LUKA 19

1Yesu akataaha omu rubuga Yeriko, kandi akaba ali w'okururabamu. 2Hakaba haliyo omusaija omuguuda, omukuru w'abasorooza b'omusoro, ibara lye Zakayo. 3Akagonza muno kurora Yesu ogu nkooku arukusisana, baitu atasobole, habw'ekitebe kingi ky'abantu, habwokuba akaba ali mugufu. 4Nubwo yairukire yayebembera ekitebe kyona, yatemba omutoma, nukwo arole Yesu, habwokuba ogu nugwo muhanda ogu akaba naarabamu. 5Yesu obu yahikireho yararamira haiguru, yamugambira ati: “Zakayo, sirimuka bwango, habwokuba kiro kya hati ndi w'okusiiba owaawe.” 6Zakayo yasirimuka bwango, yamutangirra n'okusemererwa kwingi. 7Abantu obu baarozire eki baatandika kutontoroma nibagamba bati: “Yagenda kuba mugenyi w'omuntu omusiisi!” 8Aho Zakayo yayemerra yagambira MUKAMA Yesu ati: “Mukama wange, hati ninyija kugabira abanaku ekicweka kya kabiri ky'ebintu byange; kandi obu haraaba haroho ou nagobiize weena, ndamulehera emirundi ena.” 9Yesu yamugambira ati: “Kiro kya hati okujunwa kwizire omunju enu, habwokuba omusaija onu nawe mwijukuru wa Abburahamu; 10kandi Omwana w'omuntu akaija kuserra n'okujuna ekyabuzire.” 11Obu bakaba nibakyahuliriza ebi, Yesu yayongera kubaganikiza oruganikyo, habwokuba akaba ali haihi na Yerusaalemu, kandi abantu bakateekereza ngu, obukama bwa Ruhanga bukaba buli haihi kwija. 12Nubwo yagambire ati: “Hakaba haroho omuntu ow'ekitiinisa ayagenzire omu nsi ya hara kwetungira obukama, nukwo hanyuma agaruke. 13Obu akaba atakagenzire, akeeta ikumi ha baheereza be, yabaha buli omu siringi nka bikumi bibiri, naabagambira ati: ‘Muzisuubuze okuhikya obu ndigaruka.’ 14Baitu abantu b'owaabu bakaba bamunobere, nukwo kumuhondeza abakwenda nibagamba bati: ‘Omusaija ogu titurukwenda atuleme.’ 15“Obu yagarukire, amazire kulya obukama, akaragira kumwetera abaheereza be aba yasigiire sente, nukwo amanye amagoba gaazo. 16Ow'okubanza yaija omu maiso ge yagamba ati: ‘Mukama wange, siringi zaawe makumi abiri ezi wampaire ikagoba bikumi bibiri.’ 17Yamugarukamu ati: ‘Webale muheereza wange omurungi! Nkooku oyesigirwe omu bintu ebike, nkuhaire obusobozi bw'okulema embuga ikumi.’ 18Omuheereza wa kabiri yaija yagamba ati: ‘Mukama wange, siringi zaawe makumi abiri ezi wampaire ikagoba kikumi kimu.’ 19Yamugarukamu ati: ‘Na iwe noija kulema embuga itaano.’ 20Omuheereza ondi yaija yagamba ati: ‘Mukama wange, siringi zaawe nzinu, nkazaahura omu kitambaara. 21Nkakutiina, habwokuba oli muntu mubi; oihamu eki otaratairemu, ogesa ebi otarasigire.’ 22Yamagarukamu ati: ‘Muheereza iwe omubi! Kankusingise omusango ninsigikira ha bigambo ebi ogambire! Okamanya nkooku ndi muntu mubi, nyihamu eki ntaratairemu, kandi ngesa ebi ntarasigire! 23Mara habwaki sente zange otarazitaire omu banka? Obu nakugarukire naakuziihireyo n'amagoba gaazo?’ 