ABAHEBBURAAYO 3

1Nahabweki ab'oruganda abarukwera, inywe abaayesirwe kubagana obwomeezi obw'omwiguru, mute ebiteekerezo byanyu hali Yesu omukwenda wa Ruhanga kandi nyakatagara omukuru ow'enyikiriza yaitu. 2Akaba ali mwesigwa hali Ogu ayamutaireho, nka Musa nawe oku yabaire mwesigwa omunju ya Ruhanga yoona. 3Baitu Yesu akaba asemeriire kuheebwa ekitiinisa kingi okukira Musa, omwombeki w'enju nkooku aheebwa akitiinisa okukira enju enyakwombekwa. ( 4Habwokuba buli nju yoona egira anyakugyombeka, baitu omwombeki w'ebintu byona nuwe Ruhanga.) 5Musa akaba ali mwesigwa omu nju ya Ruhanga nk'omuheereza kandi kaiso w'okugumya ebintu Ruhanga akaba ali w'okusoborra hanyuma; 6baitu Kristo akaba ali mwesigwa omunju ya Ruhanga nk'omutabani. Na itwe tuli nju ya Ruhanga obu turaaba nitugumiza kimu obwesige bwaitu kandi nitwenyumiza habw'ebi tunihira kutunga. 7Nikyo Mwoyo Ahikiriire yagambiire ati: “Kiro kinu obu murahurra iraka lye, 8mutagumanganiza emitima yanyu nk'abaanyemiire omwirungu ha kiro kyabo eky'okulengesibwa, 9nambere baisenkuru inywe baanjwahisize, kunu bakaba bamazire emyaka makumi ana nibarora ebi ndukukora. 10Nikyo nabiihiriirwe ab'obusinge bunu, nagamba nti: ‘Obutoosa bahaba omu biteekerezo byabo; kandi tibamanyire mihanda yange’ 11Nikyo narahiriire nyina ekiniga nti: ‘Tibali b'okutaaha omu buhuumuro bwange.’ ” 12Bagenzi bange mwegendereze, tihaikara kubaho omu omuli inywe arukugira omutima mubi, ogutarukwikiriza, ogurukutwaliriza okuruga hali Ruhanga omwomeezi. 13Baitu muhanangane buli kasumi. Obu muba mukyaina “akasumi”, haleke kubaho n'omu omuli inywe agumanganizibwa obugobya bw'ekibi. 14Kakuba tugumiza kimu obwesige bwaitu obwabandize, tukabuhikya ha mpero, nitwija kubagana ha birungi bya Kristo. 15Nikyo kyahandiikiirwe kiti: “Kiro kinu obu murahurra iraka lye, mutagumanganiza emitima yanyu nk'abaanyemiire.” 16Nibaha abo abaahuliire, bakagaruka baayema? Tinubo abo boona abaarugire Misiri beebembiirwe Musa? 17Kandi nibaha aba yabiihiriirwe okumara emyaka makumi ana? Tinubo abo abasiisire, kandi emitumbi yabo yagaramirana omwirungi? 18Nibaha aba yarahiriire ngu, tibali b'okutaaha omu buhuumuro bwe? Tinubo abo abaayemere? 19Habweki niturora nkooku baalemerwe kutaaha habw'okutaikiriza kwabo.

will be added

X\