LUKA 12

1Omu kasumi ako, abantu enkumi n'enkumi obu baayesoroize hamu, bakaba nibasindikangana, Yesu yabanza kugambira abeegesebwa be ati: “Mwerinde ekitumbisa ky'Abafalisaayo, nubwo obugobya bwabu. 2Busaho ekiswekeriirwe ekitalisuukurwa, rundi ekiserekerwe ekitalimanywa. 3Kyona kyona eki mwagambiire omu mwirima kirihulirwa omusana nigujwa; n'eki mwahwehweteriire omu bisiika ebya ha rubaju kirirangirirwa ha rusu rw'enju.” 4“Banywani bange kambagambire nti: Muleke kutiina abo abaita omubiri kunu bataina kindi eki basobora kukora ekirukukira aho. 5Kambagambire ow'okutiina. Mutiine Ogu anyakumara kwita, akagira n'obusobozi obw'okunaga omu murro ogutaraara. Mazimakwo Ogu nuwe mutiinege! 6“Ebisirya bitaano tibigurwa sente abiri? Kandi kunu busaho na kimu halibyo ekyeba omu maiso ga Ruhanga. 7Isoke lya ha mitwe yanyu nalyo libazirwe lyona. Nahabweki muleke kutiina. Inywe muli b'omuhendo mwingi kukira ebisirya bingi!” 8“Nimbagambira nti: Omuntu weena alinnyatura omumaiso g'abantu, Omwana w'omuntu nawe alimwatura omumaiso ga bamalaika ba Ruhanga; 9kandi weena alinyehakana omumaiso g'abantu, Omwana w'omuntu alimwehakana omumaiso ga bamalaika ba Ruhanga. 10Weena anyakugamba kubi ha Mwana w'omuntu aliganyirwa; baitu anyakujuma Mwoyo Ahikiriire taliganyirwa. 11Obu baraabaleeta omu masorrokaniro, rundi hali ab'obusobozi, rundi hali abalemi kubanyegerra, muleke kutuntura nkooku muraagarukamu nimwetonganirra, rundi eki muraagamba; 12habwokuba Mwoyo Ahikiriire alibeegesa omu kasumi ako eki musemeriire kugamba.” 13Omuntu omu hali abo abakaba bali omu kitebe akagambira Yesu ati: “Mwegesa, gambira mugenzi wange tubagane obugwetwa bwaitu.” 14Yesu yamugarukamu ati: “Musaija iwe, nooha yantaireho kubacwera omusango, rundi kubabaganirizaamu abintu byanyu?” 15Yayongera yabagambira ati: “Mwegendereze kandi mwerinde okwegomba kwona, habwokuba obwomeezi bw'omuntu tibubaho habw'itungo eringi eri ainalyo.” 16Nukwo kubacwera orufumo runu ati: “Hakaba haroho omuguuda anyakwina itaka lye eryayereze ebirimwa bingi. 17Kandi uwe yabanza kwekaguza ati: ‘Nkole ki? Tinyina h'okuhunika ebirimwa byange byona.’ 18Yagamba ati: ‘Kinu nikyo ndaakora. Ndaaseesa enguli zange, nyombekemu enkooto nambere ndihunika oburo bwange hamu n'ebintu byange ebindi. 19Obu nubwo ndyehuuma nti Nyeyahuliire ebintu ebirimmazaaho emyaka nyingi erukwija. Kampuumule, ndye, nywe, nyegonze.’ 20Baitu Ruhanga yamugambira ati: ‘Mudoma iwe! Kiro kya hati oraihwaho obwomeezi bwawe. Ebintu byona ebi wayeyahuliire biriba by'oha?’ 21Nukwo kiba kiti hali ogu ayeyahurra itungo lingi omu nsi, kunu munaku omu maiso ga Ruhanga.” 22Nubwo Yesu yagambiire abeegesebwa be ati: “Nikyo ndukubagambirra nti: Mutalitunturra obwomeezi bwanyu eki muraalyaga rundi, omubiri gwanyu eki muraajwaraga. 23Habwokuba obwomeezi bw'omuhendo kukira ebyokulya, n'omubiri gw'omuhendo kukira ebyokujwara. 24Murole ebingoora: tibisiga, tibigesa, tibigira nguli noobu haakuba ahandi h'okuhunika; baitu nabwo Ruhanga abiriisa. Inywe ka nimukirra kimu enyonyi! 25Nooha omuli inywe, noobu atuntura ata, akusobora kwongeraho akasumikake ha bwomeezi bwe? 26Obu muraaba mutarukusobora kukora akantu kake nk'ako, ebindi nibibatuntuliza ki? 27Murorre ha byakyo nkooku bikura: tibiruka kandi tibyongosa; baitu nimbagambira nti: Nangwa na Solomooni omu kitiinisa kye kyona atajwale kurungi okwingana ekimu hali byo. 28Ruhanga obu araaba ajweka ati ebinyansi ebiroho hati, nyenkya bikanagwa ha kikoomi, talikiraho muno kujweka inywe abaina okwikiriza kuke? 29Mulekege okumaliza omutima ha ki muraalyaga n'eki muraanywaga, noobu kwakuba kubitunturra. 30Habwokuba ebi byona Abanyamahanga b'omunsi munu nibyo baitanira. Baitu Isiinywe amanyire nkooku murukubyetaaga. 