YAKOBBO 5

1Hati nu inywe abaguuda, murre kandi muteere empamo habw' enaku erukwija kubaizira. 2Itungo lyanyu hati lijunzire, n'ebijwaro byanyu biriirwe enkugutu. 3Ezaabbu yanyu n'efeeza bimomere, kandi obumomi bwabyo bulibasingisa omusango, nibulya emibiri yanyu nk'omurro. Itungo eri mwayahwire, liribahindukira omu biro bya ha mpero. 4Mwetegereze, empeera mwagobiize abakozi abaagesire emisiri yanyu neeyamuza; kandi emikungo y'abagesi ehulirwe MUKAMA w'amahe. 5Mukaikara omunsi nimwejaahiika kandi nimusemererwa; mukalya, mwaiguta nkooku mwagondeze omu biro abahikiriire ebi baitiirwemu. 6Mukasingisa omusango omuntu ahikiriire kandi mwamwita; kunu nuwe ogu atarabarwanisize. 7Habweki bagenzi bange, mugumiisirize okuhika MUKAMA obu aliija. Murole omulimi, alindirra omusiri gwe kurugwamu ebirimwa by'omugaso. Agumiisiriza okuhika obu gugwerwa enjura ey'itoigo n'ey'irumbi. 8Na inywe mugumiisirize. Mutaterebuka habwokuba MUKAMA amaliize kuhika. 9Bagenzi bange, muleke kunyegerrangana, mutaikara kujunaanwa mumaiso g'omucwi w'emisango; habwokuba na hati ali ha irembo nategereza. 10Bagenzi bange, ekyokurorraho eky'okugumiisiriza n'okubonabona nubo abarangi abaabalize omu ibara lya MUKAMA. 11Mumanye ngu, abaagumiisirize tubeeta bahiirwa. Mukahurra Yobu nkooku yagumiisiriize kandi mwarora Mukamu nkooku yamulinzire. Abakwo munyambabazi kandi muganyizi. 12Baitu bagenzi bange, ekikuru muno: mutalirahira iguru noobu yaakuba ensi, rundi endahiro endi yoona. Ekigambo kyanyu: Ego, kiikale kiri: Ego; kandi ekigambo kyanyu: Nangwa, kiikale kiri: Nangwa, nukwo muleke kusingwa omusango. 13Omuli inywe obu haraaba haroho anyakwina obulemeezi, asabe. Obu haraaba haroho arukusemererwa, azine eby'okukugiza Ruhanga. 14Omuli inywe obu haraaba haroho anyakurwaire, leka ayete abakuru ab'ekitebe ky'abaikiriza, bamusabire nibamusiiga amagita omu ibara lya MUKAMA; 15kandi okusaba oku okunyakurumu okwikiriza nikwija kukiza omurwaire, na MUKAMA naija kumwimukya. Obu araaba yakozire ebibi, araabiganyirwa. 16Nahabweki mwaturrangane ebibi byanyu, musabirangane nukwo mukire. Okusaba kw'omuntu ahikiriire kwina amaani kandi nikugasa muno. 17Eriya akaba ali muntu nka itwe, baitu akasaba ataireho omutima ngu, enjura ereke kugwa, kandi enjura yamara emyaka esatu n'ameezi mukaaga etarukugwa ha nsi. 18Kandi akagaruka yasaba, iguru lyanaga enjura, n'ensi yameza ebimera byayo. 19Bagenzi bange, obu haraaba haroho omuli inywe omuntu anyakuhabire, yaruga ha mazima, kandi hakabaho arukumugarra, 20ogu amanye nkooku weena anyakugarra omusiisi, akamwiha omu nsobi ei yahabiiremu, alijuna omwoyo gw'omusiisi ogu, kandi ebibi ebitabarwa biriswekerwa.

will be added

X\