YUDA 1

1Nyowe Yuda, omuheereza wa Yesu Kristo kandi mugenzi wa Yakobbo, nimpandiikira abo abaayesirwe, abagonzibwa omu Ruhanga Isiitwe, kandi abaalinzirwe habwa Yesu Kristo: 2Embabazi, obusinge, n'engonzi byeyongere omuli inywe. 3Abagonzibwa, habw'ekihika kingi eki mbaire nakyo eky'okubahandiikira ebirukukwata ha kujunwa kwaitu, ndozire nikyetaagwa muno okubahandiikira nimbateererra: murwanirre enyikiriza abantu ba Ruhanga ei baahairwe omurundi gumu, kyahwa. 4Habwokuba haroho abantu abamu abaatutaahiremu tutarukumanya. Nubo abo abaarangirweho ira nkooku balisingwa omusango. Bali bantu abatatiina Ruhanga, abahindura embabazi za Ruhanga waitu nibaifoora byekwaso by'okukora eby'obusiihani, baayanga Omulemi waitu omu wenka kandi MUKAMA Yesu Kristo. 5Ebi noobu muraaba mwabimanyire ira, baitu hati ningonza kubaijukya nkooku MUKAMA, ayajunire abantu be naabaiha omunsi Misiri, akongera yahwerekereza abo abataramwikiriize. 6Na bamalaika abataralinzire rukarra rw'obukuru bwabo bakaruga omu kiikaro kyabo, akabaikaza omu mwirima kasira, baboherwe omu njegere ezi batalirugamu okuhika ha kiro kikuru eky'okucwererwaho omusango; 7nk'ab'omu Sodomu na Gomora n'embuga ezindi ezaaherraineho oku baayetabwire omu busiihani n'omu rwanju orutali rw'obuhangwa, bakafubirwa omu murro ogutahwaho, babe kyokurorraho kyaitu. 8Omu mulingo nugwo gumu, abantu abo basiisa emibiri yabu, nibatwalirizibwa ebirooto byabo, bagaya obusobozi bwa Ruhanga kandi bajuma ab'ekitiinisa ab'omu iguru. 9Noobwakubaire Mikairi, omukuru wa baamalaika, obu akaba naahakaniza Sitaani, akamuteeza empaka ha by'omubiri gwa Musa, atagonze kumucwera omusango naamugaya, baitu akamugambira ati: “Leka MUKAMA wenka nuwe akuhane.” 10Baitu abantu banu bagaya kyona eki batarukwetegereza, kandi batwalirizibwa ebintu ebi bamanyire habw'obuhangwa bwabo nk'enyamaiswa ezitaina magezi, kandi nibyo bibahwerekereza. 11Balikibona! Habwokuba bakwasire omuhanda gwa Kaini, beenaga omu nsobi eya Balaamu habw'okwetungira amagoba, kandi bahwerekererra omu bwemi bwa Koora. 12Nubo abo abasiisa amagenyi ganyu ag'engonzi habwokuba bakora ebintu bya buli mulingo bataina nsoni, nibeefaaho bonka. Bali nk'ebicu ebitarumu njura, ebirukutwarwa omuyaga; rundi nk'emiti etaana bijuma omu kasumi kaabyo, eyafiire yaleka, kandi yasindukira kimu. 13Bali nk'ebigonzi by'enyanja erukusikuka, nibarugwamu esaabu n'orwondo. Bali nk'enyunyuuzi ezirukwenjeera, abaayahuliirwe okwikara omu mwirima kasira ebiro byona. 14Abo nubo Enoka ow'omu bwijukuru bwa musanju okuruga h'Adamu yarangireho naagamba ati: “Kinu mukyetegereze, MUKAMA naija n'abahikiriire be obuhumbe n'obuhumbe 15kucwera abantu boona omusango, n'okugusingisa abo abatatiina Ruhanga habw'ebibi byona ebi baamukozire omu mulingo mubi, na habw'ebigambo ebibi abasiisi abatatiina Ruhanga ebi baamubalizeeho.” 16Abo nubo ntontorromi, bahyemi, abalemwa okwegomba kwabo okubi, abeehaahira n'ebigambo bingi, bantu abanwekanweka abandi, nukwo bagire eki babaihaho. 17Baitu inywe abagonzibwa, kibahikiriire kwijuka abakwenda ba MUKAMA waitu Yesu Kristo ebi baarangire. 18Bakabagambira bati: “Omu biro bya ha mpero halibaho abasekerezi abatatiina Ruhanga, abalemwa okwegomba kwabu okubi.” 19Abo nubo abaleetereza okwebaganizaamu, bantu b'ensi abataina Mwoyo wa Ruhanga. 20Baitu inywe, abagonzibwa, mugumire kandi mweyongere ha nyikiriza yanyu erukwera muno; musabirege omu Mwoyo Ahikiriire. 21Mwikale omu ngonzi za Ruhanga, mutegereze obwomeezi obutahwaho MUKAMA waitu Yesu Kristo obu alibaha habw'embabazi ze. 22Abo abarukugurukyagurukya, mubahwitule; 23abandi mubajune, nimubasahura omu murro; n'abandi mubagirre embabazi, baitu nimwegendereza, nangwa munobe n'ekijwaro ekisiisirwe ebibi byabo eby'orwanju. 24Ekitiinisa, obukuru, obulemi n'obusobozi bibe hali Ogu arukusobora kubalinda mutagwa, akabahikya omu maiso g'ekitiinisa kye mutaina kamogo kandi mukyanganukire. 25Ebi byona biheebwe Ruhanga omu wenka anyakutujuna naaraba omu Yesu Kristo MUKAMA waitu ayabaireho ira lyona, anyakuroho hati, kandi ow'alibaho ebiro n'ebiro. Amiina.

will be added

X\