24Nubwo yagambiire abakaba beemeriireho ati: ‘Mumwiheho siringi zange abiri, muzihe ogu ayagobere bikumi bibiri.’ 25Nukwo bbo kumugambira bati: ‘Waitu, kandi uwe k'aina ebikumi bibiri!’ 26Nyowe nimbagambira nti: ‘Weena anyakwina, alyongerwaho; baitu ataina bingi, n'akatoito aka ainako kalimwihwaho. 27Hati nu, abanyanzigwa bange mubaleete hanu, mubaitire omumaiso gange!’ ” 28Yesu obu yamazire kugamba ebi, yabeebembera kugenda Yerusaalemu. 29Obu yairiire haihi na Beetifage na Betaniya, ahikire ha rusozi orwayetwaga orw'emiti Oliva, yatuma babiri ha beegesebwa be, 30ati: “Mugende omu kyaro kiri ekituroleriire, obu muraaba nimukyataahamu muti, murasanga omwana gw'endogoyi ogutakatembwahoga muntu, gusibirwe; mugusibule muguleete hanu. Omwana gw'endogoyi ogutakatembwahoga muntu (Luk 19:30) 31Obu haraabaho arukubakaguza ati: ‘Nimusibura gwaki?’ Mumugambire muti: ‘Mukama waitu nagwetaaga.’ ” 32Abaatumirwe baagenda, baasanga biri nkooku yabagambiire. 33Obu bakaba nibasibura omwana gw'endogoyi' bakama baagwo baabakaguza bati: “Nimusibura gwaki?” 34Baagarukamu bati: “Mukama waitu nagwetaaga.” 35Nubwo baaguleetiire Yesu, baagutaho ebijwaro byabo, bagumutembya. 36Obu akaba naagenda, baayarra ebijwaro byabo omu muhanda. 37Obu yairiire haihi na Yerusaalemu, ahikire ha kasirimuko k'orusozi rw'emiti Oliva, ekitebe kyona eky'abeegesebwa be kyatandika kusemererwa n'okuhaisaniza Ruhanga n'iraka likooto habw'ebihuniriza ebi baarozire, 38nibagamba bati: “W'omugisa MUKAMA ogu arukwija omu ibara lya Atahwaho. Obusinge bube omwiguru, n'ekitiinisa kibe hali Mukama w'iguru!” 39Abafalisaayo abamu ab'omu kitebe eki, nukwo kumugambira bati: “Mwegesa, culeeza abeegesebwa baawe!” 40Yesu yabagarukamu ati: “Nimbagambira nti: Banu noobu baraaculeera, amabaale nigaija kutoka.” 41Obu akaba nairra haihi n'orubuga, yarurora, yarulirirra ati: 42“Nangwa n'ekiro kinu kakuba obaire omanyire ebirukuleeta obusinge! Baitu bambi, bikuserekerwe! 43Akasumi kalikuhikira abanyanzigwa baawe obu balikugota, bakwehingulirize, bakufunze embaju zoona. 44Balikukenya hansi hamu n'abantu abaliba bali omuliiwe, kandi tibalikusigira ibaale na limu eryemeriire ha lindi; habwokuba otamanye akasumi Ruhanga aka yaiziremu kukujuna!” 45Yesu akataaha omunju ya Ruhanga, yatandika kubingamu abakaba nibatundiramu ebintu, 46naabagambira ati: “Kikahandiikwa ngu: ‘Enju yange eraayetwaga Nju y'okusabiramu’; baitu inywe mugifoire bwingira bw'abanyagi!” 47Kandi bukyabukya Yesu yayegesaaga omunju ya Ruhanga. Baanyakatagara abakuru, n'abeegesa b'ebiragiro, n'abeebembezi b'abantu bakaba nibaserra kumwita, 48baaburwa eki baraamukora, habwokuba abantu boona bakaba nibamuhuliiriza n'omutima gumu.

will be added

X\