ABAHEBBURAAYO 11

1Okwikiriza nukwo kurukugumya ebintu ebinihirwa, kandi kurukutunanura ha bintu ebitarorwa. 2Okwikiriza oku nukwo kwaleetiire abantu aba ira okusiimwa Ruhanga. 3Okwikiriza kukatukengesa ensi nkooku yahangirwe ekigambo kya Ruhanga. Nahabweki ebirukurorwa bikahangwa nibiihwa omu bitarukurorwa. 4Habw'okwikiriza, kwe akahongera Ruhanga ekyonzira ekyasiimirwe okukira ekya Kaini, nikyo yasiimirwe yabalirwa omu bahikiriire. Eki Ruhanga akakigumya naikiriza ebi yamuhongiire. Kandi Abeli ogu, noobu aliba yafiire, baitu habw'okwikiriza kwe naakyatwegesa na hati. 5Habw'okwikiriza, Enoka akatwarwa omwiguru atafiire; kandi atagaruke kuzooka habwokuba Ruhanga nuwe yamutwaire. Obu akaba atakatwairwe, akasiimwa Ruhanga nkooku kyahandiikirwe. 6Nambere hatali kwikiriza, omuntu tasobora kusiimwa Ruhanga. Weena anyakwirra haihi Ruhanga asemeriire kumwikiriza nkooku aroho kandi aheera abo abamuserra. 7Habw'okwikiriza, Noha obu yahabwirwe Ruhanga namwoleka ebirukwija kubaho, akahurra kurungi, yakora eryato erikooto ery'okujuna eka ye. Habw'okwikiriza kwe, akasingisa ensi omusango, yafooka mugwetwa w'obuhikiriire obuleetwa okwikiriza. 8Habw'okwikiriza, Abburahamu akahurra obu yayesirwe okuruga owaabu agende omunsi ei ekaba naija kuheebwa. Akaimukya orugendo atarukumanya h'arukugenda. 9Habw'okwikiriza akaikara omunsi ei yaraganiziibwe ali nk'omunyaihanga omunsi egi, yararaaga omu heema nka Isaaka na Yakobbo oku baakozire, nubo abaagwetirwe hamu nawe ebyaraganiziibwe. 10Akaba naategereza orubuga orwina emisingi egumire, orwayombekerwe kandi orwakozirwe Ruhanga. 11Habw'okwikiriza, Saara akasobora kutwara enda noobwakubaire akaba ahingwize emyaka ey'okuzaara, habwokuba akaikiriza ogu ayamuraganiize nkooku ali mwesigwa. 12Habweki omusaija ogu omu, ow'akaba ahoireyo ati, akarugwamu abaijukuru baingi abarukwingana enyunyuuzi eza haiguru, kandi abali nk'omusenyi ogutarukubarwa ogwa ha musa gw'enyanja. 13Abo boona bakafa nibaikiriza batakatungire ebyaraganiziibwe, baitu bamazire kubirebera hara n'okubigirra ekihika, nibeemanya nkooku bali banyamahanga kandi bazaahisiibwe omunsi. 14Ningira abarukwemanya bati nibooleka nkooku barukuserra obuzaarwa bwabo. 15Kakuba baajuzire ensi ei baarugiremu, baakusoboire kugarukayo. 16Baitu bbo nibeegomba ensi erukukiraho oburungi, niyo ey'omwiguru. Nahabweki Ruhanga tarukukwatwa nsoni kwetwa Ruhanga wabu, habwokuba nuwe yabateekaniriize orubuga. 17Habw'okwikiriza, Abburahamu obu yalengerwe, akahayo Isaaka. Nukwo kugamba, ogu ow'akaba ahairwe endagaano akaikiriza okutamba omwana we omu wenka 18ayagambirweho ati: “Isaaka nuwe alikurugiramu abaijukuru.” 