LUKA 23

1Nubwo ekitebe kyona eky'abantu kyaimukire, baatwara Yesu omumaiso ga Pilaato. 2Baatandika kumunyegerra nibagamba bati: “Omuntu onu tumusangire naajemesa ihanga lyaitu, naatanga abantu kuha Kaisaali omusoro, kandi naayeyeta Kristo Omukama.” 3Pilaato yamukaguza ati: “Niiwe Omukama w'Abayudaaya?” Yesu yagarukamu ati: “Nukwo ogambire.” 4Pilaato yagaruka yagambira banyakatagara abakuru n'ekitebe kyona ati: “Omuntu onu timmuzoireho musango naakake.” 5Baitu bbo baaterraho kimu amaani bati: “Naaleeta akajagarro omu bantu, akabandiza Galiraaya okuhika na hanu.” 6Pilaato obu yahuliire ebigambo ebi, yabakaguza omusaija ogu obu araaba ali Mugaliraaya. 7Obu yamanyire Yesu nkooku ali w'omu isaza lya Herode, yamumusindikira, habwokuba omu kasumi ako Herode nawe akaba ali omu Yerusaalemu. 8Herode obu yarozire Yesu, yasemererwa muno. Akaba amazire omwanya naayegomba kumurora, habwokuba akaba amuhuliireho kandi yanihiraga kumurora naakora ekyokuhuniriza. 9Nikyo Herode yamaliire omwanya naamukaguza bingi; baitu Yesu atagarukemu kantu. 10Baanyakatagara abakuru n'abeegesa b'ebiragiro baayemerra aho, nibamunyegerra ebintu bingi! 11Herode n'abaserikale be baamwoleka emigayo nibamusekeereza. Herode yamujweka omwenagiro gw'ekitiinisa, yamugarra hali Pilaato. 12Ha kiro eki kyonyini Herode na Pilato nubwo baganjaine, habwokuba kara koona bakaba banobangaine. 13Ebi obu byahoire, Pilaato yasorooza hamu banyakatagara abakuru, abalemi b'Abayudaaya n'abantu abandi, 14yabagambira ati: “Mwandeetera omuntu onu nimugamba ngu, naajemesa abantu. Hati nyowe obu mmukagwize omu amaiso ganyu, timmuzoireho musango na gumu hali ebi byona ebi murukumujunaana. 15Nangwa noobwakuba Herode tamuzoireho musango, nikyo amugaruliire hali itwe. Taina kintu kyona eki yakozire ekirukusemerra kumwisa. 16Nahabweki ndaragira bamuteere enkoba, nukwo mmulekere agende.” [ 17Eki akakigamba habwokuba akaba naaragirwa kubalekerra omunyankomo omu ha kiro kikuru eki.] 18Nubwo boona baatokiire hamu bati: “Ogu mwiheho, otulekerre Baraaba!” 19Baraaba ogu akaba akwasirwe omu nkomo habw'okwemesa abantu ab'omu rubuga na habw'obwisi. 20Pilato, habw'okugonza kulekera Yesu, akongera yababaliza; 21baitu bbo baatoka bati: “Mubambe, mubambe ha musaraba!” 22Pilaato yabakaguza omurundi gwa kasatu ati: “Habwaki? Kibi ki eki akozire? Timmuzoireho musango gwona ogusemeriire kumwisa! Nahabweki ndaragira bamuteere enkoba, nukwo mmulekere agende.” 23Baitu baaterraho kimu amaani nibatokera haiguru, nibasaba ngu abambwe, kandi amaraka gaabo gaasingwire. 24Pilaato nukwo kucwa omusango ngu, eki basabire nikyo kikorwe. 25Yalekera omusaija ou bakomere, ogu ow'akaba akwasirwe omu nkomo habw'okwemesa abantu na habw'obwisi. Yahayo Yesu bamukole nkooku baagondeze. 26Obu bakaba nibatwara Yesu, bakakwata omusaija arukwetwa Simooni owa Kireene, ow'akaba naaruga omu kyaro; baamutweka omusaraba aguhimbe, akuraatire Yesu. 27Ekitebe kingi eky'abantu n'eky'abakazi abakaba nibarra, nibamuterra empamo, bakamuhondera. 28Yesu yahinduka yabagambira ati: “Inywe bahara ba Yerusaalemu muleke kundirirra, baitu mweririrre inywenka kandi mulirirre abaana banyu. 