LUKA 2

1Omu biro ebi, ekiragiro kikaruga hali Kaisaali Agusito ekirukuragira abantu ab'omunsi ye yoona beehandiikise, babarwe. 2Kunu nukwo kwabaire okwehandiikisa okw'okubanza, Kwirino obu akaba ali mulemi mukuru wa Siriya. 3Boona bakagenda kwehandiikisa, buli omu omu rubuga rw'owaabu. 4Yosefu nawe akaruga Nazareeti, orubuga rwa Galiraaya, yagenda Buyudaaya omu rubuga rwa Daudi orurukwetwa Betelehemu, habwokuba nawe akaba ali mwijukuru ow'ekitabu kya Daudi, 5nukwo nawe ayehandiikise hamu na Mariya ou akaba ajumbiire; kandi Mariya akaba aina enda. 6Obu bakaba bakyali Betelehemu, ebiro bye by'okuzaara byahika. 7Yazaara omwana, omuzigaijo ow'obwojo. Yamusweka omu bugoye, yamubyamya omu kyato ekiriirwamu ente, habw'okuburwa omwanya omu nju y'abagenyi. 8Omunsi egi hakaba harumu abaliisa abaikaraga omu bwerre nibalinda amagana gaabo ekiro. 9Malaika wa MUKAMA akababonekera, ekitiinisa kya MUKAMA kyamuliikana nikibeehinguliriza, baatiina muno. 10Malaika yabagambira ati: “Mutatiina, habwokuba mbaleetiire amakuru amarungi ag'omuhimbo mwingi oguraakwata abantu boona. 11Kiro kinu omu rubuga rwa Daudi, habazaliirwe Omujuni, nuwe Kristo MUKAMA. 12Kanu nuko karorwaho aka muraamumanyiraho: Nimwija kusanga omwana enkerembe aswekerwe omu bugoye, abyamire omu kyato ekiriirwamu ente.” 13Ahonaaho ihe lingi ery'abamalaika ab'omu iguru bakaija baateerana hamu na malaika ogu, baakugiza Ruhanga nibazina bati: 14“Ekitiinisa kibe hali Ruhanga omu iguru, n'obusinge bube omunsi ha bantu Ruhanga aba arukusiima!” 15Bamalaika obu baabarugireho, bagarukire omwiguru, abaliisa nukwo kugambirangana bati: “Katugende Betelehemu, turole ekibaireho MUKAMA eki atumanyisize.” 16Baagenda nibarahuka, baasanga Mariya na Yosefu n'omwana w'enkerembe abyamire omu kyato ekiriirwamu ente. 17Obu baamurozire, baasubirra byona malaika ebi yabagambiire ha mwana ogu; 18kandi boona abaabihuliire bakahunirizibwa ebi abaliisa baabagambiire. 19Baitu Mariya, ebintu ebi byona akabita ha mutima gwe, yaikara naabiteekerezaaho. 20Abaliisa bakagarukayo nibahaisaniza kandi nibakugiza Ruhanga habwa byona ebi baahuliire n'ebi baarozire. Bikaba birikwo nkooku baabigambiirwe. 21Ekiro kya munaana obu kyahikire, omwana akasarwa, baamuruka ibara Yesu. Niryo malaika yamwesire atakatondekere omu nda. 22Akasumi obu kaahikire okukora omukoro gw'okwezibwa kwabo, Ebiragiro bya Musa nkooku byaragiraga, Yosefu na Mariya bakatwara omwana Yerusaalemu kumuhongera MUKAMA. 23(nibahondera ekyahandiikirwe omu Biragiro bya MUKAMA ngu: “Omuzigaijo weena ow'obwojo araahongerwaga MUKAMA.”) 24Bakagenda n'okuhayo ekihongwa nkooku kiri omu Biragiro bya MUKAMA, nugo: “Amaiba abiri rundi obwana bw'amaiba bubiri.” 25Omu kasumi ako, omu Yerusaalemu hakaba haliyo omusaija, ibara lye Simyoni, omuntu ahikiriire, anyakutiina Ruhanga, kandi ayategerezaaga okucungurwa kwa Isirairi, Mwoyo Ahikiriire akaba amuroho. 