ABAHEBBURAAYO 5

1Nyakatagara omukuru weena anyakukomwa omu bantu, ateebwaho kumarra abantu ebyabo ebiina obukwatane na Ruhanga, okuhonga ebisembo, n'okutamba ebyonzira habw'ebibi byabo. 2Naasemerra kukwata mpora abatarukwetegereza n'abahabire, habwokuba nawe aina obuceke nk'abo. 3Nahabweki kimuhikiriire kutamba ekyonzira habw'ebibi bye wenka, na habw'ebibi by'abandi. 4Kandi busaho n'omu ayeha wenka obukuru obu, baitu ayetwa Ruhanga, nk'Arooni oku yayesirwe. 5Kristo nawe ateekuze wenka nukwo afooke nyakatagara omukuru baitu akateebwaho Ogu ayamugambireho ati: “Iwe oli mwana wange, nkuzaire kiro kya hati.” 6Na handi naagamba ati: “Iwe oli nyakatagara ebiro byona, ow'omu mulingo gwa Melikizedeki.” 7Yesu, obu akaba ali omunsi, akasaba kandi akeesengereza naayamuza kandi narra amaizi, nayamirra Ogu ow'akaba naasobora kumujuna orufu; kandi Ruhanga akamuhurra habw'okwebundaaza omumaiso ge. 8Noobu araaba yabaire Mwana wa Ruhanga, baitu okubonabonesibwa kwe kukamwegesa kuba muhulizi. 9Obu yamazire kuhikirizibwa, yafooka ndugirro ey'okujunwa okutalihwaho habw'abo boona abamuhurra; 10ningira Ruhanga akamurangirra nkooku ali nyakatagara omukuru, ow'omu mulingo gwa Melikizedeki. 11Hali nyakatagara ogu, twina bingi eby'okubazaaho, baitu kigumire kubisoborra, habwokuba biro binu mufookere abatarukwetegereza bwango. 12Omu kasumi kanu, noobu muraaba musemeriire kufooka beegesa b'abandi, nabwo nimwetaaga ondi ow'okubeegesa buhyaka engiga enkuru ez'ekigambo kya Ruhanga. Nimwetaaga amata, baitu bitali byokulya ebirukuguma. 13Weena arukukuzibwa amata, takeetegeriize kurungi enyegesa enyakutuhikya ha kuhikirra, habwokuba akyali mwana. 14Baitu ebyokulya ebirukuguma, biba by'abantu bakuru abamanyiire okwahurana oburungi n'obubi.

will be added

X\