YAKOBBO 4

1Kiki ekireeta amalemu n'empaka omuli inywe? Tikuli kwegomba okubi okurukurwanira omu bicweka by'emibiri yanyu? 2Inywe mwegomba ebintu; baitu obu mulemwa kubitunga, mwikiriza n'okwita abandi. mwegomba eby'abandi, baitu obu mulemwa kubitunga, nubwo mucwa obulemu kandi murwana. Ekibatanga kutunga, habwokuba timubisaba Ruhanga. 3Kandi obu musaba mutaheebwa, habwokuba musabire kubi. Mukaba nimwenda kubimarra omu kwegomba kwanyu okubi. 4Ha! Bantu inywe abateesigwa! Timurukumanya okuganjana n'ensi nkooku nubwo obunyanzigwa hali Ruhanga? Nahabweki weena anyakugonza kuganjana n'ensi, ayefoora muzigu wa Ruhanga. 5Rundi nimuteekereza ngu, Ekyahandiikirwe kigambira busa ekirukugira kiti: “Omwoyo Ruhanga ogu yatutairemu, tarukwenda kugwegarurra?” 6Baitu emigisa ei atuha neekiraho, nikyo kyahandiikirwe kiti: “Abeekuza, Ruhanga abahakaniza; baitu abeebundaaza abaha emigisa.” 7Nahabweki mworobere Ruhanga; murwanise Omwohi, nawe naija kubarugaho. 8Mwirre haihi Ruhanga, nawe alibairra haihi. Inywe abasiisi munaabe engaro zanyu, na inywe ab'emitima ebiri, mugisemeze. 9Mutuntule, muganye, kandi murre. Enseko zanyu ifooke kurra, n'okusemererwa kwanyu kufooke bujune. 10Mwebundaaze omumaiso ga MUKAMA, nawe alibanyumiza. 11Bagenzi bange, muleke kubazanganaho kubi. Anyakubazaaho kubi mugenzi we, rundi anyakumucwera omusango, buli nabazaaho kubi Ekiragiro kikuru eky'engonzi kandi nakigaya. Kakuba ogaya Ekiragiro ekikuru, buli torukukihikya, baitu oyefoire mukama wakyo. 12Haroho omu wenka anyakutaho Ebiragiro kandi aba mukama wabyo. Nuwe ogu arukusobora kujuna n'okuhwerekereza. Baitu iwe niiwe oha arukucwera mugenzi waawe omusango? 13Muhurre inywe abanyakugamba muti: “Hati rundi nyenkya turaagenda omu rubuga nanka, tumaleyo omwaka nitusuubura, nukwo twiheyo amagoba”, 14kunu mutarukumanya ebiraabaho nyenkya. Obwomeezi bwanyu kintu ki? Muli nk'ekiho ekinyakuzooka akacu kake, hanyuma kikakya. 15Haakire mugambe muti: “MUKAMA obu alisiima, na itwe tuba tukyaroho, turaakora kinu na kiri.” 16Baitu hati nimwemanyaho muno, nikyo murukwenyumiriza. kandi okwenyumiza nk'oku kuba kubi. 17Weena anyakumanya eki asemeriire kukora baitu akalemwa kukikora, eki kimufookera kibi.

will be added

X\