ABAGALATIYA 1

1Nyowe Paulo omukwenda-ataratairweho bantu noobu kwakuba kutumwa omuntu, baitu ayakomerwe Yesu Kristo na Ruhanga Ise ayamuhumbwire omu bafu 2na bagenzi baitu boona aba ndi nabo, nituhandiikira ebitebe by'abaikiriza abali Galatiya: 3Nitubagondeza omugisa n'obusinge ebiruga hali Ruhanga Isiitwe na hali MUKAMA waitu Yesu Kristo, 4ayayehaireyo kutujuna ebibi byaitu naatwiha omu businge bunu obubi nkooku Ruhanga Isiitwe yagondeze. 5Ruhanga ogu aheebwe ekitiinisa ebiro n'ebiro Amiina. 6Nimpunirra kurora nimuruga bwango hali Ogu ayabeesire habw'embabazi za Kristo, nimwikiriza amakuru agandi. 7Tikuli kugira ngu, haroho amakuru amarungi agandi, baitu haroho abamu abarukubatuntuza kandi nibenda kuramaza Amakuru Amarungi aga Kristo. 8Kakuba itwe, rundi malaika anyakuruga omu iguru akabarangirra amakuru agandi agatali ago aga twabarangiriire kara, ogu akyenwe. 9Nkooku twabagambiire kara, na hati nikyo ndukwongera kubagambira nti: Kakuba omuntu abarangirra amakuru amarungi agatali ago aga mwaikiriize, ogu akyenwe. 10Mara nyowe ninserra kusiimwa abantu Ruhanga? Rundi si ningenderra abantu basiime ebi ndukukora? Obu naakubaire ninkyakora ebirukusiimwa abantu, tinaakubaire muheereza wa Kristo. 11Nahabweki bagenzi bange, ninyenda mumanye ngu, Amakuru Amarungi aga narangiriire tigarugire mu bantu. 12Nyowe ntagaheebwe muntu kandi ntageegesebwe, baitu nkagasuukulirwa Yesu Kristo. 13Na inywe mukahurra eby'obwomeezi bwange obwabandize, nkyali omu diini ey'Ekiyudaaya: nkooku naahiiganiize muno ekitebe ky'abaikiriza Ruhanga, ninyekamba kukihwerekeeza. 14Kandi nkeeyongera muno omu diini ey'Ekiyudaaya, nakira baingi omu bantu ab'ihanga lyange aba nainganaga nabo emyaka, nkeekambira muno emirwa ey'abaisenkuru itwe. 15Baitu ayansoroire ntakazairwe, yanyeta habw'embabazi ze, 16akasiima okunsuukurra Omwana we, nukwo nsobole kumurangirra omu Banyamahanga, nteehanuuze abantu, 17kandi ntagende Yerusaalemu kwehanuuza hali abo abambandize kuba bakwenda; baitu nkagenda Arabiya, hanyuma nagaruka Damasiko. 18Obu haahingwireho emyaka esatu, nagenda Yerusaalemu kurora Keefa, namara nawe ebiro ikumi na bitaano. 19Ntarole n'omu ha bakwenda abandi kwihaho Yakobbo, mugenzi wa Mukama waitu. 20(Omuli ebi ndukubahandiikira, nindahira omu maiso ga Ruhanga nkooku ntarukubiiha bisuba!) 21Nubwo naagenda omu bicweka bya Siriya na Kilikiya. 22Obu, ebitebe by'abaikiriza Kristo ab'omu Bayudaaya bakaba batakandoraga; 23kyonka bakahurra abantu nibagamba bati: “Ogu ayatuhiiganizaaga, hati nuwe arukurangirra enyikiriza ei yalengahoga ira kuhwerekereza.” 24Nukwo bbo kukugiza Ruhanga habwange.

will be added

X\