ABAHEBBURAAYO 12

1Habweki nu, nkooku twehinguliriziibwe ekitibe ky'abakaiso abo boona, na itwe tweiheho ekintu kyona ekirukututanga, n'ekibi kyona ekirukutuboha; kandi twiruke n'okugumiisiriza kalitango enyakutairweho omu maiso gaitu. 2Amaiso tugahangire Yesu omutembuzi kandi omuhikiriza ow'okwikiriza kwaitu. Habw'okusemererwa oku akaba naarora omumaiso yagumiisiriza omusaraba, yagaya ensoni zaagwo, kandi hati asingire ha mukono ogw'obulyo ogw'ekitebe ky'obukama bwa Ruhanga. 3Muteebwa ogu ayagumiisiriize enobi erukwinganaho abasiisi ei baamugiriire, nukwo muleke kujwaha n'okugwa ensazi. 4Omu kurwanisa ebibi, timukabaire kugumisiiriza kuhika ha kuseesa esagama yanyu. 5Kandi obu, mweberwe Ruhanga eki arukubahabura nk'abaana be naagamba ati: “Mwana wange, otagaya okuhana kwa MUKAMA, kandi otaterebuka obu akufubira. 6Habwokuba MUKAMA ou agonza, nuwe ahana; kandi ou ayeta mwana we, nuwe ateera.” 7Okufubirwa kurugwamu okugumiisiriza. Ruhanga abarolerra nk'abaana; kandi mwana ki atafubirwa ise? 8Obu muraaba mutarukufubirwa boona nkooku bafubirwa, buli muli bitwekano, timuli baana kwo. 9Kandi na itwe tukaba twina baisiitwe ab'omunsi abaatufubiraga, twabatamuga ekitiinisa. Titwakukizire muno kuhurra Omuzaire w'emyoyo yaitu, nukwo tukoomera? 10Habwokuba baisiitwe ab'omunsi baatufubiraga okumara akasumi kake nkooku baagonzaaga; baitu Ruhanga atufubira nukwo tube barungi kandi tubagane ha buhikiriire bwe. 11Omu kasumi kanu, okufubirwa kwona nikutusaaliza kwonka, titurukukusiima; baitu abaakuliire omu kufubirwa kunu, kulibarugiramu ebikorwa eby'obuhikiriire n'obusinge. 12Habweki mugumye emikono yanyu erukuteba n'amaju ganyu amaceke. 13Mutemere ebigere byanyu emihanda eterekeriire; nukwo omuli inywe arukucumbagira aleke kuhendekeramu, baitu akire. 14Mwekambe okuba n'obusinge n'abantu boona, kandi mwitanire obuhikiriire, habwokuba nambere butali, tiharoho alirora Ruhanga. 15Mwerinde, hatabaho n'omu arukusubwa obukoonyezi bwa Ruhanga. Hataikara kumera omuli inywe “ekimera ekirukusarra” kikaleeta obutwa oburukurwaza baingi. 16Hatabaho omusiihani rundi arukugaya ebya Ruhanga, nk'Esau ayatunzire obugwetwa bwe habw'ekiihuro ekimu. 17Baitu hanyuma obu yagondeze okugarulirwa omugisa, akangirirwa nkooku murukumanya. Noobu araaba yagusabire narra, baitu atatunge kasumi ak'okwegarukamu. 18Inywe mwijuke nkooku mutairiire haihi orusozi oruroho omurro ogurukwaka, omwirima, ekibunda, ekiyaga, 19iraka ery'engwara, kandi n'iraka eryagambire ebigambo ebyakangire abaabihuliire bayesengereza ngu, haleke kubaho ebigambo ebindi ebiribagambirwa. 20Habwokuba batasobole kwemera ekiragiro ekyatairweho, ekirukugamba kiti: “Buli kihangwa kyona, noobu kyakubaire ekisoro, kakuba nikirra haihi n'orusozi, kiraaterwa amabaale.” 21Mazimakwo ebi baarozire bikaba nibitiinisa muno, nukwo Musa kugamba ati: “Nintukumira habw'obutiini.” 22Baitu hati inywe muhikire ha rusozi Siyoni, na ha rubuga rwa Ruhanga Atafa, Yerusaalemu orw'omwiguru orunyakurumo bamalaika abatarukubarwa abeesoroliize ha bugenyi. 23Mwizire ha rusorrokano orw'emizigaijo eyahandiikirwe omwiguru, muhikire hali omucwi w'emisango Ruhanga owa boona, na hali emyoyo y'abarungi abahikiriziibwe. 24Muhikire hali Yesu omuteeraniza wa Ruhanga n'abantu omu ndagaano empyaka, na ha sagama ye eyaseesekere erukwamirra kukira esagama y'Abeli. 25Mwegendereze, muleke kwanga kuhuliriza Ruhanga arukubaza. Abaayangire kuhuliriza ogu ayabahabwire ali ha rusozi, obu baliba bataratabukire, kiraasura ki itwe kakuba twanga kuhuliriza anyakuhabura naayema omu iguru? 26Obu nubwo iraka lye lyatengeseze ensi; baitu hati araganiize ati: “Ninyija kugaruka kutengesa ensi; teri nsi yonka, baitu n'iguru.” 27Obu yagambire ati: “Ninyija kugaruka kutengesa ensi”, akaba naamanyisa ebihangwa ebyatengesiibwe nkooku birihwaho, nukwo ebitasobora kutengesibwa biikaleho. 28Nahabweki, tusiime Ruhanga habw'okutuha obukama obutasobora kutengesibwa, kandi tumuramye nkooku kimusemeriire nitumuha ekitiinisa kandi nitumutiina, 29habwokuba Ruhanga waitu murro kahwerekereza.

will be added

X\