ABAGALATIYA 5

1Kristo akatwiha omu bwiru yatuha obugabe; nahabweki mugume, muleke kugaruka omu kikoligo ky'obwiru. 2Hati nyowe Paulo nimbagambira nti: Kakuba musarwa, Kristo taina eki alisobora kubagasira. 3Ninyongera kukigumya nti: Weena anyakwikiriza kusarwa, asemeriire kukwata Ebiragiro byona. 4Baitu inywe abarukugonza kuhikirizibwa Ebiragiro, nimwebaganiza hali Kristo, mwaruga ha mbabazi ze. 5Kandi itwe abarukwikiriza, tutegereza kandi tunihira kutunga obuhikiriire oburukuleetwa Mwoyo Ahikiriire. 6Obu tuba tuli omu Kristo Yesu, okusarwa n'okutasarwa tikwina mugaso. Eky'omugaso nukwo kwikiriza okurukukozesibwa engonzi. 7Mukaba nimugenda kurungi! Hati nooha ayabatangire kworobera amazima? 8Okubiihabiihwa oku kutaruge hali ogu ayabeesire, nangwa. 9Mwijuke ekitumbisa ekike nkooku kirukutumbisa ihyanga lyona. 10Nimbeesiga omu Mukama nkooku mutarukwija kwikiriza ebindi ebitali byange. Kandi ogu arukubatuntuza, noobu araaba ali ata, baitu alicwerwa omusango. 11Hati bagenzi bange, kakuba mba ninkyayegesa abantu kusarwa nkooku njunaanwa, habwaki bakyampiiganiza? Baitu obu kiraaba kiri kiti, enyegesa yange ey'omusaraba gwa Kristo eba etakyali nkonge. 12Nyowe naakugondeze abo abarukubatuntuza beegoole bonka! 13Bagenzi bange, inywe mukateerwa obugabe; kyonka obugabe bwanyu mutabufoora byekwaso by'okukora omubiri ebi gugonza, baitu muherezangane omu ngonzi. 14Ningira Ebiragiro byona bihikirizibwa omu kiragiro ekigamba kiti: “Ogonzeege mutaahi waawe nkooku oyegonza wenka.” 15Baitu obu muraaba nimunenangana kandi nimulyangana, mwerinde mutamaranganaho. 16Nyowe nimbagambira nti: Mugendege nimwebemberwa Mwoyo Ahikiire, muleke kutwalirizibwa omubiri ebi gwegomba. 17Ebi omubiri gwegomba birwanisa Mwoyo, kandi Mwoyo ebi agonza birwanisa omubiri. Ebi byombi birwanisangana, nukwo mutasobora kukora ebi mwakugondeze. 18Kakuba mwebemberwa Mwoyo, buli muba mutakyalemwa Biragiro bya Musa. 19Ebikorwa by'omubiri nibyeyoleka, nibyo binu: obusiihani, eby'obuhemu, orwanju, 20okuramya abacwezi, oburogo, enkungani obunyanzigwa, ihali, ekiniga, okwegonza, empaka, okweyahuranamu, 21itima, obutamiizi, ebisimba by'obutamiizi, n'ebindi ebirukusisana biti. Nimbahabura nkooku nabahabwire kara, abo abakora ebintu nk'ebi, tibaligweterwa bukama bwa Ruhanga. 22Baitu ebirungi ebinyakuzooka omu muntu anyakwina Mwoyo nibyo binu: engonzi, okusemererwa, obusinge, okugumiisiriza, embabazi, oburungi, obwesigwa, 23obuculeezi n'okwetanga. Ebintu nk'ebi tibiina kiragiro ekirukubitanga. 24Abantu ba Kristo Yesu, bakabamba ha musaraba omubiri gwabo n'okwegomba kwagwo okubi, hamu n'amairu gaagwo. 25Obu turaaba nitwomeezibwa Mwoyo, leka nuwe atwebembere mu byona. 26Baitu tuleke kwekuliriza, kwenderezangana, n'okugirrangana ihali.

will be added

X\