ABAGALATIYA 6

1Bagenzi bange, kakuba omuntu agwa omu nsobi, inywe abaina Mwoyo Ahikiriire mumwimukye n'omutima gw'embabazi. Mwerinde, na inywe timwikara kwohebwa muti. 2Mujunangane obulemeezi bwanyu, nukwo muhikirize Ekiragiro kya Kristo. 3Kakuba omuntu ayebara kuba w'omugaso, kandi kunu talikwo, aba naayebiiha. 4Baitu leka buli omu ayekebiije ebikorwa bye, nukwo abe n'obulyo obw'okwenyumiza, hatali kwenyumiriza hali mutaahi we. 5Habwokuba buli omu alyetweka omugugu gwe. 6Leka ogu arukwega ekigambo kya Kristo, abagane ebirungi bye byona n'ogu arukumwegesa. 7Muleke kubiihwabiihwa; Ruhanga tateburwa. Kyona omuntu eki asiga, nikyo aligesa. 8Habwokuba ogu anyakusiga omu mubiri gwe, omu numwo aligesa okufa; baitu ogu anyakusiga omu Mwoyo wa Ruhanga, omu Mwoyo numwo aligesa obwomeezi obutahwaho. 9Tuleke kugarukirra omu kukora ebirungi, habwokuba akasumi obu kalihika tuligesa, kusangwa tutaterebuka. 10Nukwo nu, obu tukyaina omwanya, tukorre abantu boona ebirungi, kandi okukira muno abo ab'oruganda orw'abaikiriza. 11Murole nkooku ndukubahandiikira omu nyuguta enkooto n'omukono gwange nyenka. 12Abo abagonza okwezookesa kurungi omu by'omubiri, nubo babahambiriza kusarwa. Eki bagenderra kiri kimu kyonka ngu, baleke kuhiiganizibwa habw'omusaraba gwa Kristo. 13Nangwa n'abaasazirwe abo bonyini nabo tibahikiriza Ebiragiro bya Musa; baitu bagonza inywe musarwe, nukwo basobole kwenyumiriza habw'emibiri yanyu. 14Nikikafuuhe nyowe kwenyumiza, ntenyumiriize omu musaraba gwa MUKAMA waitu Yesu Kristo, ogwaleetiire ensi kubambwa habwange, na nyowe kubambwa habwayo. 15Okusarwa rundi okutasarwa tikwina mugaso, baitu eky'omugaso nukwo kufooka kihangwa ekihyaka. 16Obusinge n'embabazi bibe hali boona abarukuhondera eki mbahabwire, nubo Abaisirairi ba Ruhanga. 17Okuruga hati haleke kubaho n'omu arukuntuntuza; habwokuba nyowe nyina enkojo za Yesu ha mubiri gwange. 18Bagenzi bange, omugisa gwa MUKAMA waitu Yesu Kristo gwikale na inywe. Amiina.

will be added

X\