ABAHEBBURAAYO 8

1Ekikuru omuli ebi turukugamba nikyo kinu: Twina nyakatagara omukuru anyakwikaliire ha mukono ogw'obulyo ogw'Ekitebe ky'Anyakusinga omwiguru, 2omuheereza ow'omu kiikaro ekirukwera kandi ow'omu heema nyakabara etarasimbirwe bantu, baitu eyasimbirwe MUKAMA. 3Buli nyakatagara mukuru weena ateebwaho kuhonga ebisembo n'okutamba ebyonzira; nahabweki nyakatagara waitu ogu nawe asemeriire kugira eky'okuhonga. 4Kakuba abaire akyali omu nsi, tiyaakubaire nyakatagara mukuru naakake, habwokuba haroho banyakatagara abandi abarukuhonga ebisembo Ebiragiro nkooku bituragira. 5Omu byona ebi bakora bahondera ekyokurorraho kandi ekisisani ky'ebi ebikorwa omu kiikaro ekirukwera eky'omwiguru. Habwokuba Musa, obu akaba ayeteekanize kwemereza eheema, Ruhanga akamuhabura naagamba ati: “Taho omutima okukora ebintu byona noohondera ekisisani eki wayolekerwe ha rusozi.” 6Kya mazima kugamba ngu, Kristo akaheebwa obuheereza oburukukira obwa ira ekitiinisa, habwokuba nuwe muteeraniza wa Ruhanga n'abantu omu ndagaano erukukiraho oburungi, enyakukoliirwe ha byaraganiziibwe ekirukukira oburungi. 7Kakuba endagaano eyabandize etarabairemu nsobi, tihaakubaireho bulyo obw'okukora eya kabiri. 8Baitu Ruhanga akarora abantu be nkooku basobeze, nukwo kugira ati: “MUKAMA akagamba ati: ‘Akasumi kalihika nkole endagaano empyaka na bantu ba Israiri n'oruganda rwa Yuda. 9Endagaano etarukusisana n'eri ei nakozire n'abaisenkurubo ha kiro eki nabakwasire ha mukono nimbaiha omunsi ya Misiri. Bbo batagumire ha ndagaano yange, nikyo na nyowe nabaihiireho omutima.’ 10MUKAMA naayongera ati: Enu niyo ndagaano ei ndiragaana n'abantu ba Isirairi: ebiro ebi obu birihwaho ndita ebiragiro byange omu biteekerezo byabo, mbihandiike omu mitima yabo; kandi ndiba Ruhanga wabo, nabo babe bantu bange. 11Abantu tibalyegesangana rundi omuntu kuhabura mugenzi we ati: ‘Manya MUKAMA’. Habwokuba boona balimmanya, okubandiza h'arukukira obuto omuli bo okuhika h'arukukirra kimu obukuru. 12Na nyowe ndibaganyira obubi bwabo, kandi ebibi byabu tindigaruka kubiijuka. ” 13Ruhanga obu arukubaza ha ndagaano empyaka, buli naadibya eya ira. Ningira kyona ekidiba kikakura, kiba kisigaize kuhwaho.

will be added

X\