ABEFEESO 4

1Habweki, nyowe omunyankomo habwa MUKAMA, nimbeesengereza: mube n'engeso ezinyakusemeriire omulimo ogu mwayetiirwe, 2nimwebundaaza muno kandi nimuculeera, nimugumiisiriza kandi nimuganyirangana habw'engonzi, 3nimutaho omutima kugumya obumu bwa Myoyo Ahikiriire anyakututeeraniza omu businge. 4Haroho omubiri gumu na Mwoyo omu, nkooku mwina okunihira kumu oku mwayetiirwe. 5MUKAMA ali omu, enyikiriza eri emu, okubatiza kumu. 6Ruhanga nuwe omu kandi Ise boona, anyakukira boona, anyakukora omu boona kandi anyakuli omu boona. 7Baitu buli omu omuli itwe akaheebwa ebisembo nkooku Kristo omu mbabazi ze yamulengiire. 8Nikyo kyagambiirwe kiti: “Obu yatembere omwiguru, akeebembera ihe ly'abo aba yaihire omu bunyagwa, kandi yabaha ebisembo.” 9(Okugamba ngu: “Akatemba”, nikimanyisa ki? Tikirukumanyisa ngu, nawe akabanza kusirimuka okuzimu? 10Ogu ayasirimukire, nuwe omu ayatembere yahingura iguru lyona nukwo aijule hoona hoona.) 11Ebisembo bye akabigaba ati: Abamu babe bakwenda, abamu barangi, abamu barangirizi b'Amakuru Amarungi, abamu baliisa kandi beegesa. 12Ebi nibyo bisembo abaikiriza ebi beetaaga habw'omulimo ogw'obuheereza nukwo bombeke omubiri gwa Kristo 13okuhika itwena obu tulikatunga enyikiriza emu n'okumanya Omwana wa Ruhanga, tukakura kuhika ha bukuru bwonyini obw'orulengo oruhikire orw'obukuru bwa Kristo. 14Nukwo tulekere aho kuba baana abarukutwarwa hanu na hali, abarukuzongazongibwa omuyaga ogwa buli nyegesa enyakuruga omu bukurungutaniza obw'abantu n'omu bucwangya bwabu obw'ebisuba. 15Baitu katubaze aby'amazima ebinyakurumu engonzi. Nukwo tukule omu miringo yoona, tube nk'ogu anyakuli omutwe, nuwe Kristo, 16anyakuteeraniza kandi yasumiikaniza buli rugiga rwona omubiri oru rwahairwe. Nahabweki buli rugiga obu ruba nirukora kurungi, omubiri gukura kandi nigwombekwa omu ngonzi. 17Hati kinu ninkigamba kandi ninkigumya omu MUKAMA nti: Mutongera kwikara nk'Abanyamahanga oku baikara, omu biteekerezo byabu ebitaina mugaso. 18Amagezi gaabu gaswekeriirwe omwirima kandi baahukaniziibwe ha bwoomeezi bwa Ruhanga habw'obutamanya obu bainabwo, obunyakuruga omu kugumangana kw'emitima yabu. 19Bakagumangana baayeheera kimu obusiihani, nibeegomba kukora ekibi kya buli mulingo. 20Inywe, Kristo mutamwege muti, 21rundi buli mukalemwa kumwetegereza kurungi obu mwayegesiibwe amazima agali omu Yesu. 22Mucwe engeso zanyu eza ira ezi mwinazo ezisiisirwe okwegomba okubi okurukuhabisa. 23Mufooke bahyaka omu biteekerezo byanyu n'omu mitima yanyu. 24Mube n'obwomeezi obuhyaka Ruhanga obu arukubahangamu oburukuzookwamu obuhikiriire obw'amazima n'oburukwera. 25Nahabweki mufuuhize kimu ebisuba, buli muntu abazeega amazima na mutaahi we, habwokuba tuli bicweka by'omubiri gumu. 26Kakuba mukwatwa ekiniga, nwerinde mutaasiisa; mutalinaga izooba mukyaina ekiniga. 27Kandi muteeretereza Sitaani mukamuha omwanya ogw'okuboohya. 28Omusuma alekere aho kwiba. Haakire akozese emikono ye emirimo y'omugaso, nukwo asobole n'okugabira abaseege. 29Ekigambo kyona ekibi kitaliruga omu kanwa kanyu. Mubazeege ebirungi byonka ebirukwombeka n'ebirukuhikaana n'ekintu eki muroho, nukwo kireetere omugisa abo abakihurra. 30Kandi muleke kurumya Mwoyo Ahikiriire wa Ruhanga, habwokuba nuwe manyikirizo ei mwatairweho kwoleka nkooku muli ba Ruhanga okuhika ha kiro ky'okucungurwa. 31Obunyanzigwa bwona, ekiniga, okubiihirwa, obwogo, okuhangirra n'itima lyona bibarugiremu kimu. 32Mugirranganege embabazi, mube benda, muganyiranganege nkooku Ruhanga yabaganyiriire omu Kristo.

will be added

X\