YAKOBBO 2

1Bagenzi bange, inywe abarukwikiriza MUKAMA waitu Yesu Kristo, MUKAMA w'ekitiinisa, muleke kusoroora omu bantu. 2Kakuba haija omuntu anyakujwaire empeta eza zaabbu hamu n'ebijwaro ebirungi, ataaha nambere mwesoroliize; hakaija n'omunaku anyakujwaire obutengo, 3mukata omutima hali ogu anyakujwaire kurungi, mukamugamba muti: “Weza ikarra hanu”; kandi omunaku mukamugambira muti: “Yemerra hali”, rundi muti: “Ikarra hansi aho ha bigere byange”, 4obu, nimuba mutasoroire mu bantu, mukacwamu mutaina bwinganiza? 5Bagenzi bange abagonzibwa, mutege amatu! Ruhanga akakoma abanaku ab'omunsi babe baguuda omu kwikiriza kandi bagwetwa b'obukama obu yaraganiize abo abamugonza. 6Baitu inywe, omunaku ogu, mumugayire. Kandi abaguuda tinubo babaita kubi? Tinubo babacunda nibabatwara omu kooti? 7Tinubo abajuma ibara eri ery'ekitiinisa inywe Abakristo eri mwarukirwe? 8Kakuba muhikiriza kwo ekiragiro ekikuru, Ebyahandiikirwe nkooku birukugamba biti: “Ogonzeege mutaahi waawe nkooku oyegonza wenka”, obu mukora kurungi. 9Baitu obu musoroora, buli mukozire ekibi kandi Ekiragiro kibasingisa omusango, mwafooka basiisi. 10Habwokuba weena anyakulemwa kukwata ekintu kimu ekiri omu Biragiro, aba asingirwe omusango gw'okutahikya Ebiragiro byona. 11Ningira Ogu ayagambire ati: “Otalisiihana”, nuwe yagambire ati: “Otaliita”. Kakuba otasiihana baitu okaita, buli ocwire Ebiragiro byona. 12Nahabweki mubazeege kandi mukolege nk'abantu abalicwerwa omusango, nk'Ebiragiro ebitwiha omu bwiru oku bitegeka. 13Ataraagizire mbabazi, alicwerwa omusango ogutarumu mbabazi; habwokuba embabazi zimuganyiza omusango. 14Bagenzi bange, nikigasa ki omuntu kugamba ngu, aina okwikiriza, baitu ataina ebi arukukora? Okwikiriza oku kusobora kumujuna? 15Kakuba mugenzi wanyu omusaija rundi omukazi aba naajwara ebitahikire kandi ataina byokulya ebya buli kiro, 16baitu omu omuli inywe akamugambira ati: “Genda n'obusinge, otagate kandi oigute”, atamuhaire ebi omubiri gurukwetaaga, eki nikigasa ki? 17Habweki, okwikiriza kwonka obu kuraaba kutarumu bikorwa, kuba kufiire. 18Baitu haroho asobora kugamba ati: “Iwe oina okwikiriza, na nyowe nyina ebikorwa.” Hati nu onyoleke okwikiriza kwawe okutarumu bikorwa, na nyowe habw'ebi nkora, ndakwoleka okwikiriza kwange. 19Oikiriize Ruhanga nkooku ali omu, kandi ohikya kwo. Nangwa n'amasitaani eki gakiikiriza n'okukankana nigakankana. 20Mutaahi wange, iwe omudoma, nooyenda bakwoleka okwikiriza okutarumu bikorwa nkooku kutarukugasa? 21Ebikorwa tinibyo byahikiriize isenkuru itwe Abburahamu obu yahaireyo omutabani Isaaka ha itambiro? 22Aho noorora, okwikiriza kukagendera hamu n'ebikorwa bye, kandi okwikiriza kukahikirizibwa ebi yakozire. 23Nahabweki Ekyahandiikirwe kikahikirizibwa ekirukugamba kiti: “Abburahamu akaikiriza Ruhanga, kandi eki kyamurugiramu obuhikiriire”; yayetwa nganjani ya Ruhanga. 24Aho nuho murukurorra omuntu nkooku ahikirizibwa ebikorwa, kutali kwikiriza kwonka. 25Nikyo kimu Rahabbu, omunyarwanju ogu, nawe akahikirizibwa ebikorwa obu yakuniire entasi yabaragirra omuhanda gundi. 26Omubiri ogutarumu mwoyo nkooku guba gufiire, n'okwikiriza okutarumu bikorwa nukwo kuba kufiire kuti.

will be added

X\