ABAKOLOSAI 3

1Nukwo nu, obu muraaba mwahumbuukire hamu na Kristo, mute omutima ha by'omwiguru, Kristo nambere ali, anyakwikaliire ha mukono gw'obulyo ogwa Ruhanga. 2Muteekerezeege ebintu eby'omwiguru, bitali eby'omunsi. 3Habwokuba mukafa, kandi obwomeezi bwanyu buserekerwe na Kristo omu Ruhanga. 4Kristo obwomeezi bwaitu obu aligaruka kuzooka, nubwo na inywe mulizooka hamu nawe omu kitiinisa. 5Nahabweki mucwe engeso ez'ensi ezinyakuli omuli inywe: obusiihani, obugwagwa, ebiteekerezo ebibi, okwegomba okubi, n'omukoijo gw'itungo ly'abandi, itungo eri mwafoire embandwa zanyu ez'okuramya. 6Habwokuba ebi nibyo birireetera Ruhanga kubakayukira. 7Kandi ebi nibyo mwakoraga obu mukaba mukyabirumu. 8Baitu hati mucwe engeso zinu: ekiniga, okubiihirwa, itima okuhangirra, n'okubaza eby'ensoni. 9Mutabiihangana ebisuba, habwokuba mukaleka obwomeezi obwa ira n'engeso zaabwo, 10mwatandika obundi obunyakwikara nibuhindurwa buhyaka nukwo bubahikye ha magezi na ha nsisana by'Ogu ayabuhangire. 11Obu, nihaba hatakyaroho Omugiriiki n'Omuyudaaya, asazirwe n'atasazirwe, omunyaihanga n'ow'ihanga eriteegesibwe, omwiru n'ow'obugabe, baitu Kristo nuwe byona omu byona. 12Inywe abaakomerwe Ruhanga, abarukwera kandi abagonzibwa, mube n'okuganyira, embabazi, okwebundaaza, obuculeezi, n'okugumiisiriza. 13Obu haraaba haroho anyakwina akahyeme hali mutaahi we, mugumiisirizangane kandi muganyirangane. MUKAMA nkooku yabaganyiire, na inywe nukwo musemeriire kuganyirangana. 14Kandi ekirukukira byona, mube n'engonzi eziteeraniza hamu ebintu byona omu kwikirraniza okw'amazima. 15Obusinge bwa Kristo obu mwayetiirwekwo kuba ebicweka by'omubiri gumu buleme omu mitima yanyu. Kandi musiimege Ruhanga. 16Ekigambo kya Kristo kiikalege nikyeyongera omuli inywe, obu muraabaga nimwegesangana kandi nimuhaburangana omu magezi goona, noobu muraabaga nimuzina zabbuli, ebizina by'okukugiza, n'ebizina ebiruga mu mwoyo, nimusiima Ruhanga omu mitima n'ebizina ebiruga mu mwoyo, nimusiima Ruhanga omu mitima yanyu. 17Kandi kyona eki muraagambaga rundi eki muraakoraga, mukikolege omu ibara lya MUKAMA Yesu, omuli uwe nimusiimiramu Ruhanga Ise. 18Banyinabwenge muhurrege baiba-inywe nkooku MUKAMA asiima. 19Banyinaamaka mugonzeege bakazi banyu kandi muleke kubagirra omwaga. 20Abaana muhurrege bazaire banyu omu byona, habwokuba eki nikyo MUKAMA asiima. 21Baise-baana muleke kutuntuza abaana banyu, bataharaza emitima. 22Abairu muhurrege bakama banyu ab'omunsi omu byona. Kandi eki muleke kukikora obu baba babataireho eriiso, nk'abarukwenda kusiimwa abantu; baitu mubaheereze n'omutima gumu nimutiina MUKAMA. 23Buli mulimo gwona ogu mukora, mugukole n'okusemererwa, nk'abarukuheereza MUKAMA batali bantu. 24Nimumanya ngu, obugwetwa niyo mpeera yanyu ei muliheebwa MUKAMA; habwokuba nimuheereza MUKAMA Kristo. 25Ningira enkozi y'ebibi erisasurwa habw'ebibi yakozire. Ruhanga tasoroora mu bantu.

will be added

X\