ABAKOLOSAI 4

1Inywe bakama b'abairu, abairu banyu mubakorre eby'obwinganiza kandi ebihikire, nimumanya na inywe nkooku mwina MUKAMA omwiguru. 2Mweyongere omu kusaba mutarukugarukirra, mutarukuhungira kandi musiime Ruhanga. 3Na itwe mutusabire, nukwo Ruhanga asobole kutukingurra omuhanda ogw'okurangirra Amakuru Amarungi n'okumanyisa ensita ya Kristo eyankwasize omu nkomo, 4nukwo nsobole kugisoborra kurungi nkooku nsemeriire. 5Abantu ab'aheeru mubakwatege n'amagezi, mutarukusiisa akasumi aka mwina. 6Obutoosa ebigambo byanyu bibege birungi, binurrege abandi nk'ebirungirwemu ekisura, nukwo musobole kumanya eki musemeriire kugarukamu buli omu. 7Tikiko, ow'oruganda omugonzibwa, omukozi omwesigwa kandi omuheereza mugenzi waitu omu kukorra MUKAMA, araabagambira ebyambaireho. 8Bunu nubwo bulyo bwonyini obu mmutumiire hali inywe, nukwo musobole kumanya nkooka tuli, kandi na inywe abagumye emitima. 9Namutumayo hamu na Oneesimo mugenzi waitu omwesigwa kandi omugonzibwa, omuntu ow'owaanyu. Baraabagambira byona ebyabaire kunu. 10Alisitaako, omunyankomo mugenzi wange, naabaramukya; na Mariko mwihwa wa Baranaba (ou nabamanyisizeho kara obu alibahikaho, mumutangirre kurungi). 11Na Yesu, anyakwetwa Yusito, naabaramukya. Omu bakozi bataahi bange abarukukorra obukama bwa Ruhanga, banu bonka nubo abaasazirwe, kandi bakampuumuza. 12Epafura ow'owaanyu, omuheereza wa Kristo Yesu, naabaramukya. Obutoosa abaijuka n'omutima gumu omu kusaba kwe, nukwo musobole kwemerra mugumire, mweheriireyo kimu okukora byona Ruhanga ebi agonza. 13Ndi kaiso arukugumya nkooku yabakoliire n'amaani, inywe hamu n'abo abali Layodikeeya n'abali Hieraapoli. 14Luka, omufumu omugonzibwa, na Deema nibabaramukya. 15Mundamukize ab'oruganda abali Layodikeeya. Mundamukize Nimfa, n'ekitebe ky'abaikiriza ab'omu nju ye. 16Ebbaruha enu obu erikamara kubasomerwa, mugitwekere ab'ekitebe ky'abaikiriza aba Layodikeeya bagisome; kandi na inywe musome ebbaruha eriruga Layodikeeya. 17Muteererre Arakiipo muti: “Oyekambe okuhikiriza obuheereza MUKAMA obu yakuhaire.” 18Nyowe Paulo okuramukya kunu nkuhandiikire n'omukono gwange. Muteebwa nkooku nkiri omu nkomo. Embabazi za Ruhanga ziikale na inywe.

will be added

X\