ABAHEBBURAAYO 13

1Mwikalege nimugonzangana nk'ab'oruganda. 2Muteho omutima okukunira abagenyi. Omu kukora eki, abamu bakakunira abamalaika batabamanyire. 3Mwijuke abo abali omu nkomo, nk'abagirumu hamu nabo. Mwijuke n'abo abarukukorwa kubi, habwokuba na inywe mwina omubiri nka bo. 4Abantu boona obuswezi babutemu ekitiinisa, n'ekitabu ky'abaswerangaine kiikale kitasiitaziibwe; habwokuba abanjuka n'abasiihana, Ruhanga alibacwera omusango. 5Omutima gwanyu muleke kugumaliza ha sente. Mwenihire n'ebi mwinabyo, habwokuba Ruhanga akagamba ati: “Tindikurugaho kandi tindikuhemukira.” 6Nikyo turukugambira tutarukugurukyagurukya tuti: “MUKAMA nuwe mukonyezi wange, tinditiina; kiki omuntu eki asobora kunkora?” 7Mwijuke abeebembezi banyu, abo abaabeegeseze ekigambo kya Ruhanga; mwetegereze ebyarugire omu bwomeezi bwabo, mwikirize nkooku baikiriize. 8Yesu Kristo tahinduka nkooku akaba ali ijo, nukwo ali hati, kandi nukwo aliba ebiro byona. 9Muleke kuhabisibwa enyegesa ezitali zimu ezirukuruga hanu na hali; kirungi omutima gugumibwe embabazi za Ruhanga kukira emizizo y'ebyokulya etaragasiire abo abaagihondiire. 10Itwe twina itambiro abo abaheereza omu heema eri batarukwikirizibwa kulyaho kihongwa kyalyo. 11Habwokuba emitumbi ey'ebisoro enyakurugwamu esagama nyakatagara omukuru ei atwara omu kiikaro ekirukwera kuba kihongwa habw'ekibi, emitumbi egi eyokezibwa aheeru y'orusiisira. 12Yesu nawe akabonabonera aheeru y'orubuga, nukwo ayeze abantu n'esagama ye. 13Habweki tuturuke, tumusange aheeru y'orusiisira, twikirize kujumwa habwe. 14Habwokuba hanu titwina bwikaro, baitu nituserra obwikaro oburukwija. 15Nahabweki twikale nituhongera Ruhanga ekyonzira eky'okumukugiza nitukirabya omu Yesu, nikyo kyonzira ky'abo abamwikiriize. 16Mutebwa kukorra abantu ebirungi n'okubagana ebi mwinabyo, habwokuba ebyonzira nk'ebi nibyo Ruhanga asiima. 17Muhurre abeebembezi banyu kandi muboorobere; habwokuba nibarolerra emyoyo yanyu nk'abantu abaligijunaanwa. Eki bakikole n'okusemererwa bataina mutima mubi; kitali eki, ebi barukubakorra tibirukwija kubagasira. 18Mutusabire, habwokuba nitumanya nkooku twina omutima oguteekaine. Nitwenda byona kubihikya kurungi. 19Ninyongera kubeesengereza: munsabire muno, nukwo mbagarulirwe bwango. 20Ruhanga ow'obusinge, ayahumbwire omu bafu MUKAMA waitu Yesu, omuliisa ow'entaama omukuru, ayagumize endagaano etahwaho naaseesa esagama ye, 21abahe ebirungi byona ebi murukwetaaga kuhikya ebi agonza, nukwo akorre omuli inywe ebi arukusiima, naabirabya omu Yesu Kristo anyakusemeriire kuheebwa ekitiinisa ebiro byona. Amiina. 22Ab'oruganda, nimbeesengereza, ebigambo byange eby'okubahabura mubiikirize n'omutima gumu, habwokuba mbifundize. 23Nimbamanyisa mugenzi waitu Timoteho nkooku alekiirwe. Obu alimpikaho bwango, ndija nawe tubarole. 24Mundamukize abeebembezi banyu n'abantu ba Ruhanga boona. Ab'oruganda, enzaarwa za Itale nibabaramukwa. 25Omugisa gwa Ruhanga gwikale na inywe inywena. Amina.

will be added

X\