19Abburahamu akagumya Ruhanga nkooku asobora kuhumbuura abantu noobu baraaba bafiire; nikyo Abburahamu yagaruliriirwe omwana we, nk'anyakurugire omu bafu. 20Habw'okwikiriza, Isaaka akasabira Yakobbo na Esau emigisa akasumi kayo katakahikire. 21Kandi habw'okwikiriza, Yakobbo obu akaba ali haihi kufa, abaana boona ba Yosefu akabasabira omugisa ainamire ha ntuli y'omwigo gwe naaramya Ruhanga. 22Habw'okwikiriza, Yosefu obu akaba ali haihi kufa, akaranga Abaisirairi nkooku baliruga omunsi ya Misiri kandi yaragira omulingo balimuziikamu. 23Habw'okwikiriza, Musa obu yazairwe, abazaire be bakamuserekera ameezi asatu. Habw'okurora omwana ali murungi, batatiine kiragiro ky'omukama w'ensi egi. 24Habw'okwikiriza, Musa obu yakuzire, akanga kwetwa mutabani wa muhara wa Faraaho, 25yasiima kukorwa kubi hamu n'abantu ba Ruhanga, okukira okwegondeza omu kusemererwa kw'ekibi okumara akacu kake. 26Akateekereza okujumwa habwa Kristo nkooku kiri ky'omuhendo okukira obuguuda bwona obwa Misiri. Omutima gwe akaba agutaire ha mpeera ei aliheebwa. 27Habw'okwikiriza akaruga Misiri atarukutiina kiniga ky'omukama wayo; akagumira kimu nk'arukurora Ruhanga Atazooka. 28Habw'okwikiriza akataho obugenyi bw'okuhingurwaho yamiisira emiryango esagama, nukwo Omuhwerekereza ow'abaana b'emizigaijo aleke kukoraho Abaisirairi akabi. 29Habw'okwikiriza, abantu bakacwanganiza Enyanja Erukutukura nk'abarukurubata ha bwerre; baitu Abamisiri obu baalengereho kukora bati, amaizi gakabaita. 30Habw'okwikiriza, ebisiika by'orubuga Yeriko bikagwa bimazire kugotwa kumara ebiro musanju. 31Habw'okwikiriza, Rahaabbu malaaya ataitwe hamu n'abeemi abo, habwokuba akakunira entasi. 32Hati ebindi ngambe ki? Tinyina kasumi ak'okubazaaho Gidyoni, Baraki, Samusooni, Yefuta, Daudi, Samwiri n'abarangi 33abo abaasingwire abakama abatali bamu habw'okwikiriza, baakora ebihikire nikyo baatungire Ruhanga ei yaraganiize, baigara akanwa k'entale, 34baaraaza omurro ogurukumekuka, baatabuka empirima ez'obwogi, obuceke bwabo bwabarugiramu amaani, baafooka manzi omu bulemu, baabinga amahe ag'abanyamahanga. 35Abakazi baagarulirwa abaabu abaahumbukire omu bafu. Abamu bakacanzibwa baayanga kulekerwa, nukwo basobole kuhumbuurwa bataahe omu bwomeezi oburukukiraho oburungi. 36Abamu bakaswahirizibwa baateerwa enkoba, hamu n'okubohwa omu njegere n'okuteebwa omu nkomo. 37Bakabateeza amabaale, bakasarwamu habiri n'emisumeeno, bakabaisa empirima; baagendaga bajwaire ebisaato by'entaama n'eby'embuzi, bali mpwerwa, nibabonabonesibwa, nibakorwa kubi 38ensi bakaginuga habwokuba etabasemerre baajeerajeeraga omu marungu n'omu nsozi, nibaikara omu maingira n'omu maina g'ensi. 39Abo boona noobu baraaba baasiimirwe habw'okwikiriza kwabo, baitu batatunge ebyaraganiziibwe, 40habwokuba Ruhanga akaba atuteekaniriize kara ekintu ekirukukira oburungi, nukwo itwena tuhikiririzibwe hamu.

will be added

X\