ABAKOLOSAI 2

1Ninyenda mumanye nkooku nyekamba muno habwanyu, na habw'abo abali Layodikeeya, n'abandi boona abatakandoraga, 2nukwo emitima yabo egarukwemu amaani nkooku bateeraniziibwe hamu omu ngonzi, beetegereze kandi bamanyiire kimu ensita ya Ruhanga, nuwe Kristo. 3Omuli uwe nuho haserekerwe amagezi goona n'okwetegereza kwa Ruhanga. 4Eki ninkigamba, nukwo haleme kubaho n'omu arukubahabisa n'enyegesa ey'okusoonasoona. 5Noobu ndaaba ntali nainywe mali, baitu mu mwoyo ndi na inywe, ninsemererwa okumanya nkooku murukwerinda kandi mugumire omu kwikiriza Kristo. 6Nkooku mwaikiriize Kristo Yesu abe MUKAMA wanyu, nukwo mumwikaleho, 7mumugumireho kandi mumweboheho, mugumire omu kwikiriza nkooku mwayegesiibwe, nimusiima n'omutima gwona. 8Mwerinde hatabaho muntu n'omu arukubahabisa n'ebigambo by'amagezi n'obucwangya obutarumu, naahondera emigenzo eya ira ey'obuzarranwa rundi naahondera emizimu eya ira, baitu atarukuhondera Kristo. 9Habwokuba Krsito, omu mubiri gwe, aijwire obwaruhanga bwona. 10Kandi omuli uwe anyakuli mutwe gw'abamalaika abalemi n'abamalaika ab'obusobozi bwona nuho mwatungiire obwomeezi obwijwire. 11Kandi omuli uwe numwo mwasaliirwe ensarwa etali y'emikono, nubwo mwafurukire engeso ez'obuhangwa omu kusarwa okwaleesirwe Kristo. 12Mukaziikwa nawe omu kubatizibwa, kandi mwahumbuurwa nawe habw'okwikiriza obusobozi bwa Ruhanga ayamuhumbwire omu bafu. 13Na inywe abakaba baferiire omu bibi n'omu kutasarwa okw'-emibiri yanyu, Ruhanga akaboomeeza hamu na Kristo, amazire kutuganyira ebibi byaitu byona. 14Nubwo yadibize ekihandiiko ekyatutongaga ibanja, yaguruka ebiragiro byakyo hamu n'amaani gaakyo. Ekihandiiko eki akakiihaho, yakibamba ha musaraba. 15Embandwa zanyu enkuru kandi ez'amaani akaziihaho, yazifoora by'okusungwa naazisingurra ha musaraba. 16Nahabweki hatabaho n'omu arukubacwera omusango ha birukukwata ebyokulya n'ebyokunywa, rundi ebirukukwata ha biro bikuru, rundi ha mboneko y'okwezi, rundi ha Sabbato. 17Ebi byona, kisisani kwonka ekirukwoleka ebirukwija; baitu ekintu kyonyini, nuwe Kristo. 18Hatabaho n'omu arukwemanya ngu nabakira, habwokuba uwe akeekomera kuramya n'okwinamira abamalaika, naayesiga ebi yasuukulirwe naayenyumiriza busa omu biteekerezo bye eby'obuntu. 19Abantu nk'abo baba batakyagumira ha Mutwe, nuwe Kristo anyakuliisa omubiri gwona, akaguteeraniza omu ngingo zagwo n'omu binywa, gukakura Ruhanga nkooku asiima. 20Obu muliba mwafiire hamu na Kristo, mwaruga ha mizimu eya ira ey'ensi, habwaki mwikara n'engeso nk'ez'abo abakyali b'ensi? Habwaki mworobera ebiragiro ebirukugamba biti: 21“Otakwataho! Otarozaaho! Otakoraho!” 22(Ebiragiro ebirukukwata ha bintu ebihwaho ahonaaho bimazire kwekoonyezibwa.) Oku tinukwo kuhondera enyegesa n'ebiragiro ebyatairweho abantu? 23Mazimakwo binu nibizooka nk'eby'amagezi, nibibongera amaani ag'okwehayo, okwebundaaza, n'okusaaliza omubiri; baitu tibiina mugaso gwona ogw'okutanga okwegomba okubi kw'omubiri.

will be added

X\