YAKOBBO 3

1Bagenzi bange, haleke kubaho baingi omuli inywe abarukugonza kwefoora beegesa b'abandi, habwokuba nimumanya itwe abarukwegesa nkooku tulicwerwa omusango ogurukukira ogw'abandi. 2Ningira itwena tusobya emirundi nyingi. Kandi omuntu kakuba atasobya omu bigambo abaza, ogu aba ahikiriire kandi asobora kulema omubiri gwe gwona. 3Itwe tuta ebyoma omu kanwa k'embaraasi nukwo zitworobere, tulema emibiri yazo yoona, tuzitwara nambere turukwenda. 4Murole n'emeeri; noobu ziba ziri nkooto zita, kandi niitwarwa emiyaga y'amaani, baitu zirungikwa engahi entaito muno hoona omurungiki h'arukwenda. 5Orulimi narwo kacweka kataito k'omubiri, baitu rwenyumiriza ha bintu ebikuru. Ka kyamahano okurora ekibira ekikooto nikyokebwa akarro kake! 6Orulimi narwo ruba murro. Omu bicweka by'omubiri orulimi niyo ndugirro y'ebibi byona, rusiisa omubiri gwona, rurugwamu omurro ogukwokya obuhangwa bwaitu bwona; kandi orulimi oru rucumika omurro ogu rwiha okuzimu Nyabuyonga. 7Buli mulingo gw'ebisoro, n'ebinyonyi, n'ebyekurra, n'encu ez'omu nyanja bisobora kulemwa kandi bikalemwa ira abantu; 8baitu tiharoho muntu asobora kulema orulimi ruba bubi obutahuumura, rwijwire obusegwe obwita. 9Nurwo tweyambisa kukugiza MUKAMA Isiitwe, kandi turukyenesa abantu abaahangirwe omu nsisana ya Ruhanga. 10Omu kanwa ako konyini harugamu okukugiza n'okukyena. Bagenzi bange, eki tikisemeriire kuba kiti. 11Ensoro emu esobora kurugwamu amaizi amarungi n'amabi? 12Nyabura inywe, omutini gusobora kwana ebijuma eby'omuti Oliva, rundi omuzaabbibbu kwana eby'omutini? Amaizi g'ekisura nago tigasobora kurugwamu amarungi. 13Nooha omuli inywe anyakwina amagezi n'okwetegegereza? Leka akigumye n'engeso ze enungi n'ebikorwa ebi akora n'obuculeezi obunyakurumu amagezi. 14Baitu omu mitima yanyu obu muraaba mwinamu ihali lingi rundi okwegonza, muleke kwenyumiza n'okusereka amazima. 15Amagezi nk'ago tigaruga omwiguru, baitu garuga omunsi; tigali g'abantu baitu g'Omwohi. 16Nambere hali ihali n'okwegonza, nuho haba okutaikirraniza, hamu n'ebikorwa ebibi byona. 17Baitu amagezi agaruga omwiguru, eky'okubanza gaba marungi, gongera galeeta obusinge n'obuculeezi, gaikiriza eby'obulyo, gaijwire embabazi, garugwamu ebikorwa ebirungi, tigasoroora mu bantu kandi tigarumu bugobya. 18Okuhikirra niryo igesa ly'embibo ezabyairwe kurungi abantu abaserra obusinge.

will be added

X\