ABAHEBBURAAYO 7

1Melikizedeki ogu, omukama wa Saleemu kandi nyakatagara wa Ruhanga Rutakirwa, akaitirana Abburahamu naaruga ha bulemu nambere baitiire abakama, yamusabira omugisa. 2Nubwo Abburahamu yamubaganiriizeeho ekicweka ekya ikumi ekya byona ebi yanyagire. Amakuru g'okubanza ag'ibara Melikizedeki nganu: omukama w'obuhikiriire, kandi lyongera limanyisa omukama wa Saleemu, amakuru gaakyo: omukama w'obusinge. 3Omu Byahandiikirwe tibatwoleka ise rundi nyina, noobwakubaire obuzaale bwe. Tibooleka myaka ye nambere yabandiize noobwakubaire nambere agarukira; baitu bamusisaniza Omwana wa Ruhanga; aikara ali nyakatagara ebiro byona. 4Murole omuntu ogu nkooku ali w'ekitiinisa! Isenkuru itwe Abburahamu akamuha ekicweka kimu ekya ikumi ky'eminyago yoona. 5N'abaijukuru ba Leevi, abo abatunga omulimo ogw'obunyakatagara, baikirizibwa omu Biragiro okwihaho abantu bagenzi baabo ekicweka kya ikumi, kandi kunu nabo baijukuru ba Abburahamu. 6Baitu omusaija ogu ataina buzaale nabo, Abburahamu akamuha kimu kya ikumi kandi yasabira omugisa Abburahamu ogu, Ruhanga ou yaragaine nawe. 7Na hati kimanyirwe kurungi omukuru nuwe asabira omuto omugisa. 8Biro binu ekicweka ekya ikumi kitungwa banyakatagara abanyakufa, baitu omu biro kya Melikizedeki kikatungwa nyakatagara ogu ou kyahandiikirweho ngu, tarukwija kufa. 9Omuntu asobora kugamba ngu, Omuleevi ogu, hati anyakutunga ekicweka ekya ikumi, nawe akakiha nyakatagara ogu naaraba omu Abburahamu, 10habwokuba akaba akyali mu sagama ya Abburahamu isenkuru obu yaitiraine Melikizedeki. 11Hati nu obuhikiriire obu buraaba bwatungiirwe omu bunyakatagara bw'Abaleevi (nambere abantu baaheeriirwe Ebiragiro), bulyo ki obwakwetaagisize nyakatagara ondi ow'arukuruga omu rukarra rwa Melikizedeki, atali ow'omu rukarra orurukwetwa: “orw'Arooni”? 12Ningira obu habaho empinduka omu bunyakatagara, buli n'omu Biragiro hasemeriire kubamu empinduka. 13Kandi ogu arukugambwaho ebi byona, akaba atali w'oruganda orwarugwamuga muntu n'omu ow'okuheereza ha itambiro. 14Kimanyirwe kurungi MUKAMA waitu nkooku yarugire omu ruganda rwa Yuda, kandi Musa taina na kimu eki yagambire ha bunyakatagara oburukuruga omu ruganda oru. 15Eki nikigumibwa kurungi obu harukwija nyakatagara ondi arukusisana Melikizedeki ogu 16ayafookere nyakatagara atarukusigikira ha migenzo y'obuzarranwa, baitu anyakusigikira ha busobozi obw'obwomeezi obutali bw'okuhwaho. 17Habwokuba kikamuhandiikwaho kiti: “Iwe oli nyakatagara obusinge bwona, ow'omu mulingo gwa Melikizedeki.” 18Ha rubaju rumu entegeka eyabandize ekaihwaho habw'obuceke n'obutagasa bwayo, 19(habwokuba Ebiragiro bitaleete kuhikirra kwona); baitu ha rubaju orundi haizire okunihira okurukukira oburungi kandi okurukusobora kutwiriza haihi na Ruhanga. 20Kandi eki kitakorwe hataroho ekirahiro. 21Abo abaabandize kuba banyakatagara, bakaheebwa obukuru bwabo hataroho kurahira; baitu Yesu, uwe akabuheebwa n'ekirahiro ekirukugamba kiti: “MUKAMA akarahira kandi talyeijukya eki yarahiire ati: Oli nyakatagara obusinge bwona.” 22Eki nikyo kyafoire Yesu okuba mwema w'endagaano erukukira oburungi. 23Baanyakatagara abaabandize bakaba bali baingi nibahonderangana, habwokuba orufu rwabaihaga ha mulimo gwabu. 24Baitu Yesu aikara ali nyakatagara obusinge bwona kandi obunyakatagara bwe bw'oruteekerro, tibugweterwa ondi. 25Habweki ebiro byona asobora kujuna abo abeebinga Ruhanga nibaraba omuli uwe, habwokuba abaho okubatonganirra obutoosa. 26Aho nu kikaba nikisemerra itwe kutunga nyakatagara omukuru nk'ogu, ahikiriire, ataina kabi noobu kakubaire kabara, asoroirwe omu basiisi, anyumiziibwe okukira eby'omu iguru byona. 27Uwe tarukwetaaga kuhonga ebyonzira buli kiro nk'abanyakatagara abo abaabandize: rundi habw'ebibi bye, rundi habw'eby'abandi. Eki akakikora omurundi gumu yamara, obu yayehongere wenka. 28Mazimakwo Ebiragiro bikataho abantu abaceke babe banyakatagara abakuru; baitu anyakutairweho ekirahiro ekyahozirwe hanyuma, nuwe Mwana anyakuhikiriziibwe obusinge bwona.

will be added

X\