ABEFEESO 6

1Abaana muhurrege abazaire banyu habwa MUKAMA, habwokuba kihikire. 2“Otiinege sso na nyoko” eki nikyo kiragiro ky'okubanza ekyayongiirweho okunihiza ngu: 3“Noija kuba kurungi n'okugundagunda omu nsi.” 4Na inywe baise-baana muleke kubiihiza abaana banyu, baitu mubooroole omu ngeso nungi nimubeegesa ebya MUKAMA. 5Abairu muhurrege bakama banyu ab'omunsi munu, nimutiina kandi nimwebundaaza n'omutima gumu nk'abarukuhurra Kristo. 6Eki muleke kukikora obu baba babataireho eriiso, nk'abarukwenda kusiimwa abantu, baitu mukikole nk'abairu ba Kristo, nimukora Ruhanga ebi agonza n'omutima gumu. 7Muheereze n'obwekambi nk'abarukukorra MUKAMA hatali bantu. 8Kandi muheereze nimumanya ngu, buli kirungi kyona omuntu eki akora nikyo MUKAMA alimusasurra, noobu araaba ali mwiru rundi w'obugabe. 9Na inywe bakama b'abairu nukwo mubakole muti, muleke kubakanga, mumanye ngu, MUKAMA waabo kandi owaanyu ali omwiguru kandi tasoroora. 10Eky'okumalirra mube b'amaani omu MUKAMA, nimugumibwa obusobozi obw'amaani ge. 11Mujwale eby'okurwanisa byona ebya Ruhanga, nukwo musobole kwemera obugobya bwa Sitaani. 12Itwe titurukurwanisa abantu abaina omubiri n'esagama, baitu niturwanisa amahe ag'emyoyo emibi agali omu biikaro ebya ha iguru, emyoyo ey'abakuru, ey'ab'obusobozi, n'ey'abarukulema ensi enu ey'omwirima. 13Habweki mukwate eby'okurwanisa byona ebya Ruhanga, nukwo musobole kwemera ebiribaho ha kiro ekibi, kandi obu mulimara kukora byona, mwemerre mugumire. 14Nahabweki, mwemerre mwetegere amazima omu nda, kandi mujwaire ha kifuba obuhikiriire nk'ekizibaho ky'ekyoma. 15Mujwale enkaito omu bigere byanyu, mweteekaniize okurangirra Amakuru Amarungi ag'obusinge. 16Okukira byona, mukwate engabu y'okwikiriza ei musobora kuzimisa emyambi yoona ey'Omubi erukwaka omurro. 17Mujwale enkofiira ey'ekyoma ey'okujunwa, kandi mukwate n'empirima eya Mwoyo Ahikiriire, nikyo kigambo kya Ruhanga. 18Obutoosa musabege nimwesengereza Ruhanga okubakoonyera, kandi nimusabira omu Mwoyo Ahikiriire. Eki mukikolege obutalekerra, nimusabira abaikiriza boona, 19kandi na nyowe munsabirege, nukwo ntunge ebi ndaagamba obu ndaabaga nindangirra n'obumanzi ensita ey'Amakuru Amarungi, 20aga ndi ngabwa yago, mboherwe omu njegere; nukwo nsobole kugarangirra n'obumanzi nkooku kinsemeriire. 21Tikiko mugenzi waitu omugonzibwa kandi omuheereza omwesigwa omu MUKAMA araabamanyisa byona; nukwo mumanye nkooku ndi, n'ebi ndukukora. 22Nikyo mmutumiire, mumanye nkooku tuli, kandi abagarre omutima omu nda. 23Obusinge n'engonzi hamu n'okwikiriza ebiruga hali Ruhanga Isiitwa na MUKAMA Yesu Kristo bibe hali ab'oruganda boona. 24Kandi Ruhanga agirre embabazi boona abagonza MUKAMA waitu Yesu Kristo n'engonzi ezitafa.

will be added

X\