LUKA 11

1Yesu akaba ali mu kiikaro kimu naasaba; obu yamazire, omu ha beegesebwa be yamugambira ati: “MUKAMA waitu, twegese okusaba nka Yohaana oku yayegeseze abeegesebwa be.” 2Nukwo Yesu kubagambira ati: “Obu muraabaga nimusaba, mugambege muti: ‘Isiitwe, ibara lyawe litiinwe, obukama bwawe bwije; 3otuhe hati ebyokulya byaitu ebya buli kiro; 4otuganyire ebibi byaitu, habwokuba na itwe tuganyira boona abatukora kubi; otatuleka tukoohebwa.’ ” 5Kandi Yesu akabagambira ati: “Omuli inywe anyakwina munywani we, kakuba agenda owe omu itumbi akamusaba ati: ‘Munywani wange, nyohozaayo emigaati esatu; 6habwokuba naizirwa omugenyi arugire hara, kandi tinyina kyokulya ky'okumuha!’ 7Baitu nyineeka akamugarukamu ati: ‘Leka kuntalibaniza; nkingire ira, nyowe n'abaana bange tubyamire. Tinsobora kwimuka kukuha eki orukwenda.’ 8Nyowe nimbagambira nti: Noobu araaba atarukugonza kwimuka kumuha eki arukusaba habw'obuganjani, baitu habw'okwongera kumujwahya naamwesengereza, naija kwimuka amuhe kyona eki arukwetaaga. 9“Nikyo na nyowe ndukubagambirra nti: Musabe, muraaheebwa; muserre, muraazoora; mwerange, muraakingulirwa. 10Habwokuba weena anyakusaba, aheebwa; anyakuserra, azoora; kandi anyakweranga, akingulirwa. 11Muzaire ki omuli inywe anyakuha omwana we enjoka, kunu amusabire encu? 12Rundi anyakuha omwana we enge, kunu amusabire ihuli? 13Nukwo inywe ababi, obu muraaba nimusobora kuha abaana banyu ebirungi, Isiinywe ow'omwiguru talikiraho okuha Mwoyo Ahikiriire abo abarukumusaba?” 14Yesu akaba naabinga ha muntu omwoyo omubi ogwamufoire kateta; omwoyo omubi obu gwamazire kumurugaho, omusaija yabaza. Nukwo abantu kuhunirra; 15baitu abamu omuli bo baagamba bati: “Ogu abinga emyoyo emibi habwa Beelizebuli mukuru wayo.” 16Aho abandi baamutega nibamusaba akarorwaho akarukuruga omu iguru. 17Baitu Yesu habw'okumanya ebiteekerezo byabo yabagambira ati: “Obukama bwona obwebaganizaamu okurwanisangana, buhwerekerra. Kandi eka enyakwebaganizaamu nayo ehwerekerra. 18Sitaani obu araaba ayebaganiizeemu kwerwanisa wenka, obukama bwe buliikaraho buta? Inywe mugamba ngu, obusobozi bwa Beelizebuli nubwo bunbingisa emyoyo emibi. 19Obu kiraaba kiri kiti, kandi abaana banyu baagibingisa obusobozi bw'oha? Nahabweki nubo abalibacwera omusango. 20Baitu obusobozi bwa Ruhanga obu buraaba buli nubwo obunbingisa emyoyo emibi, mumanye obukama bwa Ruhanga nkooku bubahikireho. 21“Omuntu w'amaani obu aba aina ebyokurwanisa ebirukumara, alinda eka ye, nukwo ebintu bye biikara omu businge. 22Baitu arukumukira amaani obu amuseesira, akamusingura, amunyagaho ebyokurwanisa bye byona ebi abaire naayesiga, kandi agaba ebi amunyagireho. 23Atali habwange buli nampakaniza; kandi atasorooza na nyowe, ararangya.” 24“Omwoyo omubi obu guba gumazire kuruga omu muntu, gugendagenda omu biikaro ebitarumu maizi niguserra h'okuhuumura. Obu gutazooraho, gugamba guti: ‘Kangarukeyo owange nambere naarugire.’ 25Obu gugaruka gusanga enju esingoliirwe kandi eteekaniziibwe kurungi. 26Nubwo gugenda, guleeta endi musanju erukugukira obubi, ija ikara omu. Kandi omuntu ogu obwomeezi bwe bwa hanyuma buba bubi okukira obw'okubanza.” 27Yesu obu akaba nakyagamba ebi, omukazi ow'akaba ali omu kitebe yaimukya iraka lye naagamba ati: “Y'omugisa enda eyakuzaire n'amabeere aga wayonkere!” 28Baitu Yesu yamugarukamu ati: “Abarukukira kuba b'omugisa nubo abahurra ekigambo kya Ruhanga bakakikwata!” 