29Mumanye ebiro nibiija obu baligamba bati: ‘Baina omugisa abakazi engumba n'enda ezitakazaaraga, n'amabeere agatakonkyaga!’ 30Nubwo balitandika kutaagira ensozi bati: ‘Mutugwere!’ N'obusozi bati: ‘Mutuswekerre!’ 31Kinu obu baraaba nibakikora omuti gukyali mubisi, obu gulyoma balisura ki?” 32Abandi ababiri, enkozi z'ebibi, bakatwarwa kwitwa hamu na Yesu. 33Obu baahikire omu kiikaro ekirukwetwa: Oruhanga, oku nuho baamubambiire ha musaraba, hamu na bali babiri enkozi z'ebibi, omu ha rubaju rwe orw'obulyo, ondi ha rw'emoso. 34Nubwo Yesu yasabiire abaamubambire naagamba ati: “Taata, obaganyire habwokuba tibarukumanya eki barukukora.” Baabagana ebijwaro bye, nibabiterra itomo. 35Abantu bakeemerra aho nibasunga; n'abalemi baabo bakasekereza bati: “Akajuna abandi; obu araaba ali Kristo ayakomerwe Ruhanga, leka ayejune wenka!” 36Abaserikale nabo bakamusekereza, baija baamuha amarwa agasaaliire, 37nibagamba bati: “Obu oraaba oli omukama w'Abayudaaya, wejune wenka!” 38Eruguru ye ha musaraba hakaba haroho ekihandiiko ekirukugamba kiti: “Onu nuwe Omukama w'Abayudaaya.” 39Omu ha nkozi z'ebibi abaabambirwe nawe akamuhera ati: “Tiniiwe Kristo? Wejune, na itwe otujune!” 40Baitu mugenzi we yamuhana ati: “Torukutiina Ruhanga, kandi kunu ohairwe ekifubiro kimu nk'ekye? 41Itwe gutusingirekwo, kandi twaheebwa ekifubiro ekitusemeriire habw'ebibi ebi twakozire; baitu onu taina eki yasobeze.” 42Nubwo yagamba ati: “Yesu, onyijuke obu olihika omu bukama bwawe!” 43Yesu yamugarukamu ati: “Mali mali ninkugambira nti: Kiro kya hati oraaba na nyowe omu nsi ey'Okuhirwa.” 44Obu zikaba ziri saaha nka mukaaga, izooba lyaraara, omwirima gwasweka ensi egi yoona okuhika ha saaha mwenda. 45Enyigamo y'omunju ya Ruhanga yatemukamu habiri. 46Yesu yabaliza haiguru ati: “Taata, omwoyo gwange ngutaire omu mikono yawe!” Obu yamazire kugamba eki, yacwekana! 47Omukuru w'abaserikale, obu yarozire ebibaireho, yakugiza Ruhanga naagamba ati: “Mazimakwo omuntu onu abaire muntu ahikiriire!” 48Abantu boona abakaba beesoroliize aho kusunga, obu baarozire ebyabaireho, baagarukayo owaabubo nibahungya emitwe. 49Abamanyi ba Yesu n'abakazi abakaba bamuhondiire kuruga Galiraaya, bakeemerra haraho baarora ebi byona. 50Hakaba haroho omusaija, ibara lye Yosefu, omukurasi omu Rukurato Orukuru, ayarugire omu rubuga Arimateya orwa Buyudaaya; akaba ali musaija murungi kandi ahikiriire, 51ataikirranize n'ab'orukurato abandi ebi baategekere n'ebi baakozire. Uwe yaikaraga ategeriize obukama bwa Ruhanga. 52Omusaija ogu akagenda hali Pilaato, yamusaba omutumbi gwa Yesu. 53Hanyuma yaguhanuura ha musaraba, yaguzinga omu ngoye za bafuta ezirukwera, yaguta omu kituuro ekikaba kibaizirwe omu mwandara, ekitakaziikwamuga muntu. 54Ekiro eki kikaba kiri eky'Okweteekaniza kandi Sabbato ekaba eri haihi kutandika. 55Abakazi abakaba barugire Galiraaya hamu na Yesu, bakahondera Yosefu, baarora n'omutumbi gwa Yesu nkooku gwatairwemu. 56Baagarukayo omuka, baateekaniza ebirukuboya n'amagita agatabire, eby'okusiiga omutumbi. Ha kiro kya Sabbato bakahuumura ekiragiro nkooku kyaragiraga.

will be added

X\