26Nuwe ayamusuukuliire nkooku atalifa atakarozire Kristo, MUKAMA ou yanihiize. 27Akeebemberwa Mwoyo kwija omu Nju ya Ruhanga, abazaire b'omwana Yesu obu baamutaahizeemu okumukora omurwa gwabu nkooku gukaba guli. 28Nubwo Simyoni yakikiira omwana, yakugiza Ruhanga naagamba ati: 29“MUKAMA wange, hati leka omuheereza waawe afe n'obusinge, nkooku waraganiize; 30habwokuba amaiso gange garozire okujuna kwawe, 31oku wateekaniriize omu maiso g'amahanga goona, 32gube musana ogumulikira Abanyamahanga, kandi guleetere ekitiinisa abantu baawe Abaisirairi.” 33Ise na nyina bakahunirizibwa ebyamugambirweho. 34Simyoni yabasabira omugisa, yayongera yagambira Mariya nyina ati: “Hurra, Ruhanga ataireho omwana onu nukwo baingi bagwe kandi baimuke omu Isirairi, kandi abe karorwaho abantu baingi aka bataliikiriza. 35Nukwo ebiteekerezo by'abaingi bisuukurwe, (na iwe empirima erikucumita omutima).” 36Kandi hakaba haroho omurangikati, ibara lye Anna, muhara wa Fanueli ow'omu ruganda rwa Aseeri. Akaba akaikwire muno. Obu yaswirwe, akamara na iba emyaka musanju yonka; 37akaikara ali mufaakati okuhika ha myaka kinaana n'ena y'obukuru. Tiyarugaga omu Nju ya Ruhanga. Yaikaramuga naaramya, naasiiba kandi naasaba nyamusana n'ekiro. 38Omu kasumi ako obu yaizire yatandika kusiima Ruhanga, kandi boona abakaba bategeriize okucungurwa kwa Yerusaalemu, yabagambira ha mwana ogu. 39Abazaire be obu baamazire kuhikiriza byona ebiragiro bya MUKAMA nkooku byaragiraga, baagarukayo Galiraaya omu rubuga rw'owaabu Nazareeti. 40Omwana akakura, yagira amaani, aijwire amagezi; n'emigisa ya Ruhanga yaikaraga hali uwe. 41Buli mwaka abazaire ba Yesu baagendaga Yerusaalemu habw'ebiro bikuru by'okwijuka Okuhingurwaho. 42Yesu obu yahikize emyaka ikumi n'ebiri, bakagenda nawe habw'ebiro bikuru engeso yaabo nkooku ekaba eri. 43Ebiro bikuru obu byahoire baimukya kugarukayo owaabu, baitu omwana Yesu yasigara Yerusaalemu abazaire be batamanyire. 44Bakaba nibateekereza ngu, agenzire n'ekitebe ky'abantu abakaba nibagarukayo. Obu baamazire kugenda orugendo rw'ekiro kyona, nubwo baatandika kumuserurra omu banyabuzaale n'omu bataahi. 45Obu baalemerwe kumuzoora, baagarukayo Yerusaalemu nibakyamuserra. 46Obu haahingwireho ebiro bisatu, bakamuzoora omunju ya Ruhanga, aikaliiire hagati y'abeegesa bakuru naabahuliriza kandi naabakaguza. 47Boona abaamuhuliire bakahunirizibwa amagezi ge n'okugarukamu kwe. 48Abazaire be obu baamurozire, baahunirra muno; nukwo nyina kumukaguza ati: “Mwana wange, habwaki otukozire oti? Dora sso na nyowe tukuserwire muno tutuntwire.” 49Nawe yabagarukamu ati: “Munseruliire ki? Timumanyire nkooku nsemeriire kwekambisa ha bya Isenyowe?” 50Baitu bbo batasobole kwetegereza amakuru g'eki yabagambiire. 51Nubwo Yesu yagenda nabo baahika Nazareeti, kandi yaikara naabahurra. Ebigambo ebi byona, nyina akabirinda ha mutima. 52Yesu yayeyongera kukura omu magezi n'omu mubiri, naasiimwa Ruhanga n'abantu.

will be added

X\