ABAHEBBURAAYO 10

1Ebiragiro bya Musa tibirukutwoleka ebirungi byonyini ebirukugenda kwija, baitu kisisani kyabyo. Ebiragiro eby'emigenzo ey'okuhonga ebyonzira buli mwaka, tibisobora kweza abo abanyakuramya. 2Ebiragiro obu biraaba byasoboire kubeeza, ebyonzira ebi tibyakulekiirwe kutambwa? Abanyakuramya obu baraaba baayeziibwe omurundi gumu baamara, tibaakwongiire kwemanyaho ebibi. 3Baitu okuhonga ebyonzira ebi buli mwaka kuba nikwijukya abantu ebibi byabo. 4Habwokuba esagama ey'enimi n'ey'embuzi tesobora kwihaho bibi. 5Kristo obu yaizire omunsi, nikyo yagambiire ati: “Ebyonzira n'ebihongwa tobyenda, baitu okanteekaniriza omubiri, 6Ebihongwa ebyokeze kandi ebiheebwayo habw'ebibi tobyetaaga. 7Na nyowe nukwo kugira nti: ‘Ai Ruhanga, dara nyowe, nyizire kukora ebi orukwenda’, nkooku kyampandiikirweho omu kitabu ky'Ebiragiro.” 8Aho nambere yagambiire ati: “Toyenda kandi toyetaaga byonzira n'ebihongwa, noobu byakubaire ebihongwa ebyokeze kandi ebiheebwayo habw'ebibi” (ebi nibyo bihongwa ebisangwa omu Biragiro), 9akongera yagamba ati: “Dara nyowe, nyizire kukora ebi orukwenda.” Kristo nukwo yadibize ati ebyonzira eby'okubanza, agumye ekyonzira ekye, 10Kandi Kristo habw'okukora Ruhanga ebi yayenzire, itwe tukeezibwa omubiri gwe ogwahongerwe omurundi gumu kyahwa. 11Buli nyakatagara ayemerra buli kiro naakora omulimo gwe, aikara naahonga ebyonzira ebi ebitasobora kwihaho bibi. 12Baitu Kristo obu yamazire kuhonga ekyonzira kimu eky'ebiro byona habw'ebibi, yaikarra ha mukono gw'obulyo ogwa Ruhanga. 13Okuruga obu, aikara naategereza okuhika abanyanzigwa be Ruhanga obu alibafoora akatebe k'ebigere bye. 14Omu kuhonga ekyonzira ekimu eki, abo aba ayeza akabahikiriza ebiro byona. 15Mwoyo Ahikiriire nawe naatunanura. Okubanza akagira ati: 16“MUKAMA akagamba ati: Akasumi ako obu kalihwaho, enu niyo ndagaano ei ndiragaana nabo: Ndita Ebiragiro byange omu mitima yabo, kandi mbihandiike omu biteekerezo byabo.” 17Kandi yayongera ati: “Tindigarukira kwijuka ebibi byabo n'ensobi zabo.” 18Ebibi obu bimara okuganyirwa, haba hatakyaroho kubihongerra. 19Habweki ab'oruganda, nitunihira okutaaha Ekiikaro Ekirukwera habw'esagama ya Yesu, 20nituraba omu muhanda omuhyaka ogu yatutemiire kandi oguraba omu nyigamo eyomiire, nugwo mubiri gwa Kristo. 21Itwe abaina nyakatagara omukuru arukurolerra Enju yoona ya Ruhanga, 22katwirre Ruhanga haihi twina omutima ogw'amazima n'okwikiriza okugumire. Emitima yaitu emazire kusemezibwa, erugire omu biteekerezo ebibi, kandi emibiri yaitu eyogiibwe n'amaizi amarungi, 23katugumire ha kunihira oku twinakwo tutarukutengeta, habwokuba Ruhanga ayaraganiize, mwesigwa. 24Katurole nkooku tusobora kwekambisangana omu ngonzi n'omu bikorwa ebirungi, 25tutarukuba bagara omu kwesorooza kusaba, abamu nkooku bakora; baitu twimukyangane, okukira muno obu murukurora Ekiro nikirra haihi. 26Kakuba twongera kusiisa, kunu tumazire kumanya amazima, haba hatakyaroho kyonzira eky'okwihaho ebibi; 27baitu haba haroho kulindirra n'obutiini omusango ogulicwibwa n'ekibabu ky'omurro ogulimarraho kimu abeemi. 28Omuntu anyakucwa Ebiragiro bya Musa obu arumurizibwa bakaiso babiri rundi basatu, aitwa hatali kuganyirwa. 29Nimuteekereza omuntu ayagayire Omwana wa Ruhanga, yafurungura esagama ey'endagaano eyamwereze, yabiihiza Mwoyo ow'embabazi, ogu alitunga ekifubiro ekirukwinganaha? 30Ningira nitumanya ayagambire ati: “Okuhoora enzigu kwange, ninyowe ndihoora.” 31Kintu kya mahano okugwa omu mikono ya Ruhanga omwomeezi. 32Mwijuke ebiro ebyahingwire obu mwamazire kumulikirwa, mukabanza kurwana n'amaani nimugumiisiriza emihito. 33Obundi n'obundi mukeemerezibwa omu maiso g'abantu, babajume kandi babasaalize. Obundi mwabalirwaga omuli abo abaajumirwe bati. 34Habwokuba mwagirraga abanyankomo embabazi, mwaikirizaaga n'omutima gumu kunyagwa ebintu byanyu, ningira mukaba nimumanya nkooku mwina itungo erirukukiraho oburungi kandi eritahwaho. 35Nahabweki muleke kusiisa obwesige bwanyu obulibarugiramu empeera enkooto. 36Nimwetaaga kugumiisiriza, nukwo mukole Ruhanga ebi agonza kandi mutunge ebi yaraganiize. 37Kikahandiikwa kiti: “Hasigaire akasumi kake, ogu arukwija aije, kandi tarukwija kukerererwa; 38omuheereza wange omwesigwa aligumira ha kwikiriza, baitu obu aligaruukirra, omwoyo gwange tigulimusiima.” 39Itwe tituli omuli abo abagaruukirra bakahwerekerra, baitu tuli omuli abo abaina okwikiriza, bakajuna emyoyo yabo.

will be added

X\