ABAHEBBURAAYO 1

1Ira Ruhanga yabalizaaga baisenkuruitwe omu miringo nyingi kandi etarukusisana, naaraba omu barangi; 2baitu omu biro binu ebirukumalirra, itwe atugambiriire omu Mwana, ou yataireho abe mugwetwa w'ebintu byona, kandi omuli uwe nuho yahangirre ensi. 3Nuwe kwangasana kw'ekitiinisa kya Ruhanga, kandi kisisani kyonyini eky'obwaruhanga bwe, iguru n'ensi abihangiize n'ekigambo kye ky'obusobozi. Obu yamazire kukora eky'okwogyaho ebibi, yaikarra omwiguru ha mukono gw'obulyo ogwa Ruteerengwa, 4naakirra kimu bamalaika obukuru, nk'ibara yarukirwe oku lirukukira agaabo ekitiinisa. 5Malaika ki Ruhanga ou aragambire ati: “Iwe oli Mwana wange, nakuzaara kiro kya hati”? Rundi ati: “Nyowe ndiba Ise, nawe abe Mwana wange”? 6Kandi obu yaleesire omuzigaijo omunsi akagamba ati: “Bamalaika ba Ruhanga boona bamuramye.” 7Ha bamalaika, Ruhanga akagamba ati: “Nuwe arukuhindura bamalaika miyaga, kandi abaheereza be ndimi z'omurro.” 8Baitu ha Mwana agamba ati: “Ai Ruhanga ekitebe kyawe, kiikaraho ebiro n'ebiro, omwigo ogw'obwinganiza nugwo mwigo ogw'obukama bwawe. 9Okagonza obuhikiriire, wanoba obubi; nikyo Ruhanga, Ruhanga wawe yakusorooliire, yakuha ekitiinisa kukira bataahi baawe.” 10Kandi ati: “Ai MUKAMA, omu kubanza niiwe wataireho omusingi gw'ensi, kandi iguru, mulimo gw'engaro zawe; 11ebi birihwaho, baitu Iwe olisigaraho, byona birikura nk'ekijwaro, 12olibikuba nk'esuuka, kandi birihindurwa nkooku bahindura ekijwaro. Baitu Iwe tohinduka, kandi emyaka yawe terihwaho.” 13Malaika ki ou aragambire ati: “Ikarra ha mukono gwange ogw'obulyo, okuhika abanyanzigwa baawe obu ndibafoora akatebe k'ebigere byawe”? 14Bamalaika boona teri myoyo erukuheereza Ruhanga? Enyakutumwa kuheereza abo abali b'okujunwa?

will be added

X\