31Ekirikukira, inywe mubanze muserre obukama bwe, n'ebi byona biribongerwaho.” 32“Mutatiina inywe igana erike! Habwokuba Isiinywe akasiima kubaha obukama. 33Mutunde ebi mwinabyo, mugabire abaseege; mwetungire ensahu za sente ezitarukukura, kandi mwahule itungo eritahwaho omwiguru, omusuma nambere atalisobora kulihikaho kandi enkugutu nambere italisobora kulisisa. 34Habwokuba itungo lyanyu nambere liri, oku nuho n'emitima yanyu eraikaraga.” 35“Mwikale mweteekaniize, mweteegere emyeko, n'etaara zanyu nizaaka. 36Mube nk'abantu abarukulindirra mukama wabo arukugaruka naaruga ha bugenyi bw'obugole. Obu aija akateera ha rwigi, bamukingurra bwango. 37B'omugisa abaheereza abo mukama wabu aba alisanga nibarora. Mazimakwo nimbagambira nti: Alyeteega omweko, abaikalize, abaheereze. 38Kakuba agaruka omu kisisiimuko ekyakabiri rundi ha nkoko y'okubanza akabasanga nibarora, baina omugisa abaheereza abo! 39“Kinu mukimanye, kakuba nyineeka yamanyire esaaha omusuma ei arukwiziramu, yakwikaire naarora, nukwo omusuma aleke kucwa enju ye. 40Na inywe mwikale mweteekaniize, habwokuba Omwana w'omuntu aliija omu kasumi aka mutarukumunihirramu.” 41Nubwo Petero yamukagwize ati: “MUKAMA wange, orufumo runu orucweriire itwe, nandiki abantu boona?” 42MUKAMA yamugarukamu ati: “Muheereza ki omwesigwa kandi ow'amagezi, mukama we ou akwasa ebintu bye, kurolerra eka ye n'okuha abantu be ebyokulya byabo omu kasumi kaabyo? 43Omuheereza ogu ahiirirwe mukama we obu aliija akamusanga naakora ati. 44Mazimakwo nimbagambira nti: Mukama we alimukwasa kurolerra ebintu bye byona. 45Kyonka omuheereza ogu kakuba ateekereza omu mutima gwe ati: ‘Mukama wange aikaireyo, tarukwija bwango,’ akatandika kuteera abaheereza bataahi be abasaija n'abakazi, akeeta ha kulya, kunywa, n'okutamiira, 46mukama we obu aligaruka ha kiro eki atarukumunihirramu na ha kasumi ak'atamanyire, alimufubira muno, kandi amubarre omuli abo abatarukwesigwa. 47“Omuheereza ogu ayamanyire mukama we eki arukwenda, kandi tiyataho mutima kukikora, aliteerwa muno; 48baitu omuheereza ataramanyire mukama we eki yayenzire, kandi yakora ekisemeriire kumufubiza, ogu aliteerwa kake. Anyakuheebwa bingi, alikaguzibwa bingi; n'anyakukwasibwa bingi muno, alisabwa bingi muno.” 49“Nkaija kuhemba omurro omunsi; haa, kakuba gubaire gwakire! 50Nkyaina omulingo ogw'okufa ogu ndukwija kufaamu; kandi nintuntura okuhika obu kulikahikirra! 51Nimuteekereza ngu, nkaija okuleeta obusinge, omu nsi? Nangwa, nimbagambira nti: Ntaije kuleeta obusinge baitu nkaija kuleeta okwebaganizaamu. 52Okuruga hati enju enyakurumu abantu bataano eraayebaganizaamu: abasatu bahakanize ababiri, n'ababiri bahakanize abasatu. 53Ise omwana alyebaganiza ha mutabani we, n'omutabani hali ise; omukazi alyebaganiza na muhara we na muhara we hali nyina; nyinazaara alyebaganiza ha mukamwana, na mukamwana hali nyinazaara.” 54Yesu akongera kugambira ebitebe by'abantu ati: “Obu murora ekicu nikiimuka Bugwa-izooba, ahonaaho mugamba muti: ‘Enjura niija kugwa’, kandi egwakwo. 55N'obu murora omuyaga niguteera nigwiha Bukiizi bw'obulyo, mugamba muti: ‘Nihaija kujwa omusana mwingi’, kandi gujwakwo. 56Bagobya inywe! Obusumi bw'omusana n'enjura mubukengera ha kurora ensi n'iguru; habwaki mutakenga amakuru ag'obusumi bunu?” 57“Kiki ekirukubalemesa kucwamu ekihikire? 58Obu oraaba noogenda omukooti, lengaho kwikirraniza na kinyegerra mukyali omu muhanda; nukwo aleke kukutwara hali omucwi w'emisango, omucwi w'emisango akakukwasa omuserikale, n'omuserikale akakuta omu nkomo. 59Ninkugambira nti: Toliruga omu nkomo okuhikya obu olikasasurra kimu akasente koona akasigaireyo.”

will be added

X\