ABAKOLOSAI 1

1Nyowe Paulo, Ruhanga ou yagondeze mbe mukwenda wa Kristo Yesu, hamu na Timoteho mugenzi waitu, 2nitubahandiikira inywe abantu ba Ruhanga kandi bagenzi baitu abeesigwa abali Kolosai: Nitubagondeza omugisa n'obusinge ebiruga hali Ruhanga iitwe. 3Butoosa obu tuba nitubasabira, tusiima Ruhanga, Ise MUKAMA waitu Yesu Kristo, 4habwokuba tukahurra nkooku murukwikiriza Kristo Yesu, n'oku murukugonza abantu ba Ruhanga boona, 5nimusigikira ha kunihira oku mwina nukwo mutunge ebirungi ebimwahuliirwe omwiguru. Okunihira oku mwahuliireho kara omu nyegesa y'amazima. 6Nugo Amakuru Amarungi agabahikireho, kandi agarukweyongera muno nigararanga omunsi yoona. Gakeeyongera gati omuli inywe okuruga ha kiro eki mwabandiizeho kuhurra n'okwetegereza kwo embabazi za Ruhanga, 7nkooku mwayegesiibwe Epafura, omuheereza mugenzi wange omugonzibwa. Habwange nuwe muheereza omwesigwa wa Kristo, 8ayaizire okutumanyisa engonzi Mwoyo Ahikiriire ezi yabatairemu. 9Nahabweki okuruga obu twakihuliire, titukoosaga kubasabira, nukwo mwetegerereze kimu Ruhanga ebi agonza, kandi mwijule amagezi goona n'okumanya kwona okurukuleetwa Mwoyo wa Ruhanga, 10mugire engeso ezisemeriire MUKAMA, mukole ebi asiima, mweyongere omu birungi byona ebi murukukora, kandi mweyongere kumanya Ruhanga. 11Ruhanga ow'obusobozi bwona abagumye habw'amaani ag'ekitiinisa kye, nukwo mugire obumanzi bwona kandi mugumiisirize n'okusemererwa. 12Musiime Isiitwe ayatusoboize kubagana ha bugwetwa bw'abahikiriire abali omu bukama bw'omusana. 13Nuwe yatwihire omu bukama obw'omwirima, yatutaahya omu bukama bw'Omwana we omugonzibwa, 14anyakutucungura kandi anyakutuganyira ebibi. 15Kristo nuwe kisisani kya Ruhanga atarorwa, omuzigaijo gw'ebihangwa byona; 16habwokuba omuli uwe, byona nuho byahangiirwe: eby'omu iguru n'eby'omu nsi; ebiboneka n'ebitaboneka; rundi ebitebe by'abamalaika abakuru, ab'obusobozi, n'abalemi-ebintu byona bikahangirwa omuli uwe kandi bikahangwa habwe. 17Nuwe yabandize kubaho byona bitakabaireho, kandi ebintu byona biteeranira omuli uwe. 18Nuwe mutwe gw'omubiri-kandi omubiri ogu nikyo kitebe ky'abaikiriza. Nuwe ntandiko kandi omuzigaijo ogw'abahumbuukire omu bafu, nukwo omu byona nuwe abe w'okubanza. 19Habwokuba Ruhanga akagonza Kristo we aijurre kimu obwa Ruhanga bwe, 20kandi akacwamu kwegarurra ebintu byona, eby'omu nsi rundi eby'omu iguru naaraba omuli uwe, obu yaleesire obusinge habw'esagama y'omwana we eyasirwe ha musaraba. 21Inywe kara, mukaba mwebaganiize na Ruhanga, mwina obunyanzigwa omu mitima yanyu kandi, nimukora ebibi. 22Baitu hati mugarukangainemu na Ruhanga omu mubiri gw'omwana we habw'okufa kwe, nukwo abahikye omumaiso ge nimwera, mutaina kamogo, kandi mutaina eki murukujunaanwa. 23Kyonka mwikale omu kwikiriza, mugumire kandi mutarukutengeeta, mutarukuruga ha kwesiga Amakuru Amarungi aga mwahuliire, agaarangiriirwe buli kihangwa ekinyakuli omunsi, amakuru nyowe Paulo aga nafookere omuheereza waago. 24Hati ninsemererwa kurora nimbonabona habwanyu, habwokuba nimpikiriza n'omubiri gwange ebirukubura ha mabone Kristo aga yaboine habw'omubiri gwe-nikyo kitebe ky'abaikiriza. 25Ekitebe eki nikyo nakomiirwe kuba muheereza wakyo nk'omulimo gwa Ruhanga ogu naahairwe habwanyu oku guli, nukwo mmanyisize kimu ekigambo kya Ruhanga. 26Egi niyo nsita eyaserekerwe ira lyona n'obusinge bwona, baitu hati enyakwolekerwe abantu be. 27Nubo Ruhanga yagondeze kwoleka ensita egi nkooku ina ekitiinisa kingi omu Banyamahanga. Ensita egi nuwe Kristo anyakuli omuli inywe, omukwato gwaitu ogulitutungisa ekitiinisa. 28Nuwe turukurangirra, nitwegesa kandi nituteererra buli muntu n'amagezi goona, nukwo weena anyakuhikire tusobole kumuleeta hali Kristo. 29Eki nikyo ndukutalibanira kandi nikyo ndukwekambira n'amaani goona Ruhanga aga arukunnyijuza.

will be added

X\