuda mutabani wa Yosefu, Yosefu mutabani wa Yonamu, Yonamu mutabani wa Eriyakimu, 31Eriyakimu mutabani wa Melea, Melea mutabani wa Mena, Mena mutabani wa Matata, Matata mutabani wa Nasani, Nasani mutabani wa Daudi, 32Daudi mutabani wa Yese, Yese mutabani wa Obedi, Obedi mutabani wa Bowazi, Bowazi mutabani wa Sala, Sala mutabani wa Nahasooni, 33Nahasooni mutabani wa Aminadabbu, Aminadabbu mutabani wa Adimini, Adimini mutabani wa Aram, Aram mutabani wa Hezirooni, Hezirooni mutabani wa Perezi, Perezi mutabani wa Yuda, 34Yuda mutabani wa Yakobbo, Yakobbo mutabani wa Isaaka, Isaaka mutabani wa Abburahamu, Abburahamu mutabani wa Teera, Teera mutabani wa Nahora, 35Nahora mutabani wa Serugi, Serugi mutabani wa Lehu, Lehu mutabani wa Peregi, Peregi mutabani wa Eberi, Eberi mutabani wa Seela, Seela mutabani wa Kainaani, 36Kainaani mutabani wa Arafakisadi, Arafakisadi mutabani wa Sheemu, Sheemu mutabani wa Noha, Noha mutabani wa Lameki, 37Lameki mutabani wa Metuseera mutabani wa Enoka, Enoka mutabani wa Yaledi, Yaledi mutabani wa Maharaleeli mutabani wa Kainani, 38Kainani mutabani wa Enosi, Enosi mutabani wa Seesi, Seesi mutabani wa Adamu, Adamu mutabani wa Ruhanga.

will be added

X\