LUKA 15

1Kiro kimu abasorooza b'omusoro n'abantu abateekerezebwaga kuba babi, boona bakeesorooleza hali Yesu kumuhuliriiza. 2Abafalisaayo n'abeegesa b'ebiragiro obu baarozire eki, baatontoroma nibagamba bati: “Ntamanya omuntu onu ajwahukirra abantu babi, n'okulya alya nabo!” 3Nubwo Yesu yabaganikiize oruganikyo runu ati: 4“Muntu ki omuli inywe anyakwina entaama kikumi, emu kakuba emuburaho, ataleka kyenda na mwenda omu kisaka akagenda kuserra enyakubuzire, okuhikya obu agizoora? 5Obu amara kugizoora, agita ha mabega aijwire omuhimbo. 6Obu ahika omuka ayeta banywani be n'abataahi, abagambira ati: ‘Bagenzi bange, katusemererwe hamu habwokuba entaama yange ey'abaire ebuzire ngizoire.’ 7Nikyo ndukubagambira nti: Halibaho okusemererwa kwingi omwiguru habw'omusiisi omu anyakwegarukamu, kukira abantu ab'engeso nungi kyenda na mwenda abatarukwetaaga kwegarukamu.” 8“Rundi mukazi ki anyakwina siringi ikumi, emu kakuba emuburaho atahemba etaara, akasingorra enju, akaserra hoona hoona okuhikya obu agizoora? 9Obu amara kugizoora, ayeta banywani be n'abataahi nabagambira ati: ‘Bagenzi bange, katusemererwe hamu, habwokuba siringi yange ey'ebaire ebuzire ngizoire.’ 10Nikyo ndukubagambira nti: Abamalaika ba Ruhanga nukwo basemererwa bati habw'omusiisi omu anyakwegarukamu.” 11Aho Yesu yagamba ati: “Hakaba haroho omusaija ow'akaba aina abatabani babiri. 12Omuto akasaba ise ati: ‘Taata, mpa omugabo gw'obugwetwa bwange.’ Nubwo isebo yabaganizeemu itungo, yalibaha. 13Obu haahingwireho ebiro bike, omuto yasorooza ebintu bye byona, yagenda omunsi ya hara. Oku nuho yabisiisire omu ngeso mbi. 14“Obu yayemaliireho kimu buli kantu, nubwo haagwire kiihe omunsi egi. Omusigazi yatandika kutaaga habw'okutaa n'akantu. 15Aho yagenda kukorra omusi w'ensi egi. Omuntu ogu yamusindika kuliisa empunu omu iriisizo lye. 16Obu akaba naaliisa yayegomba kulya ebisusu empunu ebi zaalyaga, baitu busaho muntu ayamuhaire akookulya. 17Obu, yayetiire, yagamba ati: Abakozi baingaha aba isenyowe abarukulya nibaiguta, bikabalema n'okubalema; baitu nyowe hanu, enjara y'okunyita! 18Kanyimuke ngende hali isenyowe mmugambire nti: ‘Taata, nkasiisa hali Ruhanga na hali iwe. 19Tinkyasemerra n'okwetwa mwana waawe; haakire onfoole nk'omu ha bakozi baawe.’ 20Nubwo yaimukire yakwata ogw'okumugarra hali ise. “Obu akaba akyali haraho, ise yamumanyirra, yamukwatirwa embabazi. Nubwo yairukire, yamugwa omu kifuba. 21Baitu omwana yagamba ati: ‘Taata nkasiisa hali Ruhanga na hali iwe. Tinkyasemerra n'okwetwa mwana waawe.’ 22Ise yayeta abaheereza be nagamba ati: ‘Nyabura inywe mundahukize ekijwaro nyaburungi, mukimujweke. Mumute empeta omu rukumu n'enkaito omu bigere. 23Muleete esajwa, mugiite, tucumbe obugenyi; tulye tusemererwe. 24Omwana wange onu ow'akaba afiire, hati mwomeezi: akaba azaahire, hati azaahukire.’ Baatandika kusemererwa. 25“Omu kasumi ako, omutabani omukuru akaba ali ha musiri. Obu akaba naagaruka, ali haihi kutaaha, yahurra engoma n'ebizina. 26Yayeta omu ha baheereza, yamukaguza ekinyakuroho omu ka. 27Nandiki omuheereza ati: ‘Muto waawe agarukire, kandi isiinywe amwitiire esajwa habwokuba agarukire n'obusinge kandi mwomeezi.’ 28Omukuru nukwo kukwatwa ekiniga yayanga okutaaha omunju. Ise yaturuka aheeru yamwesengereza ataahe. 29Yagarukamu ise ati: ‘Nyowe mmazire emyaka enu yoona ninkuheereza. Tinkakweremeraga omurundi na gumu. Baitu tokampaga nangwa n'akabuzi nkasemererwaho n'abanywani bange. 30Baitu mutabani waawe ogu ayasiisire itungo lye omu bamalaaya, obu agarukire, omwitiire esajwa!’ 31Ise yamugarukamu ati: ‘Mwana wange, obutoosa otaaha na nyowe, kandi ebyange byona byawe. 32Baitu kihikire okukora obugenyi bunu n'okusemererwa, habwokuba muto waawe ow'akaba afiire, hati mwomeezi; akaba azaahire, hati azaahukire.’ ”

will be added

X\