ABAHEBBURAAYO 2

1Nikyo tusemeriire kuta muno omutima hali ebi twahuliire, tutaikara kubirugaho. 2Baitu Ebiragiro ebyagambirwe bamalaika, obu biriba byabaire by'amaani gati, nukwo weena atarukubihondera rundi atarukubihurra akaheebwa ekifubiro ekimusemeriire, 3itwe tulitabuka tuta obu tulinagaija okujunwa okurukwingana aho? MUKAMA nuwe yabandize kukuturangirra, hanyuma abo abaamuhuliire nabo bakatumanyisa okujunwa oku. 4Ruhanga nawe yakugumyaga n'oburorwaho, ebihuniriza, n'ebyamahano ebitali bimu, hamu n'ebisembo bya Mwoyo Ahikiriire ebi agaba nkooku agonza. 5Bamalaika tibali nubo Ruhanga yahaire obusobozi bw'okulema ensi erukugenda kwija, ei turukubazaaho. 6Haroho nambere kyahandiikirwe kiti: “Omuntu kintu ki, Iwe kumwijuka, rundi omwana w'omuntu, Iwe kumutaho omutima? 7Okamumaza akaanya, atakaingaine bamalaika; wagaruka wamujweka ekondo y'ekitiinisa n'ey'okutiinwa, 8wamuha okulema ebintu byona; byona okabita omu mikono ye.” Ruhanga obu yamuhaire okulema ebintu byona, taina na kimu eki ataramuhaire okulema. Baitu kuhika hati, titukarozire ebintu byona nibimuhurra. 9Kwihaho Yesu ogu ayamazire akaanya atakaingaine bamalaika, hati nitumurora ajwaire ekondo ey'ekitiinisa kandi ey'okutiinwa eyamurugiire omu kufa oku yarabiremu; nukwo, habw'embabazi za Ruhanga, akaba naasobora kufa habw'abantu boona. 10Ruhanga anyakuhanga kandi anyakwikazaaho ebintu byona, obu yagondeze kutaahya abantu baingi omu kitiinisa kye, akaba asemeriire kubanza kuhikiriza ogu ayabaleetiire okujunwa naamurabya omu busaalizi. 11Habwokuba ogu anyakweza, aina obuzaale bumu n'abo abanyakwezibwa. Nikyo atakwatirwa nsoni kubeeta bagenzi be, 12naagamba ati: “Ebikubyo byawe ndibirangirra bagenzi bange, ndikunyumiza omu kitebe hagati.” 13Na handi ati: “Ruhanga ndamwesiga.” Kandi ati: “Dora ndi hanu, hamu n'abantu Ruhanga aba yampaire.” 14Nahabweki abaana ab'oruganda rumu nkooku basisaniza omubiri n'esagama, na Yesu nukwo yayefoire muntu nka bo, nukwo habw'okufa kwe asobole kuhwerekereza ogu anyakulema orufu, nuwe Sitaani, 15n'okujuna abo boona abaamazire obwomeezi bwabo omu bwiru bw'okutiina orufu. 16Mazimakwo bamalaika tibali nubo yaizire kujuna, baitu akaija kujuna baijukuru ba Abburahamu. 17Habweki kikamuhikirra kusisana bagenzi be omu buli kintu, nukwo asobole kufooka nyakatagara omukuru, ow'embabazi kandi omwesigwa omu kuheereza Ruhanga, aleherre abantu habw'ebibi byabo. 18Uwe wenyini nkooku yabonabonesiibwe kandi yayohebwa, nikyo arukusoborra kukoonyera abo abarukwohebwa.

will be added

X\