YAKOBBO 1

1Nyowe Yakobbo, omuheereza wa Ruhanga kandi owa MUKAMA Yesu Kristo, nimbaramukya inywe ab'enganda ikumi na ibiri abaararangiire omu mahanga. 2Bagenzi bange, obu muraahikwahoga emihito etali y'omulingo gumu, mugiitanire n'okusemererwa. 3Okulengwa kw'okwikiriza kwanyu kurugwamu okuguma. 4Kandi muleke okuguma oku kuhikirize omulimo gwakwo, nukwo musobole kufooka abahikiriire kandi abagumire omu by'omutima mutaina ekirukubaburaho. 5Omuli inywe obu haraaba haroho anyakubuzirwe amagezi, agasabe Ruhanga anyakugabira abantu boona atarukubalirra kandi atarukweijukya, mazimakwo aligaheebwa. 6Baitu asabe aina okwikiriza kandi atarukugurukyagurukya, habwokuba anyakugurukyagurukya asisana ekigonzi ky'enyanja ekinyakutwarwa kandi ekinyakucundwacundwa omuyaga. 7Anyakugurukyagurukya aleke kuteekereza ngu, omuntu ow'emitima ebiri kandi ow'atagumire omu ngeso ze zoona 8aina eki alitunga hali MUKAMA. 9Muleke mugenzi wanyu omunaku ayesiime, Ruhanga obu amunyumiza, 10kandi omuguuda ayesiime Ruhanga obu amubundaaza, habwokuba abaguuda balihwaho nk'orwakyo rw'ebimera. 11Izooba obu lituruka liina ekibabu kyalyo ekisiiriiza kandi ekihotokya ebimera, orwakyo rwabyo rukunkumuka n'oburungi bwabyo buhwaho. Omuntu omuguuda nawe nukwo alihwaho ati, nakyaserra itungo. 12W'omugisa omuntu ogu anyakugumiisiriza omu kwohebwa, habwokuba obu alimara kusingura, aliheebwa ekondo ey'obwomeezi Ruhanga ei yaraganiize abamugonza. 13Omuntu obu ayohebwa aleke kugira ati: “Nyohiibwe Ruhanga”, habwokuba Ruhanga tayohebwa kukora ebibi, kandi tayohya muntu n'omu; 14baitu buli muntu ayohebwa obu abiihwabiihwa kandi atwalirizibwa okwegomba kwe okubi. 15Hanyuma okwegomba obu kumara kwija, kuzaara ekibi; kandi ekibi obu kimara kukura, kirugwamu kufa. 16Bagenzi bange abagonzibwa, muleke kubiihwabiihwa. 17Ekintu kyona ekirungi n'ekisembo kyona ekihikire biruga omu iguru hali Kazooba Nyamuhanga, atahindahinduka kandi tali nk'ekituuru ekigenda nikiihwaho. 18Akacwamu kutufoora baana be natwoleka enyegesa ye ey'amazima, nukwo tube omuganuro gw'ebi yahangire. 19Bagenzi bange abagonzibwa, kinu mukimanye: omuntu weena ahurre bwango, baitu atanguhiriza kubaza rundi kukwatwa ekiniga, 20habwokuba anyakwina ekiniga tarukwija kuhika ha buhikiriire Ruhanga obu ayenda. 21Nahabweki mweiheho obubi bwona n'engeso mbi zoona. mwikirize n'obuculeezi ekigambo Ruhanga eki yataire mu mitima yanyu ekirukusobora kubajuna. 22Baitu ekigambo eki mukite omu nkora, mutali nk'abarukukihurra kwonka, mukebiihabiiha. 23Omuntu obu ahurra ekigambo atakihikiriize, asisana nk'anyakwerorra omu ndolerwamu. 24Obu ayerora, agenda, kandi ahonaaho ayebwa nkooku arukusisana. 25Baitu ogu arukwetegereza Ebiragiro ebihikire, nibyo ebiragiro ebitwiha mu bwiru, akabyekambira, atali muhulizi arukwebwa baitu mukozi arukukora, nuwe aliheebwa omugisa omu ebi arukukora. 26Kakuba habaho arukuteekereza nkooku ali muntu w'ediini, kandi kunu tarukulema rulimi rwe, baitu nayebiihabiiha, ediini y'omuntu ogu busamu kantu. 27Ediini nyakabara kandi etaina kamogo omumaiso ga Ruhanga Isiitwe niyo enu: kusuura enfuuzi n'abafaakati abali omu mihito, n'okwerinda okusiiswa ensi.

will be added

X\