ABEFEESO 3

1Nahabweki, nyowe Paulo omunyankomo wa Kristo Yesu habwanyu Abanyamahanga 2ningumya mumanyire nkooku nahairwe obukeeto bw'embabazi za Ruhanga ezi nakwasiibwe habwanyu. 3Nkamanyisibwa ensita egi omu kusuukulirwa, nkooku ndugire kubasoborra omu bigufu. 4Obu muraabisoma nimwija kumanya nkooku nyetegeriize ensita ya Kristo. 5Niyo nsita etaramanyirwe bantu ab'akasumi akandi, nkooku hati Mwoyo Ahikiriire agisuukuliire abakwenda be abarukwera n'abarangi. 6Nukwo kugamba ngu, Abanyamahanga nabo bali bagwetwa hamu na itwe, bicweka by'omubiri gumu, nibabagana ebyaraganiziibwe Kristo Yesu omu Makuru Amarungi, 7Ekisembo eky'embabazi Ruhanga ezi yangiriire, habw'amaani ge agarukukorra omuli itwe, nikyo kyanfoire muheereza w'Amakuru Amarungi ago. 8Nyowe obu ndaaba ndi w'okumalirra omu bantu be boona, baitu nkaheebwa omugisa ogw'okumanyisa Abanyamahanga ebirungi byona ebya Kristo, ebirungi ebitakira kwetegerezibwa. 9N'okumanyisa abantu boona entegeka ey'ensita ye eyaserekerwe kuruga kara omu Ruhanga, ayahangire byona. 10Nukwo hati abamalaika abalemi n'ab'obusobozi abali omu biikaro eby'omwiguru basobora kurorra ha kitebe ky'abaikiriza amagezi goona aga Ruhanga. 11Eki akakitegeka kuruga kara koona kandi yakihikiririza omu Kristo Yesu MUKAMA waitu, 12ou tutungiramu obumanzi n'obwesige obutuhikya hali Ruhanga habw'okwikiriza. 13Nukwo nu, nimbasaba muleke kuterebuka habw'emihito ei ndukubona habwanyu, emihito egi neebahaisa ekitiinisa. 14Habw'obulyo obu, ninteereza Isiitwe amaju 15nambere haruga enganda zoona ez'omwiguru n'omunsi, 16kandi nimmusaba habw'ekitiinisa kye ekingi emitima yanyu agigumye n'amaani ga Mwoyo we. 17Nukwo Kristo ogu aikale omu mitima yanyu habw'okumwikiriza Na inywe obu mulikamara kuhamira kimu kandi mukagumibwa omu ngonzi, 18nubwo mulisobora okwetegereza hamu n'abahikiriire boona: obugazi, obura okugenda ha iguru, n'okuhama kw'engonzi ze. 19Ego, kandi n'okumanya engonzi za Kristo ezitasobora kwetegerezibwa magezi g'abantu, nukwo mwijurre kimu Ruhanga. 20Ogu anyakusobora kukora bingi kukira byona ebi tumusaba rundi ebi tuteekereza, 21aheebwe ekitiinisa ebiro byona omu kitebe ky'abaikiriza n'omu Kristo Yesu, ebiro n'ebiro. Amiina.

will be added

X\