29Ebitebe by'abantu obu byayeyongiire kukanya, Yesu yabagambira ati: “Abantu ab'ebiro binu, bantu babi! Nibasaba akarorwaho, baitu tibaliheebwa karorwaho okwihaho aka Yona. 30Yona nkooku yabaire karorwaho ha bantu ba Nineve, n'Omwana w'omuntu nukwo aliba ha bantu ab'obusinge bunu. 31Ha kiro ky'okucwerwa omusango, Omukamakati ow'Obukiizi bw'obulyo alyemerra n'abantu ab'ebiro binu abasingise omusango, habwokuba akaruga ha mpero y'ensi yaija okuhurra amagezi ya Solomooni; kandi hati arukukira Solomooni ali hanu. 32Ha kiro ky'okucwerwa omusango, abantu ba Nineve balyemerra basingise ab'obusinge bunu omusango; habwokuba bakeegarukamu obu baahuliire Yona ebi yabarangiriire; kandi hati arukukira Yona ali hanu!” 33“Busaho muntu anyakumara kuhemba etaara akagisereka omu kisiika rundi akagijuumikira ekigega; baitu agihanika ha kikondo kyayo, nukwo abarukutaaha omu nju bahweze. 34Eriiso lyawe niyo taara ey'omubiri; eriiso lyawe obu liba nirihweza, omubiri gwona guhwereza kimu; baitu eriiso obu liba litarukuhweza, omubiri gwawe nagwo guswekwa omwirima. 35Habweki werinde, ekyererezi eki oinakyo kitaikara kufooka mwirima. 36Omubiri gwona obu guraaba niguhwereza kimu, gutarumu ekyetwa omwirima, gwangasanira kimu, gubamulikira nkooku mwakumuliikirwe etaara.” 37Yesu obu yamazire kubaza, Omufalisaayo akamweta kulya owe; yagenda yataaha omunju, yaikarra kulya. 38Omufalisaayo yahunirra okurora Yesu naalya atabandize kunaaba. 39Nukwo MUKAMA Yesu kumugambira ati: “Inywe Abafalisaayo, mwogya ebikopo n'esahaani haruguru, baitu omu nda mwijwire obunyagi n'obubi. 40Ha, badoma inywe! Ayahangire ebya haruguru tinuwe ayahangire n'eby'omu nda? 41Haakire ebintu ebi mwinabyo mubigabirege abanaku, nukwo ebindi byona birisemerezebwa habwanyu. 42“Baitu mulikibona inywe Abafalisaayo! Habwokuba muha Ruhanga ekicweka kya ikumi eky'omubwiga n'eyobyo n'emikubi endi, baitu obwinganiza n'okugonza Ruhanga timubifaaho. Ebi nibyo mwakufiireho, kandi ebindi nabyo muleke kubinagaija. 43“Mulikibona inywe Abafalisaayo! Habwokuba mugonza ebiikaro eby'ekitiinisa omu masorrokaniro, n'okuramukibwa omu butale. 44Mulikibona inywe! Habwokuba muli nk'ebituuro ebitarukurorwa, abantu ebi barubataho batamanyire.” 45Nubwo omu ha beegesa b'ebiragiro yamugambiire ati: “Mwegesa, obu orukugamba oti, buli na itwe otujumire!” 46Yesu yamugarukamu ati: “Mulikibona na inywe abeegesa b'ebiragiro! Mutweka abantu ebintu ebiremiire muno, kandi kunu inywe mutarukutaho n'orukumo kubakoonyera kubyetweka. 47Mulikibona inywe abombekera abarangi ebituuro, kandi kunu nubo abaisirwe abaisenkuru inywe. 48Nukwo na inywe muli bakaiso kandi nimugumya baisenkuru inywe ebi baakozire. Bbo bakabaita, kandi inywe nimwombeka ebituuro byabo. 49“Nikyo Ruhanga yagambiire omu Magezi ge ati: ‘Ndibatumira abarangi n'abakwenda; abamu omuli bo balibaita kandi abandi balibahiiganiza.’ 50Nukwo ab'ebiro binu bajunaanwe esagama y'abarangi boona eyaseesekere kuruga hakuhangwa kw'ensi. 51Okuruga ha sagama y'Abberi okuhika ha ya Zakaliya ou baitiire hagati y'itambiro n'ekiikaro ekirukwera. Mazima nimbagambira nti: Abantu ab'ebiro binu balijunaanwa esagama yabo. 52Mulikibona inywe abeegesa b'ebiragiro! Habwokuba mukaihaho ekisumuruzo eky'orwigi orw'okumanya. Inywe inywenka timwataahamu, kandi n'abandi abakaba nibenda kutaahamu mwabatanga.” 53Yesu obu akaba naaruga omunju egi, abeegesa b'ebiragiro n'Abafalisaayo baatandika kumuteeza muno empaka, baamukaguliriza ha bintu bingi, 54bakaba nibamutega emitego nukwo bamukwasize ha bigambo ebi araabagarukamu.

will be added

X\