ABEFEESO 1

1Nyowe Paulo, Omukwenda wa Kristo Yesu, Ruhanga nkooku yasiimire, nimpandiikira abantu abeesigwa ba Ruhanga abahindukiire Kristo omu Efeeso. 2Nimbagondeza emigisa n'obusinge ebiruga hali Ruhanga Isiitwe na hali MUKAMA Yesu Kristo. 3Ahaisanizibwe Ruhanga, Ise MUKAMA waitu Yesu Kristo, ayatuheeriire omu Kristo emigisa yoona ey'omwoyo enyakuruga omwiguru. 4Ruhanga akatukomera omu Kristo ensi etakahangirwe, tube barukwera kandi abataina kamogo omumaiso ge. 5Habw'okutugonza akatukoma kara tufooke baana be omu Kristo Yesu, entegeka ye nkooku ekaba eri. 6Eki akakikora nukwo tusiime embabazi ze ez'ekitiinisa ezi yatugiririire busa omu Mugonzibwa we. 7Omuli uwe numwo tucungulirwa habw'okufa kwe, tuganyirwa ensobi zaitu habw'embabazi ze enyingi 8ezi yatugiriire. 9Omu magezi goona n'omu kwetegereza kwona Ruhanga akatumanyisa entegeka ei yasiimire, niyo nsita ei yatwolekiire omu Kristo. 10Kandi niyo entegeka ey'okuteeraniza ebintu byona omu Kristo: eby'omwiguru n'eby'omu nsi, akasumi obu kalihika. 11Itwe Abayudaaya abaabandize kunihira omu Kristo, tukasoroorwa, twakomwa, 12ka twikale nituhaisaniza ekitiinisa ky'ogu anyakuhikiriza byona, Ruhanga nkooku ategeka kandi asiima. 13Na inywe Abanyamahanga abaahuliire ekigambo eky'amazima, nugo Amakuru Amarungi ag'okujunwa kwanyu omuli uwe, mukaikiriza, mwateebwaho emanyikirizo ya Myoyo Ahikiriire ayaraganiziibwe. 14Mwoyo ogu nuwe musimbo ogw'obugwetwa bwaitu okuhika obu tulibutunga, nukwo ekitiinisa kye kihaisanizibwe. 15Nahabweki obu mpuliire nkooku murukwikiriza MUKAMA Yesu kandi nkooku murukugonza abaikiriza boona, 16tindukulekerra kusiima Ruhanga habwanyu, nimbaijuka omu kusaba kwange. 17nukwo Ruhanga wa MUKAMA waitu Yesu Kristo, Isiitwe ow'ekitiinisa abahe omwoyo ogw'amazima n'ogw'okwetegereza ebyasuukwirwe, nukwo mumumanye. 18Obu alimara kumulikira emitima yanyu musobole kumanya amakuru ag'okunihira oku yabeetiire n'obwingi obw'obugwetwa obw'ekitiinisa obu yaraganiize abantu be, 19n'amaani ge agatalengwa agarukukorra omuli itwe abaikiriza. Nugo gamu n'amaani ge 20aga yayolekiire omu Kristo, obu yamuhumbwire omu bafu, yamwikaliza ha mukono ogw'obulyo omu biikaro eby'omwiguru. 21Oku nuho Kristo ategekera ebitebe byona eby'abamalaika abakuru, n'ab'obusobozi, ab'amaani n'abalemi, rundi ekikubyo ekindi kyona, tihali omu biro binu byonka, baitu n'omu biro ebiriija. 22Ebintu byona Ruhanga akabita hansi y'ebigere bye, kandi yamufoora mutwe gw'ekitebe kyona ky'abaikiriza. 23Ekitebe eki nugwo mubiri gwe, okuhikirra kwa Kristo anyakuhikiriza byona omu boona.

will be added

X\