ABEFEESO 5

1Nukwo nu, mwesisanizeege Ruhanga nk'abaana be abagonzibwa. 2Mweyongere kugonzangana, Kristo nkooku yatugondeze, yayehayo habwaitu ali kihongwa ekirukuboya kurungi kandi kyonzira hali Ruhanga. 3Baitu obusiihani, obugwagwa bwona, rundi okwegomba okubi tibisemeriire okugambwaho omuli inywe, habwokuba ebi tibisemeriire abantu ba Ruhanga. 4Muleke embazo mbi, rundi embazo ez'obudoma, rundi ez'okusandaara okutahikire. Ebi byona tibibasemeriire. 5Kinu mukimanyiire kimu, nkooku hataroho musiihani, rundi omugwagwa, rundi omwegombi (anyakufoora itungo lye embandwa y'okuramya) arukwija kugwetwa omu bukama bwa Kristo na Ruhanga. 6Mutaikiriza muntu weena kubabiihabiiha n'ebigambo ebitarumu nsa, habwokuba ebi nibyo Ruhanga asigikiraho kukayukira abantu abatamuhurra. 7Nahabweki muleke kuteerana nabo; 8habwokuba ira mukaba muli omu mwirima, baitu hati muli omu musana gwa MUKAMA; mugendege nk'abaana b'omusana. 9(Nambere hali musana nuho hasangwa ebirungi byona, ebihikire kandi eby'amazima.) 10Mwekambire kumanya MUKAMA ebi arukugonza. 11Muteetaba omu bikorwa by'omwirima ebitaina mugaso, baitu mubyoleke bwere bwere. 12Habwokuba ebi bakora omu nsita, bikwasa ensoni n'okubibazaaho; 13baitu ekintu kyona ekirukuturukibwa omu musana kizooka; habwokuba kyona ekizooka kifooka omusana. 14Nikyo kyagambiirwe kiti: “Sisiimuka iwe anyakugwijagiire, kandi ohumbuuke omu bafu, nubwo Kristo araakumulikira.” 15Nahabweki mwerinde muno ebi murukukora, mutaba nk'abantu abataina magezi, baitu mube b'amagezi. 16Mukozese kurungi obusumi obu mwinabwo habwokuba ebiro binu bibi. 17Nukwo nu muleke kuba badoma, baitu mwetegereze MUKAMA ebi arukwenda. 18Kandi muleke kutaamira amarwa, habwokuba galeeta okwenagiriza; baitu mwijule Mwoyo Ahikiriire. 19Nambere mwesorooleza, muzinire hamu zabbuli, ebizina, n'eby'okuhaisaniza Ruhanga, nimuzinira MUKAMA kandi nimumukugiza n'emitima yanyu yoona. 20Obutoosa n'omu byona musiimege Ruhanga Isiitwe, nimujurra ibara lya MUKAMA waitu Yesu Kristo. 21Mworoberangane habw'okutamu Kristo ekitiinisa. 22Baanyinabwenge, muhurrege baiba-inywe nkooku muhurra MUKAMA. 23Habwokuba nyineeka nuwe mutwe gwa nyinabwenge nka Kristo oku ali mutwe gw'ekitebe ky'abaikiriza, nugwo omubiri gwe, kandi nuwe Mujuni wakyo. 24Ekitebe ky'abaikiriza nkooku kiremwa Kristo, nukwo na banyinabwenge balemwege bati baibabo omu byona. 25Baanyinamaka mugonzeege bakazi banyu nka Kristo oku yagondeze ekitebe kye, yayehayo habwakyo, 26nukwo asobole kukihikiriza amazire kukisemeza naakyogya n'amaizi ago hamu n'ekigambo ky'omurwa ogu. 27nukwo akyereetere omu kitiinisa, kitaina kabara noobu gwakuba mugonya, rundi ekindi nk'eki; kiikale kiri kirukwera kandi kitaina kamogo. 28Abasaija nabo nukwo basemeriire kugonza bakazi baabo nkooku bagonza emibiri yabo yonyini. Ogu anyakugonza mukazi we, buli aba ayegondeze wenka. 29Busaho muntu aranobere omubiri gwe; baitu aguliisa kandi agurolerra muno nkooku Kristo arolerra ekitebe ky'abaikiriza. 30Na itwe tuli bicweka by'omubiri gwe. 31“Nikyo omusaija araalekeraga ise na nyina agumire hali mukazi we, kandi ababiri abo bafooke mubiri gumu.” 32Enu niyo nsita nkuru, ei ndukugamba nti: Neemanyisa Kristo n'ekitebe kye. 33Nukwo nu, buli omu omuli inywe agonze mukazi we nkooku ayegonza wenka, kandi n'omukazi atemuga iba ekitiinisa.

will be added

X\