ABEFEESO 2

1Kandi na inywe akabomeeza bu mukaba mufeeriire omu nsobi n'omu bibi, 2ebi mwakoraga ira nimuhondera emihanda y'ensi enu, nimukuraatira omukuru ow'emyoyo emibi ey'omu mwanya gw'iguru, hati nugwo mwoyo ogurukukorra omu baana entahurra. 3Ira na itwe tukaba tubarumu nitukuraatira okwegomba okw'omubiri, nitukora ebi ebyegombwa omubiri n'ebiteekerezo byaitu. Nahabweki omu buzaaranwa tukaba tuli bantu b'okukyenwa Ruhanga nk'abandi boona. 4Baitu Ruhanga ow'embabazi nyingi, habw'engonzi ezitagambwa ezi yatugondezeemu, 5noobu tukaba tuferiire omu nsobi zaitu, baitu akatwomeeza hamu na Kristo, (embabazi ze nizo zaabajunire). 6Akatuhumbuura nawe, yatwikaliza hamu omu biikaro eby'omu iguru, 7nukwo omu businge obuliija asobole kwoleka obwingi bw'embabazi ze habw'ebirungi ebi arukutukorra omu Kristo Yesu. 8Inywe mukaikiriza mwajunwa habw'embabazi za Ruhanga. Eki mutakyekorre inywenka, baitu kisembo kya Ruhanga. 9Atakibahe habw'ebi mwakozire, haleke kubaho arukwenyumiza. 10Habwokuba nuwe yatubumbire. Tukahangirwa omu Kristo Yesu nukwo tukole ebikorwa ebirungi Ruhanga ebi yategekere kara. Nibyo twikalege nitukora. 11Habweki, inywe Abanyamahanga omu buzaarwa, mwijuke abo abaakozirweho kara omukoro ogw'okusarwa omubiri nkooku baabeetaga abatasazirwe. 12Kandi mwijuke omu kasumi ako nkooku mukaba mutaina Kristo, mwahukaine n'oruganda rwa Isirairi, mutaina bukwatane n'endagaano ezaaraganizibwe, mutaina kunihira kandi mutaina Ruhanga omu nsi enu. 13Baitu hati, habwa Kristo Yesu, inywe abakaba bali hara muno, esagama ye ebairiize haihi, 14habwokuba nuwe businge bwaitu, ayatufoire itwembi Abayudaaya n'Abanyamahanga kuba omu. Kandi nuwe yaseesire ekisiika eky'obunyanzigwa ekyatubaganizaaga. 15Akahayo omubiri gwe okudibya Ebiragiro n'ebindi ebyatairweho, nukwo omu Banyamahanga n'omu Bayudaaya ahangemu omuntu omuhyaka, kandi omuli uwe abakaba bali babiri abafoole muntu omu, naagarra ati obusinge, 16Kandi itwembi atugarukanganizemu na Ruhanga, tube mubiri gumu habw'omusaraba nambere yahwerekeriize obunyanzigwa. 17Akaija yarangirra obusinge hali inywe abakaba bali hara, na hali abo abakaba bali haihi; 18habwokuba itwembi abaina Mwoyo omu, turaba omu Kristo kuhika hali Isiitwe. 19Nukwo nu, timukyali banyamahanga rundi bagonyi, baitu muli abaikazi hamu n'abantu ba Ruhanga boona, kandi muli b'omuka ya Ruhanga. 20Muli kicweka ky'ekyombeko ekirukwombekwa ha musingi gw'abakwenda n'abarangi. Kristo Yesu niryo ibaale erikuru ery'obugumizo bw'enju. 21Omuli uwe nuho ekyombeko kyona kiteeranirizibwa kifooka Enju erukwera ya Ruhanga, nambere MUKAMA asinga. 22Omuli uwe, na inywe numwo mwombekiirwe omunju nambere Ruhanga aikara hamu na Mwoyo Ahikiriire.

will be added

X\