ABAGALATIYA 3

1Inywe Abagalatiya abadoma! Nooha ayabarogere? Inywe abayolekerwe bwerebwere Kristo nkooku yabambirwe ha musaraba! 2Kambakaguze kimu kyonka: Mukaheebwa Mwoyo habw'okuhikiriza Ebiragiro rundi habw'okwikiriza Amakuru Amarungi aga mwahuliire? 3Muli badomakwo? Mukatandika omu Mwoyo, hati nimwija kumalirra omu mubiri? 4Ebingi byona ebi mwarabiremu, mukabigumiisiririza busa? Obu kiraaba kiri kiti, mazimakwo mukagumiisiririza busa. 5Ruhanga anyakubaha Mwoyo kandi akakorra ebyamahano omuli inywe, ebi si abibakorra nukwo muhikirize Ebiragiro rundi Amakuru Amarungi aga mwahuliire? 6Abburahamu nawe nukwo “yaikiriize ati Ruhanga, kandi kyamubalirwa kuba muhikiriire.” 7Nahabweki nimurora abaikiriza nkooku nubo bali baana b'Abburahamu. 8Kandi Ebihandiiko Ebirukwera obu byarangire kara nkooku Ruhanga alihikiriza Abanyamahanga habw'okwikiriza, byamanyisa Abburahamu, Amakuru Amarungi ganu gatakabaireho, nibigamba biti: “Omuli iwe amahanga goona numwo galiheerwa omugisa.” 9Nukwo kiti abo abaina okwikiriza baheebwa omugisa nk'ogwa Abburahamu ayaikiriize ira. 10Boona abeesiga okworobera Ebiragiro, bali b'okukyenwa; habwokuba kikahandiikwa kiti: “Weena atakwata byona ebihandiikirwe omu kitabu kyebiragiro kandi akabihikya ogu akyeenwe!” 11Baitu nikizookera kimu nkooku hataroho muntu ahikirra omumaiso ga Ruhanga habw'Ebiragiro; habwokuba: “Ogu anyakuhikirizibwa okwikiriza, nuwe alyomeera.” 12Ebiragiro tibisigikira ha kwikiriza: “Habwokuba ogu anyakuhikiriza Ebiragiro, nibyo birimwomeeza.” 13Baitu Kristo akatucungura yatwiha omu mukyeno gw'Ebiragiro obu yafookere mukyenwa habwaitu habwokuba kikahandiikwa kiti: “Weena anyakuhanikwa ha muti, buli akyenerwe.” 14Eki kikakorwa kiti, nukwo omu Kristo Yesu omugisa gw'Abburahamu gusobole kuhikaho Abanyamahanga, na itwe habw'okwikiriza tusobole kutunga Mwoyo ou twaraganiziibwe. 15Bagenzi bange, kambahe ekyokurorraho ekya buli kiro. Tiharoho anyakudibya engwetano y'omuntu noobwakubaire kugyongeraho, emazire kuteebwaho omukono. 16Nukwo ebyaraganiziibwe, Ruhanga akabiraganiza Abburahamu n'omwijukuru we. Hatali kugamba ngu: “N'abaijukuru”, nk'abaingi; baitu nikigamba hali omu, kiti: “N'omwijukuru waawe.” Ogu nuwe Kristo. 17Eki ndukumanyisa nikyo kinu: Ebiragiro ebyaizire haahingwireho emyaka bikumi bbina n'asatu, tibirukudibya endagaano Ruhanga ei yagumize ira, kandi tibirukuburanganiza ekyaraganizibwe. 18Habwokuba obugwetwa, obu buraaba buroho habw'Ebirago, nibuba butakyali bw'endagaano; baitu Ruhanga akabuheera Abburahamu omu ndagaano. 19Hati nu, Ebiragiro bikateerwaho ki? Bikateebwaho habw'okusiisa kw'abantu, okuhika omwijukuru ayahairwe endagaano egi, obu aliija. Kandi Ebiragiro ebi bikarangirirwa bamalaika nibaraba omu muteeraniza (nuwe Musa). 20Omuteeraniza abaho habw'abaingi, baitu Ruhanga ali omu. 21Aho nu Ebiragiro nibihakaniza Ruhanga ebi yaraganiize? Naakake konka. Kakuba twahairwe Ebiragiro ebisobora kwomeeza, mazimakwo obuhikiriire bwakurugure omu Biragiro. 22Baitu Ebihandiiko Ebirukwera, ebi byona bikabibarra omu bwiru bw'ekibi, nukwo eki ekyaraganiziibwe habw'okwikiriza Yesu Kristo, kiheebwe abo abamwikiriza. 23Nukwo nu, okwikiriza obu kukaba kutakaizire, tukaba nitulemwa Ebiragiro. Tukaikara nitulemwa tuti okuhika okwikiriza obu kwatusuukuliirwe. 24Habweki, Ebiragiro bikatulinda okuhika Kristo obu yaizire, nukwo tusobole kuhikirizibwa okwikiriza. 25Baitu hati okwikiriza obu kwizire, titukyalemwa omulinzi ogu owa ira; 26habwokuba inywena muli baana ba Ruhanga omu Kristo Yesu habw'okwikiriza. 27Baingi omuli inywe nkooku mwabatiziibwe omu Kristo, hati nimusisanira kimu Kristo omu ngeso ze. 28Tihakyaroho Muyudaaya rundi Mugiriiki, tihakyaroho mwiru rundi ow'obugabe, tihakyaroho musaija rundi omukazi; habwokuba inywena muli kimu omu Kristo Yesu. 29Obu muraaba muli ba Kristo, muli baijukuru b'Abburahamu, bagwetwa nkooku endagaano erukugamba.

will be added

X\