ABAGALATIYA 4

1Eki ndukugenderra nkinu: omugwetwa, obu aba akiri mwana muto, taina eki akiza omwiru, kandi kunu nuwe aliba mukama w'ebintu byona. 2Baitu aikara naaroleererwa abaleezi n'abakuza okuhika ha kasumi ise yataireho. 3Na itwe nukwo tuli tuti. Obu tukaba tuli abaana bato, twalemwaga embandwa za kara ez'ensi. 4Baitu akasumi obu kaahikire, Ruhanga yatuma Omwana we, ayazairwe omukazi. Akazaarwa naalemwa Ebiragiro, 5nukwo acungule abo abaalemwaga Ebiragiro, tusobole kufoorwa baana b'omu ka ya Ruhanga. 6Kandi itwe, habw'okuba baana, Ruhanga akatuma Mwoyo wa Mwana we omu mitima yaitu nayamirra ati: “Abba! Isiitwe!” 7Nahabweki tokyali mwiru, baitu oli mwana, kandi nkooku oli mwana, buli oli mugwetwa, nukwo Ruhanga naija kukuha ebi ayaahurra abaana be. 8Kara obu mukaba mutamanyire Ruhanga, mwali bairu b'ebitaroho; 9baitu hati nkooku murukumanya Ruhanga kandi nawe naabamanya, musobora muta kugarukira embandwa eza ira ezitaina maani kandi ensungamirizi? Nimwenda kwefoora bairu baazo obwakabiri? 10Inywe abarukuta omutima ha biro, ha meezi, ha busumi, na ha myaka! 11Ninsaalirwa kurora nkooku, natalibaniire busa habwanyu. 12Bagenzi bange nimbeesengereza, mube nka nyowe; habwokuba na nyowe nkeefoora nka inywe. Timwina kabi aka mwankoliire. 13Kandi mukimanyire kurungi ngu, endwara yange egi, niyo yandeeteriize kubarangirra Amakuru Amarungi omurundi gw'okubanza. 14Endwara egi noobu eraaba yabatalibaniize, baitu mutannuge kandi mutanyekanase. Kyonka mukanjwahukirra nka malaika wa Ruhanga, rundi nka Kristo Yesu wonyini. 15Okusemererwa oku mwagizire omu mitima yanyu kukagya nkaha? Nyowe ningumya nti: Mwakubaire mweihiremu amaiso ganyu mugampa, kakuba kyasobokere. 16Mara hati nfookere munyanzigwa wanyu habw'okubagambira amazima? 17Abantu abo babahaahira kwonka, baitu tibabagondeza birungi. Benda kubaanyahukanizaho, nukwo na inywe mubagonze. 18Kirungi kugonzebwa abantu habw'ebi murukukora, baitu leka babagonze butoosa, hatali kubasoonasoona obu mba ndi na inywe bwonka. 19Niinywe baana bange, aba ngarukire kusaalirirwa nk'omukazi arukuzaara, okuhika Kristo obu araatondeka omuli inywe. 20Naakugondeze kuba na inywe hati, nukwo mpingiseho emigambire yange, habwokuba nintuntura muno habwanyu. 21Inywe abarukwenda kulemwa Ebiragiro, kinu mukingambire: Timuhurra Ebiragiro ebi bigamba? 22Ningira kikahandiikwa kiti: Abburahamu akaba aina abatabani babiri: omu akamuzaara ha muzaana, ondi yamuzaara ha mukazi ow'obugabe. 23Baitu omwana w'omuzaana akazaarwa habw'endagaano eyakozirwe Ruhanga. 24Amakuru g'ekyokurorraho eki nugo ganu: abakazi abo ababiri nibamanyisa endagaano ibiri. Omukazi omu akaruga ha rusozi Sinai, yazaara abaana b'obwiru; nuwe Hagari. 25Habwokuba Sinai nurwo rusozi oruli omunsi ya Arabbiya; kandi Hagari naasisanizibwa na Yerusaalemu orw'ebiro binu, na hati ali omu bwiru hamu n'abaana be' 26Baitu Yerusaalemu orw'omwiguru, nurwo mukazi w'obugabe kandi nurwo nyinaitwe. 27Nimwijuka nkooku kyahandiikirwe kiti: “Kyanganuka iwe engumba, etazaara; haguka, otoke iwe atakakwatwaga bisa eby'okuzaara; habwokuba omukazi ayanagaizirwe aina abaana baingi okukira anyakwikara na musaija we.” 28Hati bagenzi bange, na itwe tuli baana abaaraganizibwe nka Isaaka. 29Baitu oli ayazairwe habw'okwegomba kw'omubiri omu kasumi kali, nkooku yahiiganiize ondi ayazairwe habwa Mwoyo Ahikiriire, na hati hoona nukwo kiri. 30Ebihandiko Ebirukwera bigamba bita? Bigamba biti: “Binga omuzaana n'omwana we, habwokuba omwana w'omuzana taligwetwa hamu n'omwana w'omukazi ow'obugabe.” 31Habweki bagenzi bange, tituli baana b'omuzaana, baitu tuli b'omukazi ow'obugabe.

will be added

X\