ABAHEBBURAAYO 6

1Nahabweki tulekere aho kwegesa engiga enkuru ez'enyegesa za Kristo ezi twabandiizeho, baitu tugende ha nyegesa ez'abantu abakuru, tutagaruka kutaho omusingi ogw'okuhindukira Ruhanga, rundi ogw'okuzira ebikorwa byaitu ebifiire. 2Tulekere aho kwegesa ha mirwa y'okwezibwa, ha kuteebwaho emikono, ha kuhumbuuka kw'abafu, n'okucwerwa omusango okwa ha mpero. 3Ebi tulibibazaaho Ruhanga obu alisiima. 4Abo abaarugire ha kwikiriza basobora bata kugarurwa ha kuzira obwa kabiri? Haroho abamu abaamazire kujwerwa omusana gwa Ruhanga, abaaroleze ha burungi bwa Ruhanga, abaabagaine ha Mwoyo Ahikiriire 5kandi abaakengere oburungi obw'ekigambo kya Ruhanga n'eby'amaani eby'ebiro ebirukwija. 6Abo obu bagwa bakaruga ha nyikiriza yabo, tikisoboka kubagarra bakeegarukamu obwa kabiri, habwokuba bbo bonka beebambira Omwana wa Ruhanga ha musaraba kandi bamukwasa ensoni. 7Bali nk'itaka Ruhanga eri aha mugisa nalinagira enjura emirundi nyingi nukwo limereze abalimi ebimera ebirungi. 8Baitu obu limeza amahwa n'amatojo, liba litakyaina mugaso, liri haihi kukyenwa; empero yalyo, nukwo kwokebwa. 9Noobu turaaba nitubaza tuti, baitu inywe abagonzibwa, nimumanya ebyanyu birungi okukiraho, kandi biraabahikya ha kujunwa. 10Ruhanga mwinganiza, tarukwija kwebwa ebikorwa byanyu n'engonzi ezi mwayolekere habwe nimuheereza abantu ba Ruhanga nkooku murukukora hati. 11Kandi nitwenda buli omu omuli inywe ayoleke obwekambi nk'obu okuhika ha mpero, nubwo ebi arukunihira kutunga birihikirizibwa. 12Muleke kuturumuka, baitu mukuraatire abo abagwetiirwe ebyaraganiziibwe habw'okwikiriza n'okugumiisiriza kwabo. 13Ruhanga, obu yaraganiize Abburahamu, habw'okutabaho ondi arukumukira obukuru ow'okurahira, akeerahira wenka, 14naagamba ati: “Mazimakwo ndikuha omugisa kandi nkukanyise.” 15Aho Abburahamu, obu yamazire kugumiisiriza, akatunga eki yaraganiziibwe. 16Mazimakwo abantu barahira ogu arukubakira ekitiinisa kandi okurahira kubamara empaka zaabo zoona. 17Ruhanga nawe obu yagondeze kunanurra kimu abagweterwa endagaano nkooku atahindura ntegeka ye, akagigumya n'ekirahiro. 18Nukwo habw'ebintu ebi ebibiri ebitahinduka: entegeka ye n'ekirahiro nambere Ruhanga atasoborra kubiiha bisuba, itwe abaamwebingire tusobora kugarurwamu omutima nitunihirra kimu kutunga ebi yaturaganiize. 19Okunihira oku twinakwo kuli nk'enyomyo egumire kandi etarukutengeeta enyakusibikwaho omwoyo. Nukwo okunihira okurukututaahya omu kiikaro ekirukwera omu nda, enyuma y'enyigamo, 20nambere Yesu yagenzire habwaitu naatwebembera, amazire kufooka nyakatagara omukuru ow'ebiro n'ebiro ow'omulingo gwa Melikizedeki.

will be added

X\